Ebaruha oko Abanya Galatia 5:1-26
5 Kristo mwatubohola kusudi tubane obwiranda obuli ng’obo. Neryo musike, simuleke omundu akatasyabayiramo bakobe.
2 Ingye Paulo, ngababwira niti mwamabibanibwa, ebyo Kristo akola isi by’omughaso okw’inywe.
3 Kandi ngatasyabwira obuli mundu oyukabanibawa ngoko atolere iniakwama Emighambo yosi.
4 Inywe mukasonda erighanzwamo batunganene busana n’emighambo, mwabiriyilusya oko Kristo, mwabiriyilusya omo lukogho lwiwe.
5 Aliwe itwe, erilabira ekirimu, tunemulindirira kutsibu kandi n’amaha erighanzwamo batunganene busana n’obwikirirya.
6 Kundi oko bali omo bughuma na Kristo Yesu, eribanibwa kutse eritendibanibwa si by’omughaso. Eky’omughaso bw’obwikirirya obukalangirika omo lwanzo.
7 Mwabya imunemutibita ndeke, nindi yo waleka imutasyakwama ekwenene?
8 Amalengekania ayo syalilua oko oyo wababirikira.
9 Elevire* nge ikaleka efarine yosi iyabimba.
10 Nikirirye ngoko inywe muli omo bughuma n’Omukama simwendibya n’awandi malengekania. Aliwe, oyukabadunga nomo angabya ndi, akendisyahabwa amalipizi awatolere.
11 Baghala betu, namabya inikinahubiraya niti abandu batolere eribanibwa, busanaki nikinaghalibawa?* Namabya inikinahubiraya niti abandu batolere eribanibwa, omuti w’amaghali* isyangasyatwikalya abandu.
12 Nanzire abandu abakasonda eribadunga ibayibarura.*
13 Baghala betu, mwabirikirawa eribya bwiranda. Aliwe, obwiranda obo isibwaleka imwakwama* esyongumbu sy’omubiri. Nikwa, muleke olwanzo lubakune eriwatikania.*
14 Kundi omundu amasikya ekyalayiro kighuma kino ekikabugha kiti: “Utolere iwanza mulikyenyu ngoko uyanzire,” akabya iniamabisikya Emighambo yosi.*
15 Mwamabya mukalumangana n’erisokongolana, mulebaye ndeke isimwahika oko kika ky’eribughanaho.
16 Aliwe, ekyo ngababwira kya kino: Mubye mukakwama obusondoli bw’ekirimu, neryo isimwendibya mukakola erikwamana n’esyongumbu syenyu syomubiri.
17 Kundi omubiri akalwa n’ekirimu busana n’esyongumbu syagho, n’ekirimu nakyo kikalwa n’omubiri. Ebibiri byosi sibirihulikirirana, n’ekyo kikaleka imutakola emyatsi eyo mwanzire erikola.
18 Kandi mwamabisondolwa n’ekirimu, isimukisondolawa n’emighambo.
19 Emibere y’omubiri ikalangirika ndeke-ndeke. Nayo yeno: Oburaghane,* eritendyera, obutakw’isoni,*
20 eriramya esyosanamu, emyatsi y’obukumu,* obuyighu, amalwa, eritsuro, erikapikira, eritendihulikirirana, erighabana, eritsukisya ehisomo-hisomo,
21 eriyitsutsa ebindu by’abene, obutamiri, esyofete esilabiryeho kateho, n’eyindi myatsi eyisosire eyo. Ngabahana oko myatsi eyi ngoko nabya inabiribahana, niti ababeghere erikola emyatsi eyi sibendisyingira omo Bwami bw’oMungu.
22 Aliwe, emibere y’ekirimu* yeno: Olwanzo, obutseme, obuholo, erihanda omutima, eribya n’omutima owuwene, omutima mubuya, erikirirya,
23 obolo, eriyikakirya. Sihali omughambo owakabugha ati ni kibi eribya n’emibere eyo.
24 Kandi abakakwama Kristo Yesu babirikongomerera omubiri n’esyongumbu syagho sy’oko muti.
25 Twamabya itukaligha obusondoli bw’ekirimu, tubye tukayighendya erikwamana n’obusondoli bw’ekirimu ekyo.
26 Situbye bandu abakayilabiriraya, abakasondanako omwagha, n’eritsurana.
Amaelezo awehikwa
^ Kutse “ekihamya.”
^ Kutse “nikinendereribawa.”
^ Ulebaye amaana w’ebinywa.
^ Kutse “babye bakonwe,” neryo isibendisyatoka erikwama emighambo eyo bakimira.
^ Kutse “isimwayihambulisanaya mubo erikwama.”
^ Kutse “eribya bakobe b’abandi.”
^ Kutse kandi, “Emighambo yosi yiri omo kyalayiro kino: ‘Utolere iwanza mulikyenyu ngoko uyanzire.’”
^ Omo Kigiriki ni por·neiʹa. Ulebaye amaana w’ebinywa.
^ Kutse “emibere y’eritendikw’isoni.”
^ Kutse “obuloyi, ebikatamiraya.”
^ Kutse “eyo kirimu kikatuwatikaya eribya nayo.” Kinywa kwa kinywa, “eritunda ry’ekirimu.”
