Ebaruha oko Abanya Roma 9:1-33
9 Kundi ngakwama Kristo, ngabugha ekwenene. Siniriteba. Obunya-mutima* bwaghe obukasondolawa n’ekirimu kibuyirire bukimira omwatsi ono:
2 Ngaghalawa kutsibu kandi omo mutima waghe mukabya imune obulighe.
3 Nangananza erilusibwa oko Kristo ng’omundu oyo wabiritakirwa nitoke eriwatikya abaghala betu, abatunga baghe.
4 Ni Baisraeli, kandi mubasombolwa eriyirwamo abana b’oMungu. OMungu mwakanganiabo olukengerwa lwiwe, mwalaghana nabo, mwahabo emighambo, mwababwira ebyo akendisyabakolera, kandi mwahabo olusunzo lw’erimukolera.
5 Ni lubuto lw’abotata-kulu wetu abo Kristo naye asiramo omughulu abutawamo mundu. OMungu oyuli endata w’ebyosi apipawe kera na kera. Amina.
6 Ebyo Mungu abirilagha sibyebyatabula eribererera. Abaisraeli bosi si “Baisraeli” b’ekwenene.
7 Eribya lubuto lwa Abrahamu si bugha ambu abosi ni bana biwe kwenene-kwenene. OMungu mwabwira Abrahamu ati: “Olukendisyahulwamo lubuto lwaghu lukendisyasa erilabira Isaka.”
8 Ekyo kikakanganaya ngoko abana abo Abrahamu abuta bo bate bana b’oMungu kwenene-kwenene. Aliwe, abana ababutawa erilabira endaghane y’oMungu bo bana b’oMungu kwenene-kwenene.
9 OMungu mwalagha ati: “Oko mughulu ono, oko mwaka owakasa, ngendisyasa, na Sara akendisyabuta omwana.”
10 Emyatsi ko yanabya yitya omughulu Rebeka abya n’obukule bw’abahasa. Isaka tata-kulu wetu yo wabya baba wabo.
11 Embere babutawe, kandi embere baminye erikola ekibuya kutse ekibi, oMungu abya iniabiriyisogha ngoko angasombola omundu. Syalisombola omundu busana n’ebyo mundu oyo akakola, akasombola omundu oyo iye anzire.
12 Neryo mwabwira Rebeka ati: “Omukulu akendisyabya mughombe w’omulere.”
13 Ngoko Amasako akabugha: “Munanza Yakobo, aliwe munaghana Esau.”
14 Tukasonda eribugha tuti oMungu syatunganene? Iyehe!
15 Kundi oMungu mwabwira Musa ati: “Ngendisyaghanyira oyo ngendisyanza erighanyira, kandi ngendisyakwira obulighe oyo ngendisyanza erikwira obulighe.”
16 Neryo, oMungu syalisombola omundu busana n’eryanza ry’omundu oyo kutse busana n’eriyikasa riwe.* Aliwe, oMungu akasombola omundu busana n’erikwira omundu oyo y’obulighe.
17 Kundi Amasako akabwira Farao ati: “Ekyaleka initakwita kya kino: Erikangania amaka waghe erilabira iwe, n’eriminyisya erina ryaghe omo kihugho kyosi.”
18 Neryo, oMungu akaghanyira omundu oyo iye anzire erighanyira. Aliwe, akaleka omundu oyo wanzire eribya n’erighundu abye n’erighundu.
19 Abandu balebe bangananibulya bati: “Busanaki oMungu akinasunga omo bandu mw’amakosa? Nindi yo wangimania ebyo oMungu abiriyisogha erikola?”
20 Aliwe, ulindi iwe mundu bule eribugha oko Mungu ko muhanda? Ekindu ekiryakokotibawa kyanganabwira oyulyakokotayakyo kiti: “Ulyanikokotaya utya busanaki?”
21 Simwasi ngoko omubumbi awite ehamuli y’erikokotya omo ribumba righumerera mw’ekindu eky’erikolesya kiro kilebe kisa kutse eky’erikolesya buli kiro?
22 OMungu naye kwakakola atya. Mwayisogha erikangania erihitana riwe n’amaka wiwe. Mwakola atya inianemuhanda omutima wo kutsibu busana n’ababya bakamuhitania kandi ababya batolere eritsandibwa.
23 Mwakola eki erikangania olukengerwa lwiwe lunene oko abatolere erighanyirwa. Mwateghekaniabo atoke eribaha olukengerwa.
24 Nitwe abirikira, mwatabirikira Abayahudi basa, aliwe mwabirikira n’abandu b’omo bindi bihanda.
25 Binemubererera ngoko Hosea abugha. Mwabugha ati: “Abate bandu baghe ngendisyahulabo mo ‘bandu baghe,’ n’abatabyabanzirwe bakendisyahulwamo, ‘banzwa.’
26 N’eyo nabya ngabwirabo niti: ‘Simuli abandu baghe,’ eyo, mwasyabirikirwamo ‘abana b’oMungu oyuliho.’”
27 Isaya mwabugha atya busana ne Israeli. Ati: “Nomo Abaisraeli bangabya bangyi ng’omutsanga w’oko ngetse, abake basa bo bakendisyalamibwa.
28 Kundi Yehova* akendisyatswera ekihugho, akendisyaha abandu b’amalipizi aho n’aho.”
29 Kandi Isaya mwabugha ati: “Yehova* w’emilondo y’abamalaika ngatalitusighiraho olubuto, kumbe twabiribya nge Sodomo n’erisosa e Gomora.”
30 Neryo tubughe tutiki? Tuti abandu b’ebindi bihanda abatabyabakakola ebitunganene babirilangirwamo batunganene busana n’erikirirya.
31 Kandi, nomo Abaisraeli babya bakayikasa erikola ebitunganene, mubatatoka erikolabyo ndeke-ndeke.
32 Mubatatoka busanaki? Kundi babya bakalengekania bati banganabya batunganene busana n’emikolere yabo, butsira busana n’erikirirya. Mubatwikala oko “ribwe erikatwikalaya.”
33 Kiri ngoko Amasako akabugha ati: “Ngahira e Sioni y’eribwe erikendisyatwikalya abandu, n’eribwe erikendisyaleka abandu ibahitana. Aliwe, oyukendisyikirirya eribwe eryo, syendisyahemuka.”
Amaelezo awehikwa
^ Kutse “ezamiri.”
^ Kinywa kwa kinywa, “omundu oyukanza kutse oyukatibita.”
^ Ulebaye endomeko A5.
^ Ulebaye endomeko A5.
