Ebaruha oko Abanya Roma 6:1-23
6 Neryo, tubye tukakola amalolo kusudi oMungu atukanganaye olukogho lwiwe lunene?
2 Iyehe! Twabirileka erikola amalolo, neryo sikyuwene eribeghera erikolagho.
3 Simwasi ngoko itwe bosi, itwe twabiribatisibwa omo Kristo Yesu, twabatisibawa n’omo luholo lwiwe?
4 “Mutwatabwa” haghuma naye omughulu twabatisibawa omo luholo lwiwe. Tata mwakolesya obutoki bwiwe bw’olukengerwa erilubukya Kristo atoke eribya n’amaisa mahya-mahya. Kyo kikaleka netu lino itwabya n’amaisa mahya-mahya.
5 Tuli omo bughuma naye kundi tukahola nga ye. Kandi tukendisyabya omo bughuma naye kundi tukendisyalubukibwa nga ye.
6 Tunasi ngoko emibere yetu ya kera yabirikongomererwa haghuma naye oko muti tutoke erilusya amaka w’erilolo omo mubiri wetu. Siritolere eritasyabya bakobe b’erilolo.
7 Omundu oyo wabirihola abirisangulwako* erilolo riwe.
8 Twabirihola haghuma na Kristo, kandi twikirirye ngoko tukendisyabyaho haghuma naye.
9 Tunasi ngoko Kristo syangasyahola kundi abirilubukibwa, oluholo silwangasyamutoka.
10 Mwahola kaghuma kasa atoke erilusyaho erilolo. Neryo lino, aliho busana n’erikola erisonda ry’oMungu.
11 Nenyu kutya muyilangiremo baholi oko mwatsi w’erikola erilolo. Aliwe kundi muli bigha ba Kristo Yesu, muyilangiremo abaliho oko mwatsi w’erikola erisonda ry’oMungu.
12 Simuleke erilolo rikabatabala. Simukwame esyongumbu sy’omubiri wenyu owakahola.
13 Isimwakolesaya emibiri yenyu erikola erilolo, isiyabya ng’ebindu by’erikolamo ebibi. Aliwe, muyiherere oko Mungu ng’abandu ababirilubuka. Muherere oMungu emibiri yenyu, ibye ng’ebindu by’erikolamo ebyuwene.
14 Erilolo siribatabale kundi simukisabirwe erikwama Emighambo. Aliwe lino, mutsemere olukogho lw’oMungu.
15 Ekyo ni bugha ambu tukole erilolo kundi oMungu abiritukangania olukogho lwiwe kandi kundi situkisabirwe erikwama Emighambo? Iyehe!
16 Simwasi ngoko mwamabya mukakwama ekyo mundu mulebe akabugha, mukabya imukayiyiramo bakobe biwe? Kutse imwabya abakobe b’erilolo erikakolaya oko luholo, kutse imwabya bandu abakowa kundi eryowa rikaleka omundu iniabya oyutunganene.
17 Tukasima oMungu kundi nomo mwanabya bakobe b’erilolo, lino mukowa n’omutima wosi ebyo mwakangiriribawa.
18 Mwabere mwabilusibwa omo bukobe bw’erilolo, mumwabya bakobe b’eritunganene.
19 Ngabugha emyatsi eyo bandu basi kundi simuhika-hikene. Mwabya mubeghere esyongumbu sy’omubiri wenyu eribayiramo bakobe b’erikola emyatsi eyiterire n’emibi. Neryo lino, ritolere imwakwama esyongumbu esyangabayiramo bakobe b’erikola ebitunganene n’ebibuyirire.
20 Kundi omughulu mwabya bakobe b’erilolo, simwabya musabirwe erikola ebitunganene.
21 Mumwakolaki oko mughulu oyo? Mumwakola emyatsi eyo lino mukakwira esisoni. N’emyatsi eyo ikakolaya oko luholo.
22 Aliwe lino, kundi mwabirilusibwa omo bukobe bw’erilolo, mukole ebibuyirire kundi muli bakobe b’oMungu. Mwamabikola ekyo, imukendisyabana engebe ya kera na kera.
23 Kundi omusahara w’erilolo ni luholo. Aliwe, ekihembo eky’oMungu akatuha ni ngebe ya kera na kera erilabira Kristo Yesu Omukama wetu.
Amaelezo awehikwa
^ Kutse “abirighanyirwa, abirilusibwako.”
