Ebaruha oko Abanya Roma 4:1-25
4 Neryo tubughe tutiki oko tata-kulu wetu Abrahamu?
2 Abrahamu amabya imwalangirwamo mutunganene busana n’ebyo akola, angabere n’ebyangalekire iniayihalamba. Aliwe, isyangayihalamba embere sy’oMungu.
3 Erisako rikabugha ritiki? Erisako rikabugha riti: “Abrahamu mwikirirya ebyo Yehova* abugha, neryo mwalangirwamo mutunganene.”
4 Omughulu omundu akakola omubiiri, akahabawa omusahara. Omusahara oyo si kihembo, aliwe ni kindu* eky’atolere erihabwa.
5 Tubughe tuti omundu syalikola omubiiri, aliwe ikirirye ebyo oMungu akabugha. OMungu akalangira omundu oyo mo mutunganene busana n’obwikirirya bwiwe, kundi iye musa yo wangaghanza omubi mo mutunganene.
6 Ekyo kyo Daudi abugha omughulu akanaya oko butseme ob’omundu akabana omughulu oMungu akamulangiramo mutunganene, nomo omundu oyo syalangirwemo mutunganene busana n’emikolere yiwe.
7 Mwabugha ati: “Abo oMungu abirighanyira obubi bwabo n’eribirirwa amalolo wabo batsemire.
8 Omundu oyo Yehova* ateghanzira erilolo atsemire.”
9 Twanganabugha tuti ababanibwe basa bo batsemire? Kutse n’abatabanibwe nabo banatsemire? Ngabulaya nitya kundi twabiribugha tuti: “Abrahamu mwalangirwamo mutunganene busana n’obwikirirya bwiwe.”
10 Omughulu Abrahamu alangirawamo mutunganene busana n’obwikirirya bwiwe, abya omo hali eyiri yiti? Abya iniabiribanibwa kutse isyalyabanibwa? Abya isyalyabanibwa.
11 Enyuma sy’aho, oMungu mwamubwira ati abanibawe. Ekyo kyakanganaya* ngoko abya atunganene busana n’obwikirirya obo akanganaya isyalyabanibwa. Ekyo kyabya kitya, atoke eribya baba w’abosi abakikiriraya isibebabanibwa. Neryo oMungu angabalangiremo abatunganene.
12 Neryo kandi mwabya baba w’ababanibwe. Aliwe si baba w’ababanibwe basa, nikwa kandi ni baba w’abakakwama ndeke-ndeke obwikirirya obo baba wetu Abrahamu abya nabo isyalyabanibwa.
13 OMungu mwalagha Abrahamu ati akendisyahabwa ekihugho mo mwandu. Mwatamulagha atya kundi abya akakwama emighambo. Mwamulagha atya kundi mwabya omundu oyutunganene erilabira obwikirirya bwiwe.
14 OMungu amabya iniakaha esyondaghane siwe sy’abakakwama Emighambo basa, obwikirirya isibuwite omughaso, n’ebyalagha Abrahamu ibiri bule.
15 Tunasi ngoko wamabitaruka oko Mughambo, ukahabawa amalipizi. Aliwe hamabya isihali Omughambo, sihangabya ekosa.
16 Ekyo kyo kikaleka itwabana esyondaghane sy’oMungu, erilabira obwikirirya kundi ni kihembo ekyo oMungu akatuha buyira. Eby’oMungu alagha bikendisyabererera oko lubuto losi lwa Abrahamu, butsira oko bakasikaya emighambo basa, aliwe n’oko bali n’obwikirirya obuli ng’obwa Abrahamu. Abrahamu yo tata wetu itwe bosi.
17 (Kundi Amasako akabugha ati: “Nabirikuyiramo tata w’ebihanda bingyi.”) Abrahamu mwikirirya ebyo oMungu amubwira. OMungu oyo yukalubukaya ababirihola n’erikania oko myatsi eyiteyatabya nga yabiribya.*
18 Abrahamu abya isyalilengekanaya ati anganabuta. Aliwe, eribya n’amaha moryaleka inyikirirya ngoko akendisyabya tata w’ebihanda bingyi erikwamana n’ebyo oMungu amubwira. OMungu mwamubwira ati: “Olubuto lwaghu ko lukendisyabya lutya.”
19 Nomo obwikirirya bwiwe bwabya ibunawatire, abya iniakalengekanaya ati syangasyabuta* (kundi abya n’emyaka hakuhi 100). Kandi abya inianasi ngoko Sara abirikekeluha, syangasyabuta.
20 Aliwe, busana n’ebyo oMungu amulagha, mwatatika-tika kutse eribula obwikirirya. Obwikirirya bwiwe mubwamuha akaghala, neryo mwapipa oMungu.
21 Abya inyikirirye kundu ngoko oMungu syangataluka erikola ebyo amulagha.
22 Neryo, busana n’obwikirirya bwiwe, “oMungu mwamulangiramo mutunganene.”
23 Nikwa, ebinywa “mwamulangiramo” sibyahandikawa busana naye musa.
24 Aliwe, byahandikawa busana netu kutya. Netu tukendisyalangirwamo batunganene kundi twikirirye oMungu oyo walubukaya Yesu Omukama wetu.
25 Yesu mwitibwa busana n’amalolo wetu, kandi oMungu mwamulubukya tutoke erighanzwamo batunganene.
Amaelezo awehikwa
^ Ulebaye endomeko A5.
^ Kutse “edeni.”
^ Ulebaye endomeko A5.
^ Kutse “ekyo kyabya kiminyikalo.”
^ Kutse kandi, “oyukahiraho ebitebyabyaho.”
^ Kutse “ni mughumba.”
