Ebaruha oko Abanya Roma 15:1-33
15 Itwe tuwite amaka, ritolere itwawatikya abatawitegho. Isitwabya tukakola emyatsi eyangatutsemesya itw’ibene basa.
2 Obuli mundu ayikase erikola emyatsi eyikenditsemesya omulikyabo. Kandi amukolere ebyuwene ebikendimusikya mutima.
3 Nibya na Kristo naye mwatakola emyatsi eyabya yikamutsemesya iyuwene musa. Ngoko Amasako akabugha ati: “Ebitsumi by’abandu ababya bakakutsuma mubyanihikako.”
4 Kundi emyatsi yosi eyahandikawa kera omo Masako yahandikawa busana n’eritukangirirya. Kandi tuli n’amaha kundi Amasako akatuwatikaya eriyiyinia, n’eritusikya mutima.
5 OMungu oyukawatikaya abandu eriyiyinia n’eribasikya mutima, abawatikaye eribya n’amalengekania awali ng’owo Kristo abya nagho.
6 Ekyo kikendibawatikya eripipa oMungu, Tata w’Omukama wetu Yesu Kristo, omo bughuma.
7 Mubye mukakokya abandi ngoko Kristo abiribakokya. Ekyo kikaleka oMungu iniapipwa.
8 Ngababwira niti Kristo abya mughombe w’Abayahudi atoke eribakangania ekwenene y’oMungu, n’erikangania ngoko ebyo oMungu alagha abotata-kulu wabo ni by’ekwenene.
9 Kandi byabya bitya abandu b’ebihanda batoke eripipa oMungu busana n’obughanyiri bwiwe. Kundi Amasako akabugha ati: “Busana n’ekyo, ngendisyakupipa omo kati-kati k’ebihanda, n’eripipa erina ryaghu.”
10 Kandi oMungu akabugha ati: “Inywe bandu b’ebihanda mutseme haghuma n’abandu biwe.”
11 Kandi Amasako akabugha ati: “Inywe bihanda byosi mupipe Yehova,* n’abandu bosi bamupipe.”
12 Kandi Isaya akabugha ati: “Hakendisyabya omulihi wa Yese, oyo yukendisyahangana n’eritabala ebihanda. N’ebihanda bikendisyayiketera iye.”
13 OMungu oyukaha amaha abawatikaye eribya n’obutseme bosi n’obuholo omughulu mukayiketera iye. Kwenene, ekirimu kibuyirire kibawatikaye eribya n’amaha manene, n’akaghala kanene.
14 Baghala betu, nikirirye ngoko mwanzire erikola ebibuya, ngoko mwasi myatsi minene, kandi ngoko mwasi eriwatikania omo mahano.
15 Aliwe, omo baruha eyo ngabahandikira, ngakanaya butsir’ibisa oko myatsi milebe. Ngakola nitya busana n’eribibukyayo kundi oMungu abirinikangania olukogho lwiwe.
16 Niri mughombe wa Kristo Yesu, natumawa oko bandu b’ebihanda. Ninemukola kutsibu omubiiri mubuyirire w’eritulaghania engulu mbuya y’oMungu. Ngakola nitya abandu b’ebihanda batoke eribya ekihembo ekikatsemesaya oMungu, ekihembo ekyo kirimu kibuyirire kyabiriyiramo kibuyirire.
17 Ngatsema eribya mwigha wa Kristo Yesu n’erikola omubiiri w’oMungu.
18 Sinendikania oko mwatsi wosi-wosi ogho nabirikola. Aliwe, ngendikania risa oko mwatsi ogho Kristo abirikola n’ebinywa ebyo anituma ati nibughe busana n’eriwatikya abandu b’ebindi bihanda bamwowe.
19 Mubowa busana n’ebitiko-tiko n’emyatsi y’eriswekya eyakolawa n’ekirimu ky’oMungu. Neryo nabiritula ndeke-ndeke engulu mbuya eyilebirye Kristo erilua e Yerusalema erihika e Ilirikamu.
20 Sinabyangasondya eritula engulu mbuya omo biharo ebyo abandu babiriminyamo Kristo. Kundi sinabyananzire erihimba oko fondasyo y’oghundi mundu.
21 Kyo kikaleka Amasako iniabugha ati: “Ababya isibalibatabwirwa emyatsi okw’iye bakendisyamulangira. N’ababya isibalibatowa bakendisyowa.”
22 Ekyo kyo kyaleka kangyi-kangyi inataluka eryasa eyo muli.
23 Aliwe lino, nabiribugha erihubirya omo biharo bino. Neryo omo myaka minene* nabya inanzire erisyababana.
24 Neryo omughulu ngendiya e Hispania, niri n’amaha ngoko ngendibalolako. Tukendibya twabitsanga omo mughulu mulebe, nikirirye ngoko mukendinikwamanisya hake ngalola e Hispania.
25 Aliwe lino, ngasonda eriya e Yerusalema nitoke eriwatikya ababuyirire abaliyo.
26 Abalikyetu abali e Makedonia ne Akaya mubakatsema kutsibu eriteka ekihembo busana n’eriwatikya abera abali omo kati-kati k’abandu b’oMungu be Yerusalema.
27 Abalikyetu abo mubatsema erikola ekyo kundi babyamo edeni y’ababuyirire be Yerusalema. Byabya bitya kundi abalikyetu be Yerusalema babya ibabiriwatikyabo bunya-kirimu. Neryo abalikyetu abo babyamo edeni y’eriwatikya kinya-mubiri abalikyetu be Yerusalema.
28 Ngendibya nabibatwalira ekihembo ekyo, inalola e Hispania. Neryo tukendisungana ngalolayo.
29 Ninasi ngoko omughulu ngendyasa eyo muli, ngendibaletera emiyisa minene eyikalua oko Kristo.
30 Baghala betu, omo rina ry’Omukama wetu Yesu Kristo, n’erilabira olwanzo olukalua oko kirimu kibuyirire, ngabalemba-lemba niti, ingye nenyu tusabe oMungu busana naghe.
31 Munisabire kusudi abandu abatikirirye abe Yudea isibanikola muhanda. Kandi musabe ekihembo kino ekyo ngatwalira abandu b’oMungu e Yerusalema kitoke eritsemesyabo.
32 Neryo oMungu amanza, ingendyasa n’obutseme bunene, kandi itukenditsema haghuma.
33 OMungu oyukaha obuholo abye haghuma n’inywe bosi. Amina.
