Ebaruha oko Abanya Roma 12:1-21
12 Baghala betu, kundi oMungu abiribakwira obulighe, ngabalemba-lemba muherere emibiri yenyu mo buhere obuliho, obubuyirire, kandi obo Mungu akatsemera. Kandi mukolesaye obwenge bwenyu mukamukolera.
2 Isimwakwama emibere y’abandu b’ekihugho kino.* Aliwe, muleke oMungu abindule amalengekania wenyu mutoke eriminya ebyo oMungu anzire, ni bugha ambu ebyuwene, ebitolere, n’ebihika-hikene.
3 Busana n’olukogho olo Mungu abirinikangania, ngabwira obuli mughuma w’okw’inywe niti isyayilangiramo w’omughaso munene kutsibu ngoko ate. Aliwe, abye n’amalengekania aw’atolere erikwamana n’olulengo lw’obwikirirya olo Mungu abirimuha.*
4 Omubiri ali n’ebitsuko bingyi. Aliwe, ebitsuko byosi ebi sibirikola omubiiri mughumerera.
5 Kutya, nomo tune bangyi, tuli mubiri mughuma kundi tuli omo bughuma na Kristo. Aliwe, obuli mundu ni kitsuko ky’ok’oghundi.
6 Itwe bosi tuwite ebihembo mbiriri-mbiriri erikwamana n’olukogho olo Mungu abiritukangania. Ekihembo kyetu kyamabya inibugha obuminyereri, tubughebo erikwamana n’obwikirirya obo tuwite.
7 Ekihembo kyetu kyamabya inikolera abandi, tuyikase erikolerabo. Ekihembo kyetu kyamabya inikangirirya, tuyikase erikangirirya ndeke.
8 Kutse ekihembo kyetu kyamabya inisubya abandi b’omutima,* tusubaye b’omutima.* Kutse ekihembo kyetu kyamabya inihitya,* tuhitaye n’omutima mughuma. N’oyukimanira,* akole atya n’omuhwa. N’oyukaghanyira, aghanyire n’obutseme.
9 Mwanze abandi omo kwenene. Mupone ebibi. Mumakirire ebyuwene.
10 Mwanzane ng’abasubeneko. Kandi mwanzane omo kwenene. Mubye b’erimbere* erisikya abandi.
11 Mukole n’omuhwa, simubye baghata. Ekirimu ky’oMungu kibahiremo omuhwa. Mukolere Yehova* n’omutima wosi.
12 Mutseme busana n’amaha. Muyiyinaye omo maligho. Mubye mukasaba mughulu wosi.
13 Mubye mukaha abandu b’oMungu ababiribulirwa. Mubye n’omubere w’erikokya abandi.
14 Mutsumule abakabaghalaya. Mutsumulebo, isimwatsumabo.
15 Mutseme haghuma n’abakatsema, mulire haghuma n’abakalira.
16 Mutsomane abandi ngoko muyitsomene. Isimwayiheka, aliwe muyikehaye. Isimwayilangira nga muli n’amenge kulenga abandu bosi.
17 Omundu amakukolera ekibi, naghu isiwamukolera ekibi. Mukole ebyo abandu bosi bakalangiramo bibuya.
18 Kyamatokekana oko luhande lwenyu, mubye omo buholo n’abandu bosi.
19 Balikyetu banzwa, simulihe ekibi oko kibi. Mulekerekyo erihitana ry’oMungu erikakola ebitunganene. Amasako akabugha ati: “‘Erituhulya ni ryaghe; n’ingye ngendisyalihabo,’ Yehova* atya.”
20 Aliwe, ekyo mukole kya kino: “Enzighu yaghu yamakwa enzala, iwahayo akalyo; yamakwa enyota iwahayo amaghetse. Wamakola ghutya, iwukendiswekya omundu oyo n’eryolobya omutima wiwe.”*
21 Sighuleke ekibi kikakusinga, aliwe usinge ekibi ky’omo kibuya.
Amaelezo awehikwa
^ Kutse “b’oko mughulu ono.” Ulebaye amaana w’ebinywa.
^ Kutse “abirimughabira.”
^ Kutse “inihana abandi.”
^ Kutse “ahanebo.”
^ Kutse “inighabira abandi.”
^ Kutse “N’oyukasondola.”
^ Kutse “Mwanguhe.”
^ Ulebaye endomeko A5.
^ Ulebaye endomeko A5.
^ Kinywa kwa kinywa, “iwamalunda amakala w’omuliro oko mutwe wiwe.”
