Abatsweri 15:1-20
-
Samsoni amita Abafilistini busana n’ebyo bamukolera (1-20)
15 Muhabya habilaba mughulu mulebe, oko mughulu w’erighesa engano, Samsoni mwayabana omukali wiwe. Mwamutwalira embene eyikine nyilere. Mwabugha ati: “Nanzire iningira omo kyumba* ky’omukali waghe.” Aliwe baba w’omukali wiwe mwatamulighira eringiramo.
2 Baba w’omukali oyo mwabugha ati: “Mungayibwira niti, ‘Samsoni amuponire.’ Neryo mungamuha omughuma w’oko balwana abo wingira nabo omo fete. Omulere wiwe ni mubuya kumulenga. Kisi, umwimaye omo mwanya w’omukulu wiwe.”
3 Aliwe Samsoni mwabugha ati: “Lero Abafilistini sibanganibughako muhanda namabilwa nabo.”
4 Neryo Samsoni mwayahamba esyoboha 300. Amaboha esyoboha mw’ibiri-biri oko mukira. Enyuma sy’aho, amimya ehiti,* amabya akahira akati kaghuma omo kati-kati k’emikira ibiri.
5 Neryo mwahira oko hiti* ehyo k’omuliro, amalwika esyoboha esyo, syamaya omo malima w’Abafilistini omw’abya imune engano eyiteyagheswa. Mwatimya ebyosi omo muliro, ni bugha ambu emighanda, engano eyite yagheswa, amalima w’emizabibu, n’amalima w’emizeituni.
6 Abafilistini mubabulya bati: “Oyulyakola eki nindi?” Mubababwira ambu: “Ni Samsoni, omukwe w’Omutimna, kundi tata-byala wiwe mwaha omukali wiwe omughuma w’oko balwana abingira haghuma naye omo fete.” Neryo Abafilistini mubayatimya omukali oyo na baba wiwe.
7 Neryo Samsoni mwababwira ati: “Mwamabya ikomukakola mutya, sinendilekeraho nite nabatuhulirya.”
8 Neryo mwitabo mo mughuma-mughuma, mwita abandu banene. Enyuma sy’aho, mwayikala omo mwangalu owabya omo lubwe* lwe Etamu.
9 Habere habilaba mughulu mulebe, Abafilistini muberukira omo kiharo ky’ekihanda kya Yuda, bamahimbayo ekambi yabo. Mubabya bakaghanga-ghanga omo kiharo kye Lehi.
10 Neryo abandu be Yuda mubababulya bati: “Mukasyalwa netu busanaki?” Abafilistini mubabasubirya bati: “Tulyasyahamba* Samsoni tutoke erimukolera ngoko anatukolera.”
11 Neryo abalume 300 be Yuda mubandaghalira eyiri omwangalu owali omo lubwe* lwe Etamu, bamabwira Samsoni bati: “Si unasi ngoko Abafilistini bo bakatutabala, neryo busanaki mukatukolera ekyo?” Mwabasubirya ati: “Mungabakolera ngoko bananikolera.”
12 Aliwe mubabwira Samsoni bati: “Tulyasyakuhamba* n’erikuhira omo byala by’Abafilistini.” Neryo Samsoni mwababwira ati: “Munilapire ngoko inywe simwendinihutalya.”
13 Mubamusubirya bati: “Iyehe, tukendikuboha risa n’erikuhira omo byala by’Abafilistini, aliwe sitwendikwita.”
Neryo mubamuboha omo bikoba bibiri ebihya-bihya, bamamulusya omo mwangalu.
14 Samsoni mwabya abihika e Lehi, Abafilistini mubalaka busana n’obutseme babimulangira. Neryo ekirimu kya Yehova mukyaha Samsoni y’akaghala, ebikoba ebyo babya bamubohiremo oko byala mubyabya ng’esyouzi sy’ekitani esiryahisibawa, neryo ebikoba ebyabya bibohire ebyala biwe mubyatogha.
15 Neryo Samsoni mwasunga omukese w’epunda y’obulume eyabya imoyanamalua okw’ihola. Mwimya omukese oyo, amita mugho mw’abandu 1 000.
16 Neryo Samsoni mwabugha ati:
“Omo mukese mughuma w’epunda—ekilundo kighuma, ebilundo bibiri!
Omo mukese mughuma w’epunda, mungita abandu 1 000.”
17 Mwabya abibugha ebinywa ebyo, mwaghusa omukese oyo, neryo mwahula omwanya oyo mo Ramati-lehi.*
18 Enyuma sy’aho, Samsoni mwakwa enyota nene, neryo mwasaba Yehova y’obuwatikya, mwabugha ati: “Iwe ulyaniwatikaya erisinga abandu abo bo kutsibu. Neryo sasa ukendiligha uti enyota iniite kandi ukendiligha uti niholere omo byala by’abandu abatabanibwe?”
19 Neryo oMungu mwatula ekitaka ekyabya e Lehi, hamabya ekyuna, kyamaluamo amaghetse. Samsoni mwabya abinywa oko maghetse ayo, akaghala kiwe mukasuba. Ekyo kyo kyaleka iniahula omwanya oyo mo En-hakore. Omwanya oyo akine e Lehi erihika na munabwire.
20 Samsoni mwatswera Abaisraeli omo myaka 20 omughulu Abafilistini babya bakatabalabo.
Amaelezo awehikwa
^ Kutse “ekati.”
^ Kutse “ebisosomole.”
^ Kutse “bisosomole.”
^ Kutse “lukuka.”
^ Kutse “Tulyasyaboha.”
^ Kutse “lukuka.”
^ Kutse “Tulyasyakuboha.”
^ Ni bugha ambu “omwanya w’endata w’omukese.”
