Abatsweri 14:1-20
14 Neryo Samsoni mwandaghalira e Timna. Mwabya abihikayo, mwalangirayo omukali Mufilistini.*
2 Neryo Samsoni mwaluayo, amayabwira baba wiwe na mama wiwe ati: “Mungalangira e Timna y’omukali Mufilistini, nanzire imwanitahirya omukali oyo.”
3 Aliwe baba wiwe na mama wiwe mubamubwira bati: “Ukalengekanaya uti siwangasunga omukali omo batunga baghu, n’omo Baisraeli bosi? Wabirilangira tu uti litolere iwatahirya ew’Abafilistini abatabanibwe?” Aliwe Samsoni mwabwira baba wiwe ati: “Unitahiraye omukali oyo, kundi y’unitolere.”
4 Baba wiwe na mama wiwe mubataminya ngoko Yehova yo wabya akasondola Samsoni atoke eriyisogha atya, kundi abya* akasondya akanya k’erilwa n’Abafilistini, kusangwa Abafilistini bo babya bakatabala Abaisraeli oko mughulu oyo.
5 Neryo Samsoni mwandaghalira e Timna haghuma na baba wiwe na mama wiwe. Mwabya abihika hakuhi n’amalima w’emizabibu we Timna, esimba* muyasa ey’ali iyinemururuma.
6 Neryo ekirimu kya Yehova mukyaha Samsoni y’akaghala, amatula esimba eyo yo kabiri, ngoko omundu akatula ekyana ky’embene kyo kabiri omo byala biwe bisa. Aliwe mwatabwira baba wiwe na mama wiwe ekyo alyakola.
7 Enyuma sy’aho, mwandaghalira e Timna, amakania n’omukali Mufilistini oyo. Samsoni abya iniakinikirirye ngoko oyo y’omukali oyumutolere.
8 Habere habilaba mughulu mulebe, omughulu abya akalua eyo ayenda omukali akamuleta ewiwe, mwakita akayalebya ekinda ky’esimba eyo ita. Mwasunga omo kinda ekyo mw’ekisese n’obuki.
9 Mwimya oko buki obwabya omo kinda ekyo, amahirabo omo byala biwe, neryo amalya inianemughenda. Mwabya abihika ahali baba wiwe na mama wiwe, mwahabo oko buki obo nabo balye kubo. Aliwe mwatabwirabo ngoko alyalusayabo omo kinda ky’esimba.
10 Enyuma sy’aho, baba wiwe mwayasungana n’omukali Mufilistini oyo, na Samsoni mwakolerayo efete, kundi ekyo kyo balwana babya babeghere erikola.
11 Abandu mubabya babimulangira, mubaleta abalwana 30 abekendingira naye omo fete n’erikala haghuma naye.
12 Neryo Samsoni mwabwirabo ati: “Ngendibaghusira endekerano. Mwamabikumbula endekerano eyo n’erimbwira nga ikamaanisayaki omo biro 7 ebyo tukendibya itune omo fete, ingendibaha esyongyimba 30 sy’ekitani n’esyongyimba 30 esikambalawa kughuma.”* Mubamusubirya bati: “Tughusire endekerano eyo, twanzire eryowayo.”
13 Aliwe mutetatoka erikumbula endekerano yaghe, in’inywe mukendimba esyongyimba 30 sy’ekitani n’esyongyimba 30 esikambalawa kughuma.”* Mubamusubirya bati: “Utubwire endekerano yaghu, twanzire eryowayo.”
14 Neryo mwababwira ati:
“Omo ekikalya mumukalua eky’erirya,N’omo ekikalire mumukalua ekindu ekisihire.”
Muhalaba ebiro bisatu isibetatoka erikumbula endekerano eyo.
15 Omo kiro ky’akani, mubabwira omukali wa Samsoni bati: “Ulebaye nga ukendiyira uti omwira waghu atoke eritukumbulira endekerano eyo. Bite-bitya, itukendikutimya iwe n’ekihanda kya baba waghu. Mulyatubirikira hano busana n’erimya ebindu byetu?”
16 Neryo omukali wa Samsoni mwamulilirako n’erimubwira ati: “Nabirilangira ngoko uniponire, sighunianzire. Mukaghusira abandu b’ewetu b’endekerano, aliwe siwetanikumbulirayo.” Neryo Samsoni mwamubwira ati: “Sinditakumbulirayo baba na mama waghe, iwe ngendikumbulirayo?”
17 Aliwe omo biro ebyabya bikisiya oko biro 7 by’efete, mwataleka erimulirirako. Ekiro kye 7, Samsoni mwasala amukumbulirayo, kundi abya iniabirimuhatikana. Neryo omukali oyo mwakumbulira abandu b’ewabo b’endekerano eyo.
18 Neryo ekiro kye 7 embere eryuba rilenge,* abandu b’omo muyi mubabwira Samsoni bati:
“Niki kyo kisihire kulenga obuki?Kandi niki kyo kikalire kulenga esimba?”
Samsoni mwasubiryabo ati:
“Ngamutalyalima n’ende yaghe eyikine nyilere,Simwangakumbulire endekerano yaghe.”
19 Neryo ekirimu kya Yehova mukyamuha akaghala, amandaghalira e Ashkeloni, n’eriita abalume 30. Mwimya esyongyimba syabo, amaha n’abalyakumbula endekerano yiwe b’esyongyimba esikambalawa kughuma.* Enyuma sy’aho, mwasuba eyiri baba wiwe iniabirihitana kutsibu.
20 Neryo mubaha omukali wa Samsoni y’omughuma w’oko balwana abingira haghuma naye omo fete.
Amaelezo awehikwa
^ Kinywa kwa kinywa, “omukali w’omo bali b’Abafilistini.”
^ Alinga ni Mungu.
^ Kutse “esimba nyilere eyiswireko obweya omo bikya.”
^ Kutse “n’esyokomble 30.”
^ Kutse “n’esyokomble 30.”
^ Kutse alinga, “embere ingire ekati.”
^ Kutse “b’esyokomble.”
