Ebaruha oko Abanya Kolosai 2:1-23
2 Nanzire imwaminya ngoko ngalwa kutsibu busana n’eribawatikya, eriwatikya abali e Laodikia, n’eriwatikya abosi abatebatanilolako.*
2 Nanzire emitima yabo iyakiranibwa. Nanzire ibaluka-lukana haghuma omo lwanzo, eribya n’obuteke bosi, ni bugha ambu, eriminya ndeke-ndeke ekumbo* nyibuyirire, n’eriminya ekwenene eyilebirye ekumbo nyibuyirire y’oMungu, ni bugha ambu, Kristo.
3 Eriminya ryosi, amenge wosi w’obughuli, n’eriminya ryosi ry’obughuli bibisire omo Kristo.
4 Ngabugha ekyo kusudi sihabye omundu oyukabateba omo mayele.
5 Nomo nite haghuma nenyu omo mubiri, nine haghuma nenyu omo kirimu. Ninemutsema ngalangira ngoko muyitondekire ndeke, kandi ngoko mwikirirye Kristo n’omutima wosi.
6 Neryo kundi mwabiriligha Kristo Yesu Omukama wetu, simuleke erilendera omo bughuma naye.
7 Muhande emirihi, n’erihimbwa omw’iye. Kandi musike omo bwikirirya ngoko mwakangiriribawa. Mukole mutya imunemusima oMungu omughulu wosi.
8 Muyiteghaye, isihabya omundu oyukabahamba omo filozofia,* n’omo mabehi matya-matya, awakalua omo mitsye y’abandu, n’oko malengekania w’ekihugho, butsira oko Kristo.
9 Kundi emibere yosi y’oMungu yiswire omo Kristo.
10 Busana naye, simubulire kindu. Iye y’omukulu w’amatabali, n’obukulu bosi.
11 Obwira bwenyu haghuma naye bwabirileka imwabanibwa. Mumwatabanibwa omo byala. Aliwe, mubabalusyako omubiri w’amalolo kundi abaghombe ba Kristo ko batolere ibabanibwa batya.
12 Kundi mumwatabwa haghuma naye omughulu mwabatisibawa nga ye. Kandi erilabira obwira bwenyu haghuma naye, nenyu mumwalubuka haghuma busana n’erikirirya emibiiri y’obutoki y’oMungu, oyo walubukaya Kristo.
13 Aliwe, omughulu mwabya baholi busana n’amakosa wenyu kandi busana n’eritendibanibwa, oMungu mwabaha engebe haghuma na Kristo, omwanza riwe. Mwatughanyira amakosa wetu wosi,
14 kandi mwazima edokima eyahandikawa omo byala eyabyamo ebyalayiro, eyabya yikalwa netu. Mwabuliraniayo omw’ikongomererayo oko muti w’amaghali.*
15 Erilabira omuti w’amaghali,* mwaghendya abatabali n’abakulu bo ndumbu, kandi mwakanganiabo embere sy’abandu ngoko babirisingwa, n’erikangania ngoko abirisingabo.
16 Neryo, sihabye omundu oyukabatswera busana n’ebyo mukalya n’erinywa, kutse busana n’eryibuka ekiro kikulu, kutse ekiro kikulu ky’omughenda muhya-muhya, kutse esabato.
17 Emyatsi eyo yabya kitsutsu ky’emyatsi eyikendisyasa. Aliwe, ekwenene ni Kristo.
18 Simuleke abandu abakanza eriyikehya ery’amabehi kutse eriramya abamalaika bakaleka imwatabana ekihembo. Abandu abo bakakwama emyatsi eyo balyalangira, bakayiheka isibawite ekyangaleka ibayiheka busana n’amalengekania wabo w’omubiri.
19 Kandi sibalisighala oko mutwe, owakaleka omubiri iniabana ebyo alaghireko, n’eriluka-lukana ndeke erilabira esyongunyiro, n’ebikahambanaya amakuha, n’erileka omubiri iniakula omo kaghala k’oMungu.
20 Mwamabya imwahola haghuma na Kristo omw’itendikwama amalengekania w’ekihugho, busanaki mukinayighendaya ng’abandu abakine omo kihugho, omw’ikwama ebyalayiro nga bino:
21 “Isiwimaya, isiwaghonza, isiwatula?”
22 Ebyalayiro ebyo bilebirye emyatsi eyikatsanda omughulu ikakolesibawa. Ni mighambo, kandi ni makangirirya w’abandu.
23 Ebyalayiro ebyo bikakwamawa omw’iramya eryo omundu akayihiriraho, omw’iyikehya ry’amabehi, n’eryaghalya omubiri. Neryo ekyo kikaleka ibyalangirika nga ni by’amenge. Aliwe, sibyangawatikya n’ahake erilwa n’esyongumbu sy’omubiri.
Amaelezo awehikwa
^ Kinywa kwa kinywa, “abatebatalola oko busu bwaghe omo mubiri.”
^ Kutse “esiri.”
^ Kutse “amenge w’ekihugho.”
^ Ulebaye amaana w’ebinywa.
^ Kutse kandi, “Erilabira iye.”
