Abatsweri 10:1-18
10 Omughulu wa Abimeleki abere abilaba, Tola mughala wa Pua, mughala wa Dodo, omulume w’omo kihanda kya Isakari, mwatsuka erisabula Abaisraeli ababya bikere e Shamiri omo kiharo ky’ebitwa kye Efraimu.
2 Mwatswera Abaisraeli omo myaka 23. Enyuma sy’aho, mwahola, amatabwa e Shamiri.
3 Omughulu wiwe abere abilaba, muhasa Yairi Omugileadi. Mwatswera Abaisraeli omo myaka 22.
4 Abya n’abaghala 30 ababya bakaghenda oko syopunda 30, kandi ababya n’emiyi 30. Emiyi eyo yikinahulawa mo Havote-yairi erihika na munabwire. Yiri omo kiharo kye Gileadi.
5 Enyuma sy’aho, Yairi mwahola, amatabwa e Kamoni.
6 Kandi Abaisraeli mubakola ebituwene embere sya Yehova. Mubatsuka erikolera Esyobaali, esyosanamu sya Ashtoreti, emiungu ye Aramu,* emiungu ye Sidoni, emiungu ye Moabu, emiungu y’Abaamoni, n’emiungu y’Abafilistini. Mubaleka Yehova, mubatamukolera.
7 Yehova mwahitana kutsibu oko Baisraeli, neryo mwabahira omo byala by’Abafilistini n’Abaamoni.
8 Neryo Abafilistini n’Abaamoni mubanekerya Abaisraeli n’eryaghalyabo oko mwaka oyo. Omo myaka 18, mubatesa Abaisraeli bosi ababya bikere omo kiharo kye Gileadi oko luhande lwe Yordani olo kera lwabya kiharo ky’Abaamori.
9 Kandi Abaamoni ibakabya ibanemusoka e Yordani bakayalwa n’ebihanda bya Yuda, bya Benyamini, n’ebya Efraimu; neryo Abaisraeli mubaghalwa kutsibu.
10 Abaisraeli mubasaba Yehova y’obuwatikya, mubabugha bati: “Twabirikukolera erilolo, kundi twabirikuleka, iwe Mungu wetu, twabiriyaramya Esyobaali.”
11 Aliwe Yehova mwabwira Abaisraeli ati: “Si n’ingye nabalusaya omo byala by’Abamisri, by’Abaamori, by’Abaamoni, by’Abafilistini,
12 by’Abasidoni, by’Abaamaleki, n’eby’Abamidiani, omughulu babya bakabaghalya. Omughulu mwanisaba obuwatikya, munabalusya omo byala byabo.
13 Aliwe mwabirinileka kandi mwabirikolera eyindi miungu. Busana n’ekyo, rero sinendibasabula.
14 Muye eyiri emiungu eyo mwabirisombola muti ibawatikaye. Indi munemwaghalwa, ibawatikayeno.”
15 Aliwe Abaisraeli mubabwira Yehova bati: “Twabirikola erilolo. Utukolere ekyo wanzire. Aliwe ekyo twamakusaba, kisi, utusabule munabwire.”
16 Neryo Abaisraeli mubalusya eyindi miungu omo kati-kati kabo, bamakolera Yehova. Neryo oMungu mwatatoka eritasyahanda omutima akalangira Abaisraeli bakaghalwa.
17 Habere habilaba mughulu mulebe, Abaamoni mubahindania abasuda babo, bamayahimba ekambi yabo omo kiharo kye Gileadi. Neryo Abaisraeli mubahindana, bamayahimba ekambi yabo e Mizpa.
18 Abandu n’abakulu be Gileadi mubabwirana bati: “Nindi yukenditusondola tukayalwa n’Abaamoni? Oyo yukendibya mukulu w’abandu bosi be Gileadi.”
Amaelezo awehikwa
^ Kutse “Siria.”
