Ebaruha oko Abanya Roma 11:1-36
11 Neryo ngabulaya, oMungu abirighana abandu biwe kwe? Iyehe! Naghe niri Mwisraeli, omwana* wa Abrahamu, w’omo kihanda kya Benyamini.
2 OMungu syalyataleka abandu biwe abatsuka erisombola. Simwasi ebyo Amasako akabugha oko Eliya kandi ngoko mwasaba oMungu akamulemba-lemba busana ne Israeli?
3 Mwabugha ati: “Yehova,* babirita abaminyereri baghu. Babirihimbula ebiherero byaghu. N’ingye nikisiya, kandi lino banemusonda erinita.”*
4 OMungu mwamusubirya atiki? Mwamusubiriya ati: “Nikinawite abandu 7 000 abatitaramya Baali.”
5 Ko bine bitya na lino. Hali abandu bake ababirisombolwa busana n’olukogho lw’oMungu.
6 Byamabya ibiri bitya busana n’olukogho lw’oMungu, isitwangabugha tuti ni busana n’ebyo twakola. Aliwe, byamabya ini busana n’ebyo twakola, olukogho lw’oMungu isi lukogho.
7 Neryo, tubughe tutiki? Abaisraeli mubatabana ekyo babya bakasondya. Abaisraeli bake abasombolawa bo babanakyo. Abandi mubaghana eryowa.
8 Kyo kikaleka Amasako iniabugha ati: “OMungu abiribahira omo highotseri hinene. Neryo ameso wabo syangalangira, n’amatwi wabo syangowa erihika na munabwire.”
9 Na Daudi akabugha ati: “Ebisendebele* byabo bibye kitegho kw’ibo, neryo batoke eriwa ahisi, n’erihabwa amalipizi.
10 Ameso wabo abyemo mwirima, isibalangira, kandi bakondome busana n’eriheka emiheke eyilitohire.”
11 Neryo ngabulaya: Abayahudi babere babitera, mubalw’ibatera olosi? Iyehe! Aliwe, eritera ryabo muryaleka ab’ebindi bihanda ibasabuka. Ekyo kikaleka Abayahudi ibahitana.
12 Eritera ryabo muryaleka ekihugho ikyabana emiyisa. Erikeha ryabo rikaleka ab’ebindi bihanda ibabana emiyisa minene. Aliwe, omughulu abosi bakendisyahindanibwa, emiyisa ikendisyabya minene kutsibu.
13 Hano ngakanaya nenyu, inywe b’ebindi bihanda. Niri mukwenda w’ebindi bihanda. Neryo omubiiri ogho ngakolera oMungu ngalangiragho mo w’omughaso munene.*
14 Kandi niri n’amaha ngoko ekyo kyanganaleka Abaisraeli nga ngye ibahitana busana n’ekyo mwabiribana. Kandi kyanganaleka abaghuma ba kubo ibasabuka.
15 OMungu mwaghana Abaisraeli, n’ekyo mukyaleka abandu b’ebindi bihanda ibabya bira biwe. Neryo, amatasyaligha abaghuma b’oko Bayahudi, ekyo kiri ngakabalubukaya.
16 Akahande ako bakatsuka eritwa oko mukati ogho bakahereramo ebyalya by’erimbere kamabya ikabuyirire, ni bugha ambu omukati wosi abuyirire. Kandi omulihi w’omuti amabya iniabuyirire, ni bugha ambu emitahi y’omuti oyo nayo iyibuyirire.
17 Aliwe, hane emitahi milebe eyatahulawa oko muti. Neryo iwe nomo wanabya omuti w’omuzeituni w’omoli, muwamatikwa haghuma n’eyindi mitahi. Neryo lino unemubana endundi busana n’omulihi w’omuti w’omuzeituni.
18 Aliwe, isiwalengekanaya uti uwene kulenga eyindi mitahi eyo. Wamabilengekania utya, wibuke ngoko siwe uhekire omulihi. Aliwe omulihi w’akuhekire.
19 Abaghuma b’okw’inywe banganabugha bati: “Eyindi mitahi muyatahulwa naghe nitoke erimatikwa.”
20 Ekyo ni kwenene. Mubatahulwa busana n’eritendikirirya. Aliwe, iwe wimene busana n’obwikirya bwaghu. Neryo isiwayiheka, usaghe.
21 OMungu amabya imwatahula emitahi y’omuti w’omuzeituni, ukalengekanaya uti n’iwe akendilekaho?
22 Lebaya ngoko oMungu ni molo kandi akalire. Akalire oko bandu abatera busana n’eritendikirirya. Aliwe, wamabya ukakola ebikendileka iniakukangania obubuya bwiwe, iniakendibya molo okw’iwe. Wamatendikola utya, naghu ighukenditahulwa oko muti.
23 Aliwe, Abayahudi bamatsuka erikirirya, oMungu iniakenditasyabamatika oko muti kundi iye ali n’obutoki bw’erikola ekyo.
24 OMungu mwakutahula oko muzeituni w’omoli n’erikumatika oko muzeituni ow’akaherawa omo ririma. Emyatsi ko yitebya yitya. OMungu amabya imwatoka erikola atya, iniakendimatika bweghu-bweghu emitahi y’omuti w’omuzeituni ow’akaherawa omw’irima oko muti ogho yalusibawako.
25 Baghala betu, nanzire imwaminya ekumbo* nyibuyirire kundi ekyo kikendibawatikya eritendiyilangiramo b’amenge. Ekumbo eyo y’eno: Abaisraeli balebe babiribyamo erighundu. Bakendisyabya batya erihika oko mughulu oMungu akendisyabugha erisombola abosi b’omo bindi bihanda.
26 N’omo nzira eyo, Abaisraeli bosi bakendisyasabulwa, kundi Amasako akabugha ati: “Omusabuli akendisyalua e Sayuni n’eriwatikya abana ba Yakobo erileka obubi.
27 N’eyo yo ndaghane eyo ngendisyakola nabo omughulu ngendisyalusyaho amalolo wabo.”
28 Oko kwenene, Abayahudi balebe bakaghana eryowa engulu mbuya. Ekyo kyabirileka imwabana endundi. Aliwe, Abaisraeli babya bandu abo oMungu asombola. Kandi anzirebo busana n’abotata-kulu wabo.
29 OMungu syendisyayikubyabomo busana n’ebihembo ebyo abiriha omundu. Kandi oMungu amabirikira omundu, syangayikubyabomo.
30 Kusangwa kera isimulikola ebyo oMungu anzire. Aliwe lino, abiribaghanyira busana n’eritendyowa ry’Abayahudi.
31 Lino Abayahudi sibalikola ebyo oMungu anzire. Kandi oMungu abirikughanyira. Aliwe, nabo anganaghanyirabo ngoko abirikughanyira.
32 Kundi oMungu abirileka abandu bosi babye bakobe b’erikola ebyo atanzire. Akakola atya atoke erighanyira abandu bosi.
33 Emiyisa y’oMungu ni minene n’amenge wiwe ni manene kutsibu. Kandi asi emyatsi mingyi! Sitwangowa ndeke-ndeke ebyosi ebyo akasoha n’emikolere yiwe.
34 Kundi nindi yo wabiriminya amalengekania wa Yehova,* kandi nindi yo wangamuhana?
35 Kutse nindi yo watsuka eriha oMungu yo kindu kilebe, neryo ati oMungu alimo edeni yiwe?
36 Kundi ebindu byosi bikalua oko Mungu. Byahangyikawa naye, kandi ni biwe. Atolere olukengerwa kera na kera. Amina.
Amaelezo awehikwa
^ Kinywa kwa kinywa, “lubuto.”
^ Ulebaye endomeko A5.
^ Kutse “enafsi yaghe.”
^ Kinywa kwa kinywa, “Emesa.” Kutse “Esyofete.”
^ Kutse “ngapipa omubiri owo ngakolera oMungu.”
^ Kutse “esiri.”
^ Ulebaye endomeko A5.
