Ebaruha oko Abanya Kolosai 4:1-18
4 Inywe bakama, mukolere abakobe benyu omo ritunganene, kandi mukolerebo ndeke, imunasi ngoko nenyu munawite Omukama elubula.
2 Isimwaleka erisaba. Omughulu mukakola mutya, muteghaye n’erisima oMungu.
3 Omughulu mukasaba, netu mutusabire kusudi oMungu atuhe akanya k’erihubirya ekinywa kiwe, n’erihubirya ekumbo* nyibuyirire eyilebirye Kristo eyikaleka inabohwa omo minyororo,
4 kandi kusudi nihubirayeyo ndeke-ndeke ngoko nitolere erikola.
5 Mubye mukayighendya n’amenge omughulu muli haghuma n’abandu abate b’omo ndeko. Mubye mukakolesya ndeke endambi yenyu.*
6 Mubye mukabugha ebinywa ebyuwene, ebirimo omunyu. Ekyo kikendibawatikya eriminya ngoko mwangasubirya obuli mundu.
7 Tikiko, mughala wetu mwanzwa, kandi omughombe mutaleghula, kandi oyo tukakola haghuma naye omubiiri w’Omukama, akendibabwira nga niri niti.
8 Ngamutuma eyo, kusudi muminye nga tune ndeke, kandi kusudi akiranaye emitima yenyu.
9 Anemwasa na Onesimo, mughala wetu mwanzwa, kandi mutaleghula. Ni w’ewenyu. Bakendibabwira emyatsi yosi eyikalaba eno.
10 Aristarko, oyuli omo muliki naghe, amabatumira obuholo. Na Mariko, omutunga* wa Barnaba, naye amabatumira obuholo, oyo twababwira tuti mukokaye ndeke amabyasa ewenyu.
11 Na Yesu, oyukahulawamo Yusto, naye amabatumira obuholo. Abosi aba ni b’oko babanibwe. Abo basa bo tukakola nabo omubiiri w’Obwami bw’oMungu, kandi bo bakanikiranaya kutsibu.
12 Epafrase, omughombe wa Kristo Yesu, ow’ewenyu, amabatumira obuholo. Akabya inianemubasabira kutsibu, kusudi mubye imunakulire bunya-kirimu, kandi kusudi muyiketere kundu ebyosi ebyo oMungu akendisyakola.
13 Ngabugha butsir’itika-tika ngoko anemukola kutsibu busana nenyu, kandi busana n’abalikyetu abali e Laodikia ne Hierapoli.
14 Luka, omunganga wetu mwanzwa, amabatumira obuholo, na Dema naye amabatumira obuholo.
15 Naghe namaramukya abaghala betu abali e Laodikia, na Nifa n’endeko eyikahindana omo nyumba yiwe.
16 Mukendibya mwabisoma ebaruha eno, muyikase itoke erisomwa n’omo ndeko y’Abanya Laodikia. Nenyu ngambe imwasoma ebaruha eyiryatumawa e Laodikia.
17 Kutya, mubwire Arkipo muti: “Uyikase erikola ndeke omubiiri ogho waligha erikolera Omukama.”
18 Ingye Paulo, ingye ngahandika omo byala byaghe ebinywa bino by’eribaramukya. Isimwibirirawa ngoko nibohirwe. Olukogho lw’oMungu lubye haghuma nenyu.
Amaelezo awehikwa
^ Kutse “esiri.”
^ Kinywa kwa kinywa, “Mubye mukaghula endambi.”
^ Kutse “omulumuna.”
