Ebaruha oko Abanya Kolosai 1:1-29
1 Ebaruha eno ikalua oko Paulo, omukwenda wa Kristo Yesu busana n’erisonda ry’oMungu, na Timoteo mughala wetu.
2 Ngatumirayo ababuyirire n’abaghala betu bataleghula abali omo bughuma na Kristo, abali e Kolosai.
Olukogho n’obuholo bw’oMungu Tata wetu bibye haghuma nenyu.
3 Omughulu wosi tukasima oMungu Tata w’Omukama wetu Yesu Kristo omughulu tukabasabira,
4 kundi twabiryowa ngoko mwikirirye Kristo Yesu, kandi ngoko mwanzire ababuyirire bosi
5 busana n’amaha agho babiribateghekanirya elubula. Mumwowa embere oko maha ayo omughulu mwakangiriribawa emyatsi y’ekwenene y’engulu mbuya,
6 engulu mbuya eyahika ewenyu. Ngoko engulu mbuya inemulola embere n’erihika oko bandu bosi, kutya engulu mbuya inemulola embere n’erihika omo kati-kati kenyu, erilua ekiro mwowa n’eriminya ndeke-ndeke olukogho lw’oMungu ngoko luli.
7 Omughombe mwanzwa, kandi mulikyetu Epafrase yo wabaminyisaya omwatsi oyo. Ni mughombe mutaleghula wa Kristo oyo wakola omubiiri oyo omo mwanya wetu.
8 Kandi iye yo watukaniraya oko lwanzo olo mwabiribya nalo busana n’ekirimu kibuyirire.
9 Ekyo kyo kikaleka erilua ekiro twowa omwatsi oyo, sitwetwataleka eribasabira, n’erisaba tuti muminye kutsibu kandi ndeke-ndeke erisonda ry’oMungu, n’eribya n’amenge manene, n’eryowa ndeke emyatsi y’obunya-kirimu.
10 Ekyo ikikendibawatikya eriyighendya ngoko Yehova* anzire, n’erimutsemesya ndeke-ndeke omughulu mukendibya imunemukola ebyuwene, n’erigha emyatsi mingyi y’ekwenene oko Mungu.
11 Kandi tukasaba tuti oMungu akolesaye obutoki bwiwe bunene eribaha akaghala kanene, mutoke eriyiyinia ndeke-ndeke imunemuhanda omutima kandi imune n’obutseme,
12 kandi imunemusima Tata, oyo wabatokesaya erisyabana oko mwandu w’ababuyirire abali omo kyakakala.
13 OMungu mwatulusya omo mwirima* n’eritutwala omo bwami bw’Omughala wiwe mwanzwa.
14 Busana n’Omughala wiwe, twabirisabulwa erilabira embanulo, kandi tukaghanyirawa amalolo wetu.
15 Iye ni kisosekanio ky’oMungu oyutelangirika, akambere k’ebihangyikwa byosi;
16 kundi ebindi bindu byosi byabumbawa erilabira iye: ebiri elubula n’ebiri oko kihugho, ebikalangirika n’ebitelangirika, byangabya bitumbi by’obwami, obukama bosi-bosi, amatabali, kutse obukulu bosi-bosi. Ebindi bindu byosi byabumbawa erilabira iye kandi busana naye.
17 Kandi abya inianeho embere sy’ebindi bindu byosi, n’ebindi bindu byosi byahikira eribyaho erilabira iye.
18 Kandi iye y’omutwe w’omubiri, ni bugha ambu, endeko. Yo nzuko, yo watsuka erilubukibwa, atoke eribya w’erimbere omo myatsi yosi;
19 kundi oMungu mwalangira ikyuwene erimusulyamo emyatsi yosi.
20 Kandi erilabira iye, asubaye ebindu byosi omo bughuma naye, bibye ebiri oko kihugho kutse omo lubula, atoke erihiraho obuholo erilabira omusasi owutika oko muti w’amaghali.*
21 Oko kwenene, kera mwabya hali n’oMungu, kandi mwabya esyonzighu siwe, kundi imukalengekanaya oko myatsi mibi.
22 Lino abiribasubya omo bughuma naye erilabira omubiri w’omundu oyo, erilabira oluholo lwiwe, kusudi abatwale embere sy’oMungu imune babuyirire, abate n’ekosa, n’abateko ehinywa-hinywa.
23 Ekyo kikendisyatokekana mutitaleka obwikirirya bwenyu, mutitalua oko fondasyo y’obwikirirya bwenyu, kandi mwamabya imunasikire butsira erileka amaha w’engulu mbuya eno, eyo mwowa, kandi eyabirihubiribwa omo kihugho kyosi.* OMungu mwanisombola erihubirya engulu mbuya eyo.
24 Lino nitsemire kundi ngaghalawa busana n’endundi yenyu, kandi ninemwaghalwa nga Kristo. Aliwe, ritolere inabuyirira amaligho ayo omo mwanya w’omubiri wa Kristo, ni bugha ambu, endeko.
25 Nabiribya omughombe w’endeko eyi busana n’omubiiri ogho Mungu aniha nitoke eribawatikya erihubirya ndeke-ndeke ekinywa ky’oMungu,
26 erihubirya ekumbo* nyibuyirire eyabya iyabiribiswa omo mighulu ya kera, n’eritsuka oko bizazi bya kera.* Aliwe lino, yabiribisulirwa ababuyirire biwe.
27 Abo b’oMungu anza eriminyisya omo kati-kati k’ebihanda obubuya bw’ekumbo* nyibuyirire eyo. Ekumbo* eyo ni Kristo omo bughuma nenyu. Ekyo kikabaha amaha w’erisyabya omo lukengerwa haghuma naye.
28 Iye yo tukatulaghanaya. Tukakunga obuli mundu n’erikangirirya obuli mundu omo menge wosi, kusudi tutwale obuli mundu embere sy’oMungu inianakulire omo bughuma na Kristo.
29 Ekyo kyo kikaleka inakola kutsibu n’eriyikasa omo buwatikya bw’akaghala kiwe akakakola kutsibu omw’ingye.
Amaelezo awehikwa
^ Ulebaye endomeko A5.
^ Kutse “butoki bw’omwirima.”
^ Ulebaye amaana w’ebinywa.
^ Kinywa kwa kinywa, “omo bihangyikwa byosi eyikwa w’elubula.”
^ Kutse “esiri.”
^ Ulebaye amaana w’ebinywa.
^ Kutse “esiri.”
^ Kutse “esiri.”
