Ebaruha oko Abanya Galatia 6:1-18
6 Baghala betu, omundu amabanika omo nzira eyituwene isyasi, inywe mukulire bunya-kirimu muyikase erihana omundu oyo* y’omo bolo. Aliwe, uyiteghaye naghu ukasyalengwako.
2 Mubye mukawatikania omo myatsi eyikabalitohera. Mwamakola mutya, imwamakangania ngoko munemukwama ebiri omo mughambo wa Kristo.
3 Omundu amayilangiramo w’omughaso, aliwe iye si kindu, aho iniakayiteba.
4 Aliwe, obuli mundu alebaye ebyo akakola, neryo iniakenditsema busana n’ebyo akakola, butsira eriyilinganisya n’abandi.
5 Kundi obuli mundu akendisyaheka omuheke wiwe.*
6 Omundu oyukakangiriribawa ekinywa ky’oMungu ahe oyukamukangiriraya oko bindu byosi ebyuwene ebyo awiteko.
7 Isimwatebawa: oMungu syalisekereribawa. Kundi ekyo omundu akahera, ky’anemwendisyasoloma.
8 Kundi oyukahera omw’ikwama esyongumbu sy’omubiri, akendisyasoloma eritsandibwa busana n’omubiri wiwe. Aliwe, oyukahera omw’ikwama obusondoli bw’ekirimu, akendisyasoloma engebe y’erikota busana n’ekirimu.
9 Neryo, isitwaleka erikola ebyuwene, kundi tutitaluha, itukendisyasoloma oko mughulu owatolere.
10 Neryo, busana n’ekyo, omughulu twamabana akanya,* tukolere abosi b’ebibuya, kutsibu-tsibu abaghala n’abali betu omo bwikirirya.
11 Mulangire ngoko ingyuwene-wene munabahandikira omo syoherufi nene-nene.
12 Abosi abanzire erilangirika ndeke eyihya* bo bakabakasa bati mubanibawe. Bakakola batya kundi sibanzire bakaghalibwa* busana n’erikwama Kristo, oyo waholera oko muti w’amaghali.*
13 Kundi nibya n’abakabanibawa sibalikwama Emighambo. Aliwe, banzire imwabanibwa batoke eriyipipa busana n’emibiri yenyu.
14 Nikwa, kumbe ingye isinayihalamba n’ahake. Ekyo nangayihalambira kisa w’omuti w’amaghali* w’Omukama wetu Yesu Kristo. Ingye ngalengekanaya niti erilabira iye ekihugho mukyakongomererwa oko muti. Aliwe ekihugho kikalengekanaya kiti ingye munakongomererwa oko muti erilabira iye.
15 Eky’omughaso si ry’eribanibwa kutse eritendibanibwa. Aliwe, eky’omughaso ry’eribya kihangyikwa kihya-kihya.
16 Abosi abakakwama ekyalayiro kino, ni bugha ambu, e Israeli y’oMungu, babye n’obuholo, kandi baghanyirawe n’oMungu.
17 Eritsuka lino, sihabye omundu oyukanikenderaya. Oko mubiri waghe kune esyongolu esikakanganaya ngoko niri mukobe wa Yesu.
18 Baghala betu, olukogho lw’Omukama wetu Yesu Kristo lubye haghuma n’omutima owo mukakanganaya. Amina.
Amaelezo awehikwa
^ Kutse “erimusubya oko nzira.”
^ Kutse “akendisyakola eby’asabirwe.”
^ Kinywa kwa kinywa, “omughulu owahirirweho.”
^ Kutse “omo mubiri.”
^ Kutse “bakendereribawa.”
^ Ulebaye amaana w’ebinywa.
^ Ulebaye amaana w’ebinywa.
