Ebaruha oko Abanya Roma 14:1-23
14 Mukokaye omundu oyo bwikirirya bwiwe sibuwatire. Aliwe, isiwabugha muhanda oko abawite amalengekania awatasosene n’awaghu.*
2 Hane omundu oyukalya akalyo kosi kundi obwikirirya bwiwe buwatire. Aliwe, hane oghundi oyukalya esyomboka sy’ebiti nyisa kundi obwikirirya bwiwe sibuwatire.
3 Omundu oyukalya akalyo kosi syatswebe oyuterya akalyo kosi. N’oyuterya akalyo kosi syatswebe oyukalya akosi. OMungu abiriligha omundu oyo.
4 Ulindi iwe ukatswera omughombe w’oghundi mundu? Omukama wiwe yukaminya omundu oyo ng’ali n’amakosa, kutse iyehe. Yehova* yukamuwatikaya eribya inianimene.
5 Hane abakalengekanaya bati ekiro kilebe kilengire ebindi. N’abandi bakalengekanaya bati ebiro byosi ni bighumerera. Obuli mundu ikiriraye ndeke ebiri omo mutima wiwe.
6 Abakalengekanaya bati ekiro kilebe kilengire ekindi bakakola batya busana n’erisikya Yehova.* N’abakalya akalyo kosi bakalyako busana n’erisikya Yehova.* Kundi bakasima oMungu busana n’akalyo ako. N’abaterya akalyo kosi nabo bakasikaya Yehova,* kandi bakamusima.
7 Sihali n’omughuma w’okw’itwe oyukabyaho busana naye iyuwene. Kandi sihali n’omughuma w’okw’itwe oyukahola busana naye iyuwene.
8 Twamabyaho, tukabyaho busana na Yehova.* Kandi twamahola, tukahola busana na Yehova.* Neryo, nomo twangabyaho, kutse nomo twangahola, tuli bandu ba Yehova.*
9 Ekyo kyo kyaleka Kristo iniahola n’erilubuka, atoke eribya mukama w’abaliho n’abaholire.
10 Neryo busanaki ukabugha muhanda oko* mulikyenyu? Kutse busanaki ukatsweba mulikyenyu? Itwe bosi tukendesyimana embere sy’ekitumbi ky’eritswera ky’oMungu. Akendisyatutswera itwe bosi.
11 Kundi Amasako akabugha ati: “Yehova* akabugha ati: ‘Oko kwenene-kwenene ngoko niriho, obuli mundu akendisyakukama embere syaghe, n’obuli mundu akendisyaminya ngoko niri Mungu.’”
12 Neryo obuli mundu akendisyatonda embere sy’oMungu busana n’ebyo akola.
13 Kwesi tuleke eribya tukabugha muhanda oko bandi, aliwe tuyikase eritendikola emyatsi eyangatsandya obwikirirya b’omulikyetu kutse eyangaleka iniatera.
14 Nikirirye kundu omo Mukama Yesu ngoko sihali akalyo akatuwene. Aliwe, omughulu omundu akalengekanaya ati akalyo ako sikuwene, aho isyatolere eriryako.
15 Omulikyenyu amapona busana n’akalyo ako ukalya, aho isighutamukolera omo lwanzo. Kristo mwatakuholera iwuwene, mwaholera n’omundu oyo. Isiwatsandaya obwikirirya bwiwe busana n’akalyo kaghu.
16 Isiwakola emyatsi eyangaleka omundu iniabugha muhanda oko myatsi mibuya eyo ukakola.
17 Ekyo omundu akalya kutse erinywa si kyo kikendisyaleka inyingira omo bwami b’oMungu. Eky’omughaso ry’erikola ebitunganene, erikwamirira obuholo, n’eribya n’obutseme erilabira ekirimu kibuyirire.
18 Kundi obuli mughombe wa Kristo oyukakola ebyo akatsemesaya oMungu, n’abandu bakamwanza.
19 Kwesi ritolere itwayikasa eribya omo buholo n’abandi, n’erisikania mitima.
20 Uleke eritsandya omubiiri w’oMungu busana n’akalyo. Ni kwenene, akalyo kosi kuwene. Aliwe, sikyuwene erirya akalyo akangaleka obwikirirya bw’omulikyenyu ibwatsanda.
21 Kyuwene eritendirya enyama, kutse eritendinywa edivai, kutse eritendikola ekyosi-kyosi ekyangaleka obwikirirya bw’omulikyenyu ibwatsanda.
22 Ebyo wikirirye oko myatsi eyiri ng’eyo bikulebirye iwe n’oMungu. Omundu oyuteyowa ng’abirikola ekosa busana n’erikola ekyo asi ngoko kyuwene atsemire.
23 Omundu amatika-tika busana n’akalyo kandi inialyako,* aho iniamabikola erilolo. Biri bitya kundi mwakalyako inianemutika-tika. Ekyosi-kyosi ekyo tukakola itunemutika-tika ni rilolo.
Amaelezo awehikwa
^ Kutse kandi, “abakayibulaya amabulyo omo mutima.”
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Ulebaye endomeko A5.
^ Kutse “ukatswera.”
^ Ulebaye endomeko A5.
^ Kutse “amalya kalyo butsir’ikiririrya.”
