Ebaruha oko Abanya Roma 3:1-31
3 Eribya Muyahudi riri n’endundi yahi? Kutse eribanibwa riri n’endundi yahi?
2 Hali endundi nene! Ekikulu omo byosi, Abayahudi bo Mungu aha ebinywa biwe bibuyirire.
3 Aliwe, tubughe tutiki abaghuma bakubo bamabya imo batakangania obwikirirya? Ekyo kyanganaleka itwabugha tuti oMungu syatunganene?
4 Kobite bitya! Nomo obuli mundu angabya mubehi, oMungu iye ni w’ekwenene. Kusangwa Amasako akabugha ati: “Ebinywa byaghu bikendisyakangania nga utunganene kutse iyehe. Kandi ukendisyasingana omughulu ukendisyatswerwa.”
5 Omughulu tukakola ebitatunganene, ekyo kikakanganaya ngoko oMungu atunganene. Neryo, twanganabugha tuti oMungu ni mubi omughulu akatuha amalipizi? (Ngabugha ngoko abandu bakalengekanaya.)
6 Iyehe! oMungu si mubi. Amabya ini mubi, iniakendisyatswera ati ekihugho?
7 Kandi, amabehi waghe amabya iniakaleka ekwenene y’oMungu iyalangirika ndeke n’erileka iniasikibwa kutsibu, abandu balebe ibanganabugha bati: ‘Busanaki ngalangirawamo mukola-nabi?’
8 Nakandi busanaki sitwangabugha tuti: “Tukole ebibi tutoke eribana ebyuwene?” Abandi bakatulegha bati tukabugha tutya. Abandu abakabugha emyatsi eyo bakendisyatswera omo ritunganene.
9 Twanganabugha tuti itwe Bayahudi tulengire abandi? Iyehe! Kundi ngoko twabirikangania, Abayahudi n’Abagiriki, abosi bakakola amalolo.
10 Ngoko Amasako akabugha ati: “Sihali n’omundu n’omughuma omutunganene.
11 Sihali n’omundu n’omughuma oyuwite amenge, sihali n’omundu n’omughuma uyukasonda-sonda oMungu.
12 Abandu bosi babirisighania oMungu. Abandu bosi babiribya bandu bule. Sihali n’omundu n’omughuma oyukakola ebibuya.”
13 “Ebinywa byabo bikiita. Bakabugha amabehi.” “Ebyo bakabugha biri ng’esumu y’esyonzoka.”
14 “Obuno bwabo buswiremo ebitsumi n’ebinywa ebikahitanaya.”
15 “Ni batsibu kandi ni biiti.”*
16 “Ebyosi ebyo bakakola bikiita abandi b’obulighe n’eribaghalya.
17 Sibasi eribya omo buholo n’abandi.”*
18 “Sibalisagha oMungu.”
19 Tunasi ngoko ebyosi ebyo Emighambo ikabugha bilebirye abakakwama Emighambo. Emighambo yahirawaho abandu isibabana eby’eriyihambulisaniamo. Kandi, yahirawaho busana n’erikangania ngoko abandu bosi bali n’amakosa embere sy’oMungu. Nakandi yahirawaho busana n’erikangania ngoko batolere amalipizi.
20 Neryo sihali omundu n’omughuma oyukendisyaghanzwamo mutunganene busana n’erikwama Emighambo. Aliwe, Emighambo yikatuwatikaya eriminya erilolo nga niki.
21 Aliwe lino, oMungu anganakulangiramo mutunganene nibya isighulikwama n’Emighambo ya Musa, ngoko Emighambo n’Abaminyereri babugha.
22 Abosi abakikiriraya Yesu Kristo bo Mungu akalangiramo batunganene. Kundi sihali ekihanda ekilengire ekindi.
23 Abosi babirikola erilolo. Neryo sibangatoka erikangania ndeke-ndeke emibere mibuya y’oMungu.
24 OMungu abirilangirabo mo batunganene omw’ikanganiabo ulukogho lwiwe erilabira embanulo eyo Kristo Yesu aliha. Ekyo ni kihembo ekyo akabaha buyira.
25 OMungu mwatuha Yesu abye kihembo ky’erituwatikya erisuba omo bughuma naye twamabikirirya ngoko Yesu muta omusasi wiwe busana netu. OMungu mwakola ekyo eritukangania ngoko atunganene. OMungu akahanda omutima omwitughanyira amalolo agho twakola kera.
26 Kandi akatukanganaya lino ngoko atunganene omughulu akalangira oyukikiriraya Yesu mo mundu oyutunganene.
27 Neryo hane ekyangaleka itwayihalamba? Iyehe. Twanganayihalamba kundi tukakwama Emighambo? Iyehe. Aliwe, twanganayihalamba busana n’obwikirirya.
28 Kusangwa tunasi ngoko oMungu akalangira omundu mo mutunganene busana n’obwikirirya, butsira busana n’erikwama ebiri omo Mighambo.
29 Kutse twanganabugha tuti oMungu ni Mungu w’Abayahudi basa? Si Mungu w’abandu b’ebihanda byosi nabo kwehi? Oko kwenene, ni Mungu w’abandu b’ebihanda byosi.
30 Kundi hali oMungu mughuma musa, ababanibwe n’abatabanibwe, abosi oMungu akendisyalangirabo mo batunganene busana n’obwikirirya bwabo.
31 Neryo twanganabugha tuti obwikirirya bwetu bukaleka Emighambo iyabya bule? Iyehe! Aliwe, tukasikaya Emighambo.
Amaelezo awehikwa
^ Kinywa kwa kinywa, “Ebisando byabo byanguhire eryuta omusasi.”
^ Kinywa kwa kinywa, “Sibasi enzira y’obuholo.”
