Abatsweri 11:1-40
11 Yefta Omugileadi abya musuda w’amaka. Abya mughala w’omumbalaka, na Gileadi yo wabya baba wiwe.
2 Aliwe omukali wa Gileadi naye mwamubutira abandi bana b’obulume. Abana abo babere babikula, mubahigha Yefta. Mubamubwira bati: “Siwendisyahabwa omwandu omo nyumba ya baba wetu, kundi muwabutwa oko ghundi mukali.”
3 Neryo Yefta mwatibita, amayikala hali n’abaghala babo omo kihugho kye Tobu. Abalume abatawite eky’erikola mubayighunga na Yefta. Ibakaghenda kughuma bakayalwa.
4 Muhabya habilaba biro bilebe, Abaamoni mubalwa n’Abaisraeli.
5 Omughulu Abaamoni balwa n’Abaisraeli, abasyakulu be Gileadi mubalw’ibayenda Yefta omo kihugho kye Tobu.
6 Mubabwira Yefta bati: “Asa, ukenditusondola tutoke erilwa n’Abaamoni.”
7 Aliwe Yefta mwasubirya abasyakulu be Gileadi ati: “Si n’inywe mwanipona kutsibu neryo mwamanihigha omo nyumba ya baba waghe! Neryo kundi muli omo buligho, ibwa muti mukasyanienda.”
8 Abasyakulu be Gileadi nabo mubasubirya Yefta bati: “Kyo kyamaleka itwasyakwenda. Wamabighenda netu, iwayalwa n’Abaamoni, ighukendibya mukulu wetu, n’ow’abikalani bosi be Gileadi.”
9 Neryo Yefta mwabwira abasyakulu be Gileadi ati: “Mwamanisubya ewenyu, neryo inayalwa n’Abaamoni, na Yehova amabiniwatikya eribasinga, ingendibya mukulu wenyu!”
10 Abasyakulu be Gileadi mubabwira Yefta bati: “Tukendikola ebyo wamabugha. Yehova abye mwimiri.”*
11 Neryo Yefta mwaghenda n’abasyakulu be Gileadi, n’abandu bamamuyira mo mukulu wabo n’omukomanda wabo. Kandi Yefta mwasuba omo binywa biwe embere sya Yehova e Mizpa.
12 Enyuma sy’aho, Yefta mwatuma abandu ati bayabwire omwami w’Abaamoni bati: “Niryakukoleraki ekikaleka iwasyalwa n’ekihugho kyaghe?”
13 Omwami w’Abaamoni mwasubirya abalume abo Yefta atuma ati: “Ngalwa nenyu kundi mumwimya ekihugho kyaghe omughulu mwalua e Misri. Mumwimya ekiharo kyaghe eritsuka e Arnoni eriyahika e Yaboki n’eriyahika oko Yordani. Neryo munisubulirayebyo omo buholo.”
14 Yefta mwatasyatuma abandu oko mwami w’Abaamoni
15 ati bayamubwire bati:
“Yetfa amabugha ati, ‘Abaisraeli mubatimya ekihugho ky’Abamoabu n’ekihugho ky’Abaamoni.
16 Omughulu Abaisraeli balua e Misri, mubalaba omo mbwarara, bamayahika oko Ngetse y’Engula, bamahika ne Kadeshi.
17 Neryo Abaisraeli mubatuma abandu bati bayabwire omwami we Edomu bati: “Kisi, leka tulabe omo kihugho kyaghu,” aliwe omwami we Edomu mwataligha. Mubatuma abandu n’oko mwami we Moabu, oyo naye mwataligha. Neryo Abaisraeli mubasighala e Kadeshi omo biro bilebe.
18 Omughulu balaba omo mbwarara, mubatalaba omo kihugo kye Edomu n’ekye Moabu, aliwe mubatimba kubyo. Mubalaba oko luhande lw’eyo ryuba rikasira lwe Moabu, bamayahira ekambi yabo omo kiharo kye Arnoni. Mubatahika oko mupaka we Moabu, kundi Arnoni abya mupaka w’ekihugho kye Moabu.
19 “‘Enyuma sy’aho, Abaisraeli mubatuma abandu oko Sihoni, omwami w’Abaamori, omwami we Heshboni, ambu bayamubwire bati: “Kisi, leka tulabe omo kihugho kyaghu tukaya eyo tukaya.”
20 Aliwe Sihoni mwataligha ati Abaisraeli balabe omo kiharo kiwe, kundi mwatabahiramo amaha. Neryo Sihoni mwahindania abasuda biwe bosi bo haghuma, amahira ekambi yiwe e Yahazi n’erilwa n’Abaisraeli.
21 Neryo Yehova oMungu we Israeli mwabawatikya erisinga Sihoni n’abasuda biwe bosi. Abaisraeli mubabasinga, neryo bamimya ekihugho kyosi ky’Abaamori, ababya bikere omo kihugho ekyo.
22 Abaisraeli ko bahamba batya ekiharo kyosi ky’Abaamori, eritsuka e Arnoni erihika e Yaboki, n’eritsuka omo mbwarara eriyahika oko Yordani.
23 “‘Yehova oMungu w’Abaisraeli yo wahigha Abaamori b’omo kihugho atoke erihakyo abandu biwe, neryo lino n’iwe ukasonda erihighabo?
24 Si unawite oko bindu ebyo Kemoshi omungu waghu abirikuha. Itwe tukendihigha omo kihugho m’obuli mundu oyo Yehova oMungu wetu abirihigha omo kihugho atoke erituhakyo.
25 Ukalengekenaya uti ulengire Balaki, mughala wa Zipori, omwami we Moabu? Iye mwatapima eritsukisya amalwa n’Abaisraeli kutse eriyalwa nabo.
26 Hamabilaba emyaka 300 Abaisraeli ibanikere e Heshboni n’omo milongo eyitimbire oko Heshboni, e Aroeri n’omo milongo eyitimbire oko Araoeri, n’emiyi yosi eyiri oko misike-sike ye Arnoni. Omo myaka yosi eyo, busanaki sighuliwatabugha uti ukimaya emiyi eyo?
27 Sinditakukolera kibi, aliwe mukayira muhanda erilwa naghe. Munabwire, Yehova Omutsweri atswere Abaisraeli n’Abaamoni.’”
28 Aliwe omwami w’Abaamoni mwatowa omulaghe ogho Yefta amutumako.
29 Neryo Yefta mwahikako ekirimu kya Yehova, amalaba omo kiharo kye Gileadi n’ekya Manase akaya e Mizpa eyiri omo Gileadi. Enyuma sy’aho, mwalua e Mizpa eyiri omo Gileadi, amayalwa n’Abaamoni.
30 Neryo Yefta mwayilagha erikolera Yehova y’omwatsi mulebe. Mwamubwira ati: “Wamabiniwatikya erisinga Abaamoni,
31 ngendibya nabisubula buholo ngalua okw’ilwa n’Abaamoni, omundu oyukendihuluka omo nyumba yaghe akasyanikokya, akendibya wa Yehova. Ngendimuherera mo buhere bw’eryokererya.”
32 Neryo Yefta mwayalwa n’Abaamoni, na Yehova mwamuwatikya erisingabo.
33 Mwitabo kutsibu erilua e Aroeri eriyahika e Miniti, amayahika ne Abel-keramimu, mwimya n’emiyi yabo 20. Abaisraeli ko basinga batya Abaamoni.
34 Oko nduli, Yefta mwahika ewiwe e Mizpa. Neryo mwali wiwe yo wahuluka akasyamukokya inianemuwata akaghoma n’erisata. Oyo yo mwana oyo abya awiteko musa, syabya awite oko ghundi mwana, abye mwana w’obulume kutse w’obukali.
35 Yefta abere abilangira mwali wiwe, mwatula esyongyimba siwe n’eribugha ati: “Iyoo! Mwali waghe! Wamaleka omutima waghe inialuma,* kundi wamabibya mundu oyo ngendilusya omo nyumba yaghe. Nabiribwira Yehova, sinangasyasuba enyuma.”
36 Aliwe mwali wiwe mwamubwira ati: “Baba, wamabya imughukabwira Yehova y’omwatsi mulebe, unikolere ngoko ulyalagha, kundi Yehova mwakakuwatikaya erituhulirya esyonzighu syaghu, ni bugha ambu Abaamoni.”
37 Enyuma sy’aho, mwabwira baba wiwe ati: “Ekyo ngakusaba kya kino: Leka nibye ingy’uwene omo misi ibiri, nighende omo bitwa, niyalire n’abira baghe b’obukali kundi sinendisyalunga.”*
38 Neryo baba wiwe mwamubwira ati: “Ghenda!” Neryo mwamuleka aghende omo bitwa, ayabugheyo emisi ibiri. Mwaghenda omo bitwa n’abira biwe b’obukali bakayalira haghuma naye kundi isyendisyalunga.*
39 Emisi ibiri eyo yabere yabihwa, mwasuba eyiri baba wiwe. Neryo enyuma sy’aho, baba wiwe mwaberererya ebyo ayilagha erimukolera. Mwali wiwe oyo mwataghotsera n’omulume. Neryo kino mukyatsuka eribya kikakolwa* omo Israeli:
40 Omo biro bini oko buli mwaka, abambesa be Israeli ibakayasima mwali wa Yefta Omugileadi.
Amaelezo awehikwa
^ Kutse “mutemwe.” Kinywa kwa kinywa, “yukahulikirira.”
^ Kinywa kwa kinywa, “Wamanighusa ahisi.” Kutse “Wamanilabirya ahisi.”
^ Kutse “niyalirire obubikira bwaghe haghuma n’abira baghe b’obukali.”
^ Kutse “akayalira obubikira bwiwe haghuma n’abira biwe b’obukali.”
^ Kutse “mukyabya mughambo.”
