Ebaruha oko Abanya Kolosai 3:1-25
3 Neryo mwamabya imwabirilubukibwa na Kristo, simuleke erisondya emyatsi y’endata, eyo Kristo ikere oko luhande lw’amali lw’oMungu.
2 Mubye mukalengekania oko myatsi y’endata, butsira emyatsi eyiri oko kihugho.
3 Kundi mumwahola, n’engebe yenyu muyabiswa haghuma na Kristo omo bughuma n’oMungu.
4 Omughulu Kristo, engebe yetu, akendisyakanganibwa, nenyu mukendisyakanganibwa haghuma naye omo lukengerwa.
5 Neryo mwite ebitsuko by’oko mibiri yenyu eyiri oko kihugho kusudi simubye mukakola oburaghane,* emyatsi eyiterire, engumbu nene y’emyatsi y’engyingo, esyongumbu nyibi, n’omururu, owali ng’eriramya esanamu.
6 Emyatsi eyo ikaleka oMungu iniahitana kutsibu.
7 Nenyu ko mwabya mukayighendya mutya kera.
8 Aliwe lino, ritolere imwaleka erikola emyatsi yosi eyi: Erihitana, erikapikira, obubi, ebitsumi, isimwabya mukabugha emitububu.
9 Simubye mukatebana. Muleke* emibere ya kera n’emitsye yayo.
10 Aliwe, mubye* n’emibere mihya-mihya. Eriminya ekwenene ryo rikawatikaya omundu eryuwania emibere eyo, kusudi isosane n’emibere y’oMungu oyo wahangyikayo.
11 Ahali emibere mihya-mihya eyo, sihali Omugiriki kutse Omuyahudi, oyubanibwe kutse oyutabanibwe, omugheni, Omuskiti,* omukobe kutse oyuli bwiranda, aliwe Kristo ni myatsi yosi kandi omo byosi.
12 Neryo kundi muli abandu abasombolawa n’oMungu, ababuyirire n’abanzwa biwe, mubye n’olwanzo lw’ekwenene, n’erikwira abandi b’obulighe, n’omutima mubuya, eriyikehya, obolo, n’erihanda omutima.
13 Mubye mukavumiliana, n’erighanyirana omwanza, nomo omundu angabya n’ekyangaleka iniayilungumula busana n’ekyo oghundi alyamukolera. Ngoko Yehova* abaghanyira omwanza riwe, nenyu mubye mukaghanyirana omwanza.
14 Aliwe ekikulu oko myatsi yosi eyo, mwambale olwanzo, kundi olwanzo lukamatanaya abandu bosi bo ndeke-ndeke.
15 Kandi obuholo bwa Kristo butabale emitima yenyu, kundi mwabirikirawa mutoke eribya omo buholo obo, mutoke eribya mubiri mughuma kandi mubye mukasima.
16 Ekinywa kya Kristo kikanyirire omw’inywe n’eribaha amenge wosi. Mubye mukakangirirania n’erisikania mitima* omo syonyimbo, omw’ipipa oMungu, omo syonyimbo sy’obunya-kirimu esikimbawa n’omutima w’erisima. Mubye mukimbira Yehova* omo mitima yenyu.
17 Nomo mwangabughaki kutse nomo mwangakolaki, mukole ebyosi omo rina ry’Omukama Yesu, n’erisima oMungu Tata erilabira iye.
18 Inywe bakali, mubye mukowa abalume benyu, kundi muli bigha b’Omukama.
19 Inywe balume, simuleke eryanza abakali benyu kandi simukale kubo.
20 Inywe bana, mubye mukowa ababuti benyu omo myatsi yosi, kundi ekyo kikatsemesya Omukama.
21 Inywe bobaba, simubye mukahitania abana benyu bakasyabunika mutima.
22 Inywe bakobe, mubye mukowa abakama benyu b’oko kihugho. Simukole mutya omughulu abandu babalangire risa, busana tu n’eritsemesya abandu, aliwe mubye mukowa n’omutima wosi imunemusagha Yehova.*
23 Ebyosi ebyo mukakola, mukolebyo n’akaghala kenyu kosi.* Mubye nga mukakolera Yehova,* butsira abandu.
24 Kundi munasi ngoko Yehova* yukendisyabahemba omw’ibaha omwandu. Mukolere Omukama Kristo ng’abakobe.
25 Oko kwenene, oyukakola ebibi akendisyalihwa busana n’ebibi ebyo akola, kandi sihali kasololo.
Amaelezo awehikwa
^ Omo Kigiriki ni por·neiʹa. Ulebaye amaana w’ebinywa.
^ Kutse “mulusaye.”
^ Kutse “mwambale.”
^ Erina Omuskiti ryabya rikakolesibwa erihula abasenzi.
^ Ulebaye endomeko A5.
^ Kutse “n’erihanana.”
^ Ulebaye endomeko A5.
^ Ulebaye endomeko A5.
^ Kutse “n’enafsi yosi.” Ulebaye amaana w’ebinywa, “Enafsi.”
^ Ulebaye endomeko A5.
^ Ulebaye endomeko A5.
