Ebaruha oko Abanya Roma 16:1-27
16 Ngabasaba niti mukokaye mwali wetu Foibe, akakolera omo ndeko ye Kengrea.
2 Ngabasaba niti mumukokaye ngoko ababuyirire b’Omukama batolere erikokibwa. Mumuhe ekyosi-kyosi ekyo alaghireko, kundi abiriwatikya abandu bangyi, naghe kutya.
3 Muramukaye Prisila na Akila, abakakola naghe omo mubiiri wa Kristo.
4 Mubahira amaisa wabo omo hatari busana naghe.* Ingye n’esyondeko syosi sy’abandu abate Abayahudi tukasima Prisila na Akila.
5 Kandi muramukaye endeko eyikahindana omo nyumba yabo. Muramukaye omwanze waghe Epeneto. Ni mughuma w’oko batsuka erikwama Kristo omo Azia.
6 Muramukaye Maria, oyo wabirikola kutsibu busana nenyu.
7 Muramukaye Androniko na Yunia, abo ni batunga baghe. Kandi babya omo muliki haghuma naghe. Abakwenda basibo ndeke-ndeke. Kandi mubatsuka erikwama Kristo embere syaghe.
8 Muramukaye Ambliato, omwira waghe mwanzwa omo Mukama.
9 Muramukaye Urbano, oyukakola haghuma netu omo mubiiri wa Kristo. Kandi muramukaye omwira waghe mwanzwa, ye Staki.
10 Muramukaye Apele, omughombe mutaleghula wa Kristo. Muramukaye ab’omo kihanda kya Aristobulo.
11 Muramukaye omutunga waghe, Herodio. Muramukaye ab’omo kihanda kya Narsise, abakakwama Omukama.
12 Muramukaye Trifene na Trifoza, abakali abakakolera Omukama yo kutsibu. Muramukaye Persi, omwanze waghe, kundi naye abirikolera Omukama yo kutsibu.
13 Muramukaye Rufu, asombolawa n’Omukama. Muramukaye mama wiwe, oyo abiribya mama waghe.
14 Muramukaye Asingrito, Fulego, Herme, Patroba, Herma, n’abaghala betu abali haghuma nabo.
15 Muramukaye Filologo na Jili, Nereo na mwali wabo, Olimba n’abandu bosi b’oMungu abali haghuma nabo.
16 Muramukanaye omo lwanzo.* Esyondeko syosi sya Kristo syamabaha obuholo.
17 Nikwa baghala betu, ngabasaba niti mulebaye ndeke abakahiraho erighabana omo kati-kati kenyu, n’eritsandya obwikirirya bw’abandi, emyatsi eyitahambene n’ebyo mwabirikangiriribwa. Muyihighule okw’ibo.
18 Kundi abandu abo si bakobe b’Omukama wetu Kristo, ni bakobe b’esyongumbu syabo. Bakateba abandu omo hinywa ehisihire n’ehirimo ekisehya.
19 Aliwe, obuli mundu anasi ngoko mukowa. N’ekyo kikaleka inatsema kutsibu. Nanzire imwabya n’amenge n’erikola ebyuwene. Isimwabya n’olubanza, kandi isimwakola ebituwene.
20 Hakisiya hake oMungu oyukaha obuholo iniahira Sitani eyikwa w’ebisando byenyu n’erimutoghotya. Omukama wetu Yesu abakanganaye olukogho lwiwe.
21 Timoteo, oyo tukakola naye, amabatumira obuholo. Lukio, Yasoni, na Sosipatere, nabo bamabaha obuholo. Abo ni batunga baghe.
22 Ingye Tertio, oyo wahandika ebaruha eno, namabaramukya omo Mukama.
23 Gayo, oyukanikokaya, n’oyo endeko ikahindana omwiwe, amabaha obuholo. Erasto, oyukalebaya emyatsi y’esyofranga sy’omuyi, amabaha obuholo. Mughala wabo ye Kwarto, naye amabaha obuholo.
24 * ——
25 OMungu akendibaha amaka erilabira engulu mbuya eyo ngatulaghanaya n’erilabira engulu eyilebirye Yesu Kristo. Engulu eyi yabisulawa erilabira ekumbo* nyibuyirire eyabya iyabiribiswa erilua kera-kera.
26 Aliwe lino, amaminyereri awali omo Masako abiritukangania ekumbo* eyo, n’erituwatikya eriminyayo. OMungu wetu oyuliho kera na kera mwabugha ati ekumbo nyibuyirire iminyisibawe oko bandu b’ebihanda batoke eryowa n’erikirirya.
27 OMungu oyuwite amenge iyuwene musa, ahabawe olukengerwa kera na kera erilabira Yesu Kristo. Amina.
Amaelezo awehikwa
^ Kutse “enafsi yaghe.”
^ Kinywa kwa kinywa, “omo beze nyibuyirire.”
^ Ulebaye endomeko A3.
^ Kutse “esiri.”
^ Kutse “esiri.”
