Ebaruha oko Abanya Galatia 3:1-29
-
Obwikirirya bulengire erikwama Emighambo (1-14)
-
“Omutunganene akendisyabyaho busana n’obwikirirya” (11)
-
-
Abrahamu syahabawa endaghane busana n’erikwama Emighambo (15-18)
-
Kristo ni lubuto lwa Abrahamu (16)
-
-
Eyo Emighambo yalua n’ekyaleka iyahirwaho (19-25)
-
Abana b’oMungu busana n’erikirirya (26-29)
-
Abandu ba Kristo nabo ni lubuto lwa Abrahamu (29)
-
3 Inywe Bagalatia bakiru! Nindi yo wabiribateba, inywe mwakangiriribawa ndeke-ndeke ngoko Yesu Kristo akongomererawa oko muti?
2 Nanzire inababulya omwatsi ono musa: Mumwahabwa ekirimu busana n’erikwama emighambo kutse mwahabawakyo busana n’erikirirya emyatsi eyo mwowa?
3 Simuwite obwenge kwe? Oko nzuko, mumwaligha erisondolwa n’ekirimu.* Busanaki lino mukaligha erisondolwa n’amalengekania w’abandu?*
4 Amateso mangaha n’ogho mwalolako, mumwalola kugho ko bule? Nikirirye ngoko mumutaghalwa buyira.
5 Ni bugha ambu oyukabaha ekirimu n’erikola ebitiko-tiko omo kati-kati kenyu akakolabyo kundi mukakwama emighambo, kutse akakolabyo kundi mwabirikirirya ebyo mwowa?
6 Mulengekanaye oko Abrahamu. “Iye mwikirirya Yehova* n’ekyo mukyaleka inialangirwamo mutunganene.”
7 Munasi ndeke-ndeke ngoko abikiriraya bo bana ba Abrahamu.
8 Amasako mwakangania ngoko oMungu angaghanzire abandu b’ebihanda mo batunganene busana n’obwikirirya bwabo. Ekyo kyo kyaleka kera oMungu iniabwira Abrahamu y’engulu mbuya ati: “Abandu b’ebihanda byosi bakendisyatsumulwa erilabira iwe.”
9 Neryo abikirirye banemutsumulwa haghuma na Abrahamu, oyo wabya n’obwikirirya.
10 Abosi abakakwama emighambo batakirwe, kundi Amasako akabugha ati: “Atakirawe omundu wosi oyutekwama emyatsi yosi eyihandikire omo kitabu ky’erilinga ky’Emighambo, oyutesikayayo.”
11 Kandi kilangirikire ndeke-ndeke ngoko sihali omundu oyo oMungu akaghanzamo mutunganene busana n’erikwama emighambo, kundi “omutunganene akendisyabyaho busana n’obwikirirya bwiwe.”
12 Emighambo siyisabire eribya n’obwikirirya. Aliwe oyukakola emyatsi eyi akendisyabyaho busana nayo.
13 Kristo mwatughula, amatulusya omw’itakirwa ry’emighambo. Mwakola atya omw’itakirwa omo mwanya wetu, kundi Amasako akabugha ati: “Atakirawe obuli mundu oyukahanikawa oko muti.”
14 Ekyo kyabya kitya emiyisa ya Abrahamu itoke erihika oko bandu b’ebihanda erilabira Kristo Yesu, kandi erilabira obwikirirya bwetu tutoke eribana ekirimu ekyalaghawa.
15 Baghala betu, ngakanaya nenyu ngakolesya emyatsi eyo bandu basi: Endaghane ikabya yabiliwa nomo yangabya iyiryalighawa n’omundu mughuma musa, hakabya isihali oyo wangatwayo kutse eritomeka kuyo kw’eyindi myatsi.
16 Nikwa oMungu mwaha esyondaghane siwe syo Abrahamu n’olubuto lwiwe. Mwatabugha ati, “oko lubuto lwaghu,” akakania oko bandu bangyi. Aliwe mwabugha ati, “oko lubuto lwaghu,” akakania oko mundu mughuma, ni bugha ambu, Kristo.
17 Kandi ngabugha niti: Emighambo eyahuluka habilaba emyaka 430 muyitalusyaho endaghane eyo Mungu akola. Kandi muyitabughaho ebyo Mungu alagha.
18 Omwandu amabya iniakahabawa omundu busana n’emighambo, ni bugha ambu omundu isyangasyahabwagho busana n’ebyo oMungu alagha. Aliwe, oMungu mwaha Abrahamu y’omwandu erilabira ebyo amulagha.
19 Neryo Emighambo yabyaho busanaki? Muyatomekwa busana n’erikangania amalolo, erihika oko mughulu olubuto olwahabawa endaghane lwangahikire. OMungu mwaha abamalaika b’emighambo, nabo mubalabyayo omo musangania.
20 Nikwa ahali omundu mughuma musa sihangabya omusangania. N’oMungu ni mughuma musa.
21 Neryo ni bugha ambu Emighambo ikapinga esyondaghane sy’oMungu? Iyehe! Kundi abandu bamabya imo bahabwa omughambo owakaha engebe, ekyo kyangalekire ibaghanzwamo batunganene busana n’omughambo.
22 Aliwe Amasako mwahira ebindu byosi omo bukobe bw’erilolo, endaghane eyo mundu akahabawa busana n’erikirirya Yesu Kristo yitoke erihabwa abikirirye.
23 Aliwe, embere obwikirirya buhike, emighambo yo yabya ikatuteya. Twabya itwabirihirwa omo bukobe bwayo, itunemulindirira obwikirirya obwangabisulirwe.
24 Neryo Emighambo yabya muteya* wetu oyo wabya akatutwala oko Kristo, tutoke erighanzwamo batunganene busana n’erikirirya.
25 Neryo kundi obwikirirya bwabirihika, situkilaghire oko muteya.*
26 Neryo muli bana b’oMungu busana n’erikirirya Kristo Yesu.
27 Kundi inywe bosi, inywe mwabatisibawa omo Kristo mwabiryambala Kristo.
28 Neryo sihali Omuyahudi n’Omugiriki, kutse omukobe n’oyuli bwiranda, kutse omulume n’omukali, kundi inywe bosi muli mundu mughuma omo Kristo Yesu.
29 Kandi mwamabya imuli bandu ba Kristo, oko kwenene imuli lubuto lwa Abrahamu. Mukendisyahabwa omwandu erikwamana n’ebyo oMungu alagha.
Amaelezo awehikwa
^ Kinywa kwa kinywa, “Mumwatsuka omo kirimu.”
^ Kutse “w’omubiri.”
^ Ulebaye endomeko A5.
^ Kutse “mulemberi.”
^ Kutse “mulemberi.”
