Ebaruha oko Abanya Galatia 4:1-31
4 Neryo ngabugha niti omughulu omwana oyukendisyalya omwandu akine mulere, akabya iniane ng’omukobe, nomo iye y’omukama w’ebindu byosi.
2 Hakabya ihane abalemberi n’abaghombe abakabya ibanemumusondola erihika oko kiro eky’ahirawaho na baba wiwe.
3 Kutya, netu omughulu twabya bana, amalengekania w’ekihugho abya iniabirituyiramo bakobe.
4 Aliwe, omughulu owahirawaho abere abilaba, oMungu mwatuma Omughala wiwe, oyo wabutawa n’omukali n’oyo wabya akakwama emighambo,
5 atoke eribohola erilabira embanulo abali omo bukobe bw’erikwama emighambo, kusudi tutoke eriyirwamo bana b’oMungu.
6 Kundi muli baghala biwe, oMungu abirituma ekirimu ky’Omughala wiwe omo mitima yetu. Kandi kikabirikira kiti: “Abba,* Baba!”
7 Neryo sighukiri mukobe, aliwe uli mughala. Neryo wamabya ighuli mughala, oMungu akendisyakuha omwandu.
8 Aliwe, omughulu mwabya isimwasi oMungu, mwabya bakobe b’emiungu y’amabehi.
9 Aliwe kundi lino mwabiriminya oMungu, kutse nibughe niti mwabiriminywa n’oMungu, busanaki mukatasyasuba oko myatsi ye bule n’eyitawite mughaso, kandi mukanza eritasyabya bakobe b’emyatsi eyi?
10 Simulibula eryibuka ebiro, emisi, emighulu, n’emyaka.
11 Ngasagha niti nanganabya imunabahereryako akaghala kaghe.
12 Baghala betu, ngabasaba niti mubye ngoko niri, kundi naghe nabya nga nywe. Mumutanikosera.
13 Aliwe, munasi ngoko erilwala ryo ryaleka inabana akanya k’erimbere k’eribahubirya engulu mbuya.
14 Nomo erilangira ngoko nilwere muryaleka nenyu imwaghalwa, mumwatanipokya kutse erinipona. Aliwe, mumwanikokya ng’omumalaika w’oMungu, nga Kristo Yesu.
15 Obutseme obo mwabya n’abo buli hayi? Kundi nikirirye ngoko, nga kyatokekana, kumbe mumwayilusyako ameso wenyu n’erimbagho.
16 Neryo nabiribya nzighu yenyu busana n’eribabwira ekwenene kwe?
17 Bakayikasa kutsibu mutoke eryanzabo. Aliwe, sibalikola batya n’omutima owuwene. Banzire imwayihighula okw’ingye kusudi mubakwame.
18 Aliwe, omundu amabiyikasa mutoke erimwanza kandi iniakola atya n’omutima owuwene, aho isyatakola muhanda. Aliwe isyakola atya omughulu niri omo kati-kati kenyu risa,
19 inywe bana baghe balere, inywe mukaleka inatasyowa obulumi bw’eributa erihika omughulu Kristo asyabumbwa omw’inywe.
20 Nangatsemire eribya haghuma nenyu oko mughulu ono, n’erikania omo yindi nzira, kundi ngahanga-hangaya busana nenyu.
21 Inywe mwanzire erikwama emighambo, muterimbwira: Simulyowa ebyo Mighambo ikabugha?
22 Eky’erileberyako, Amasako akabugha ati Abrahamu abya n’abaghala babiri. Omughuma amubuta oko mughombe mukali, n’oghundi amubuta oko mukali oyuli bwiranda.
23 Aliwe, oyo wabutawa oko mughombe mukali mwabutwa ngoko bandi bana bakanabutawa.* Nikwa, oyo wabutawa n’omukali oyuli bwiranda mwabutwa busana n’endaghane.
24 Emyatsi eyi ni kisosekanio: Abakali babiri aba bakasosekanaya esyondaghane ibiri. Omughuma akasosekanaya endaghane eyakolawa oko Kitwa kye Sinai, eyikaluamo abana b’obukobe, n’omukali oyo ni Hagari.
25 Hagari akasosekanaya e Sinai, ekitwa ikiri omo kiharo kye Arabia. Kandi alingene ne Yerusalema ya lino, kundi ali omo bukobe n’abana biwe.
26 Aliwe, e Yerusalema y’endata yiri bwiranda, kandi ni mama wetu.
27 Kundi Amasako akabugha ati: “Utseme iwe mukali mughumba, iwe utawite abana; uyitsangure iwe utewatowa oko bulumi bw’eributa, kundi omukali oyo abirisighanibwa ali n’abana bangyi kulenga oyuwite omulume.”
28 Neryo inywe, baghala betu, muli bana b’endaghane nga Isaka.
29 Aliwe, ngoko oyo wabutawa ngoko abandi bana bakabutawa abya akaghalya oyo wabutawa erilabira ekirimu, ko bine bitya na lino.
30 Nikwa, Amasako akabugha atiki? Akabugha ati: “Higha omughombe mukali n’omughala wiwe, kundi omughala w’omughombe mukali syendisyahabwa omwandu n’ahake haghuma n’omughala w’omukali oyuli bwiranda.”
31 Neryo baghala betu, situli bana b’omughombe mukali. Aliwe, tuli bana b’omukali oyuli bwiranda.
Amaelezo awehikwa
^ Ni kinywa ky’Ekiebrania kutse ky’Ekiaramu ekikamaanisaya “Tata!, Baba!”
^ Kinywa kwa kinywa, “erikwamana n’omubiri.”
