Ebaruha oko Abanya Roma 8:1-39
-
Ekirimu kyo kikatuha engebe n’obwiranda (1-11)
-
Ekirimu kyo kikakanganaya omundu ngoko ni mwana w’oMungu (12-17)
-
Ebihangyikwa binemulindirira olukengerwa lw’abana b’oMungu (18-25)
-
‘Ekirimu ky’oMungu kikatubughira’ (26, 27)
-
OMungu mwasombola embere abakendisyabya ng’Omughala wiwe (28-30)
-
Tukakinda busana n’olwanzo lw’oMungu (31-39)
8 Neryo abali omo bughuma na Kristo Yesu sibali n’olubanza.
2 Lino omughambo w’ekirimu owakakuha engebe, iwe ukakwama Kristo Yesu, abirikulusya omo bukobe bw’erikwama omughambo w’erilolo n’ow’oluholo.
3 Emighambo ya Musa muyitatoka erikulusya omo bukobe kundi abandu sibahika-hikene. OMungu mwatoka eribalusya omo bukobe omughulu atuma Omughala wiwe omo mubiri owasosire ow’abandu abakakola amalolo atoke eribalusya omo rilolo. Neryo oMungu mwatswera erilolo eriri omo mubiri.
4 Byabya bitya tutoke erikola ebitunganene ebiri omo Mighambo, butsir’ikwama omubiiri wetu w’amalolo, aliwe erileka ekirimu kitusondole.
5 Abakakwama omubiri bakalengekanaya oko myatsi y’ekinya-mubiri. Aliwe, abakakwama ekirimu bakalengekanaya oko myatsi eyo kirimu kyanzire ibakola.
6 Erihira amalengekania oko mubiri rikatwala oko luholo. Aliwe, erihira amalengekania oko kirimu rikakolaya oko ngebe n’obuholo.
7 Twamabileka omubiri wetu w’amalolo akasondola amalengekania wetu, itukendibya nzighu sy’oMungu. Omubiri wetu w’amalolo syalisikaya emighambo y’oMungu, kandi syangatoka erisikyayo.
8 Abakakwama omubiri wabo w’amalolo sibangatsemesya oMungu.
9 Aliwe balikyetu, inywe simulikwama omubiri wenyu w’amalolo. Oko kwenene, ekirimu ky’oMungu kyamabya ikine emwisi syenyu, imukendikwama obusondoli bwakyo. Omundu amabya isyali n’ekirimu kya Kristo, omundu oyo isi mundu wa Kristo.
10 Aliwe, mwamabya imukakwama Kristo, omubiri wenyu aholire busana n’erilolo, aliwe ekirimu kikabaha engebe kundi mukakola ebitunganene.
11 Ekirimu ky’oMungu mukyalubukya Yesu. Ekirimu ekyo kyamabya ikine emwisi syenyu, oyo walubukaya Kristo Yesu iniakenditasyahira engebe omo mibiri yenyu eyikahola, erilabira ekirimu kiwe ekiri emwisi syenyu.
12 Neryo baghala betu, siritolere tukakwama omubiri wetu w’amalolo.
13 Oko kwenene, mwamabikwama emyatsi mibi y’omubiri, imukendisyahola. Aliwe, mwamabileka obutoki bw’ekirimu bukabawatikya eriita emibere y’omubiri, imukendisyabyaho.
14 Abakasondolawa n’ekirimu ky’oMungu abo bo bana biwe.
15 Mumutahabwa ekirimu ky’eribayiramo bakobe n’eribahiramo obuba. Aliwe, mumwahabwa ekirimu ekikabayiramo bana b’oMungu. Ekirimu ekyo kikaleka itwamubirikira tuti: “Abba,* ni bugha ambu Tata wetu.”
16 Ekirimu ky’oMungu kikaleka itwikirirya kundu ko tuli bana b’oMungu.
17 Twamabya ituli bana b’oMungu, ekyo ni bugha ambu nitwe tukendisyalya omwandu w’oMungu. Tukendisyalya omwandu oyo na Kristo. Aliwe embere sy’aho, ritolere itwaghalwa haghuma imo twasyabana olukengerwa lwo haghuma.
18 Ngalangira emyatsi yosi eyikaleka itwaghalwa lino nga si kindu erilinganisyayo n’olukengerwa olukendisyakanganibwa erilabira itwe.
19 Ebihangyikwa byosi binemulindirira kutsibu olukengerwa lw’abana b’oMungu.
20 Kundi ebihangyikwa byosi mubitanza erihirwa omo maisa awate n’amaha. Aliwe, oMungu mwaligha ati emyatsi yibye yitya. Nomo bine bitya, omughulu oMungu atswerabo busana n’erilolo, mwatuha amaha.
21 Kandi abya asi ngoko ebihangyikwa bikendisyalusibwa omo bukobe bw’omubiri owakahonda n’eribana obwiranda obuwene kutsibu, obw’abana b’oMungu.
22 Kundi tunasi ngoko erihika lino, ebihangyikwa byosi binemusimba haghuma n’eryaghalwa haghuma.
23 Aliwe lino, tuwite ekirimu ky’oMungu. Ekirimu ekyo ni maonzo w’ebyo tukendisyasunga. Tukasimba emwisi syetu itunemulindirira kutsibu omughulu tukendisyayirwamo bana b’oMungu ndeke-ndeke. Oko mughulu oyo, tukendisyalusibwa omo mibiri yetu erilabira embanulo.
24 Omughulu twasabulawa, mutwabya n’amaha. Aliwe, twamabya itunalangire ekindu ekyo tukahirako amaha, ayo si maha. Omundu anganabya n’amaha oko kindu ekyo analangire?
25 Aliwe, omughulu tukabya n’amaha oko kindu ekyo tutalangire, tukalindirirakyo kutsibu, kandi itunemuyiyinia.
26 Kandi ekirimu kibuyirire kikatuwatikaya omughulu twamabula akaghala. Tukananza erisaba, aliwe tukabula ebyo twangahira omo misabe yetu. Ekirimu ky’oMungu kikatubughira omughulu tukasimba itwabiribula ebyo twangabugha.
27 OMungu akalangira ebiri omo mitima yetu, kandi anasi ebyo ekirimu kikabugha kundi kikabughira ababuyirire erikwamana n’ebyo anzire.
28 Tunasi ngoko oMungu akayira emibiiri yiwe yosi ikole omo bughuma. Akakola atya busana n’endundi ey’abamwanzire, abo abirikira busana n’erisonda riwe.
29 Mwatsuka eriminyabo embere, kandi mwayisogha embere ngoko bakendisyabya nga Mughala wiwe. Mwakola atya omughala wiwe atoke eribya kambere omo kati-kati k’abaghala babo bangyi.
30 Neryo mwabirikira abo abya iniabirisombola. Kandi abo abirikira, mwabalangiramo batunganene. Oko nduli, abo alangiramo batunganene mwabaha olukengerwa.
31 Tubughe tutiki oko myatsi eyi? OMungu amabya iniane oko luhande lwetu, nindi yo wangatusinga?
32 Mwatatughanira Omughala wiwe, aliwe mwaligha erituha ye atoke erituholera itwe bosi. Amabya imwaligha erikola ekyo, anganatughanira eyindi myatsi yosi kwe?
33 Nindi yo wangatsongera abandu abo Mungu abirisombola? OMungu yukabalangiramo batunganene.
34 Nindi yo wangabatswera muhanda? Sihali. Kristo Yesu yo wahola busana nabo, kandi yo walubukibawa. Lino, ali oko luhande lw’amali lw’oMungu akatubughira.
35 Hane ekyangaleka Kristo inialeka eritwanza? Amaligho, amaghali, eryaghalibwa,* enzala, eribula eky’eryambala, ehatari, kutse omuyali byanganaleka Kristo inialeka eritwanza?
36 Amasako akabugha ati: “Oko buli ndambi bakasonda eritwita busana n’erina ryaghu. Abandu bakatulangira ng’esyombuli esikayakerawa.”
37 Aliwe omo myatsi yosi eyo, tukasinga busana n’oyo watwanza.
38 Nikirirye kundu ngoko sihali eky’angaleka oMungu inialeka eritwanza. Lwangabya luholo, engebe, abamalaika, abatabali, emyatsi ya lino kutse eyikendisyasa, amaka wosi-wosi,
39 ekyosi-kyosi eky’endata kutse eky’eyikwa, kutse ekindi kihangyikwa kyosi-kyosi. Oko kwenene, sihali n’ekindu n’ekighuma ekyangaleka oMungu iniatulusyako olwanzo olwatukanganaya erilabira Kristo Yesu Omukama wetu.
Amaelezo awehikwa
^ Ni kinywa ky’Ekiebrania kutse ky’Ekiaramu, ekikamaanisaya “Tata!, Baba!”
^ Kutse “eryendereribwa.”
