Abatsweri 12:1-15
12 Neryo abalume be Efraimu mubahindana, bamasoka olusi bakaya e Zafoni.* Mubabwira Yefta bati: “Busanaki mughutatubwira uti tughende naghu omughulu wayalwa n’Abaamoni? Tukendikutimiryako enyumba naghu ighunemo.”
2 Aliwe Yefta mwabasubirya ati: “Ingye n’abandu baghe mutwatahulikirirana n’ahake n’Abaamoni. Munababwira niti mwase muniwatikaye, aliwe mumwataniwatikya erilwa nabo.
3 Omughulu nalangira ngoko simwanganiwatikya, munahira engebe yaghe y’omo bwiko,* namayalwa n’Abaamoni, na Yehova mwaniwatikya erisingabo. Neryo busanaki mukasyalwa naghe munabwire?”
4 Neryo Yefta mwakuma-kuma abalume bosi be Gileadi, bamalwa n’Abaefraimu. Abalume be Gileadi mubasinga abalume be Efraimu ababya bakabugha bati: “Inywe Bagileadi, mwikere omo biharo bye Efraimu na Manase, aliwe muli bandu abatswa omo kiharo kye Efraimu.”
5 Abalume be Gileadi mubahamba ebisokero bye Yordani, bamahirayo abalume batoke erikakirya Abaefraimu eritibita. Omughulu omulume we Efraimu abya akasonda eritibita, abya akabugha ati: “Muleke ngasoke.” Neryo abalume be Gileadi babya bakamubulya bati: “Uli Muefraimu?” Iniakabya abisubirya ati: “Iyehe,”
6 ibakamubwira bati: “Bugha uti Shiboleti.” Aliwe iniakabugha ati: “Siboleti.” Kundi abya isyangatoka eribugha ekinywa ekyo kyo ndeke, neryo ibakamuhamba n’erimwitira oko bisokero bye Yordani. Neryo Abaefraimu 42 000 mubahola oko mughulu oyo.
7 Yefta mwatswera Abaisraeli omo myaka 6. N’enyuma sy’aho, Yefta Omugileadi mwahola, amatabwa omo muyi wiwe, e Gileadi.
8 Yefta abere abihola, Ibzani owe Betlehemu, mwatsuka eritswera Abaisraeli.
9 Abya n’abana b’obulume 30 n’ab’obukali 30. Mwatuma abali biwe bayalunge n’abalume abatabya b’omo kitunga kiwe, kandi mwaleta abakali 30 basyalunge n’abaghala biwe. Mwatswera Abaisraeli omo myaka 7.
10 Neryo Ibzani mwahola, amatabwa e Betlehemu.
11 Abere abihola, Eloni Omuzabuloni, mwatsuka eritswera Abaisraeli. Mwatswera Abaisraeli omo myaka 10.
12 Enyuma sy’aho, Eloni Omuzabuloni mwahola, amatabwa e Aiyaloni, omo kiharo kya Zabuloni.
13 Eloni abere abihola, Abdoni mughala wa Hileli Omupiratoni, mwatsuka eritswera Abaisraeli.
14 Abya n’abana b’obulume 40, n’abitsukulu b’obulume 30, ababya bakaghenda oko syopunda 70. Mwatswera Abaisraeli omo myaka 8.
15 Enyuma sy’aho, Abdoni mughala wa Hileli Omupiratoni, mwahola, amatabwa e Piratoni, omo kiharo ky’Abaefraimu, omo kitwa ky’Abaamaleki.
Amaelezo awehikwa
^ Kutse alinga, “mubasoka bakaya oko luhande lw’endata.”
^ Kutse “enafsi yaghe omo byala byaghe.”
