Abatsweri 16:1-31
16 Kiro kighuma, Samsoni mwaya e Gaza. Mwalangirayo omumbalaka, amaya omw’omumbalaka oyo.
2 Mubabwira abandu be Gaza ambu: “Samsoni abirihika eno.” Neryo mubatimba oko muyi n’erimulimbya omo kiro kyosi oko mulango w’omuyi. Mubayihunererya aho omo kiro kyosi. Babya bakayibwira bati: “Bukendibya bwabikya, itwamwita.”
3 Aliwe Samsoni mwayato erihika oko medi y’ekiro. Mwabuka oko medi y’ekiro, amahambirira emilango y’omuyi n’ehidrema hibiri n’erikulangabyo haghuma n’akale. Mwahirabyo oko bitigho biwe, amatwalabyo oko singyi y’ekitwa ekihererenie ne Hebroni.
4 Enyuma sy’aho, mwanza omukali mughuma oyo wabya ikere omo Musya* we Soreki. Abya iniakahulawa mo Delila.
5 Neryo abakama b’Abafilistini mubaya eyiri omukali oyo n’erimubwira bati: “Ulebaye ekyo wangakola utoke eriminya akaghala kangaha n’ako ng’akalusayako hayi, kandi utoke eriminya nga twangayira tuti tutoke erimuhamba, erimuboha, n’erimutoka. Wamabikola ekyo, obuli mughuma w’okw’itwe iniakendikuha ebihande 1 100 by’efeza.”*
6 Habere habilaba mughulu mulebe, Delila mwabwira Samsoni ati: “Kisi, nibwire akaghala kanene aka nga ukalusayako hayi, kandi umbwire omundu ng’angakuboha omuki imowoloba.”
7 Samsoni mwasubirya Delila ati: “Bamabiniboha omo bikoba 7 by’obuta* ebite byatakolesibwa* kandi ebitumire, aho ingendileghetsana n’eribya ng’abandi bandu.”
8 Neryo abakama b’Abafilistini mubaletera Delila y’ebikoba 7 by’obuta* ebyabya isibyebyatakolesibwa kandi ebitumire, neryo Delila amamuboha mubyo.
9 Aliwe habya abalume ababya bakamulimbirya omo kyumba ky’emwisi, neryo Delila mwabugha omo mulenge muli ati: “Samsoni, Abafilistini b’abo!” Aliwe Samsoni mwatwa ebikoba by’obuta,* mubyatwika bweghu-bweghu ngoko euzi y’ekitani ikatwika yabibya hakuhi n’omuliro. Sihali oyo waminya ekikaleka iniabya n’akaghala.
10 Neryo Delila mwabwira Samsoni ati: “Mukanzangamo n’erindeba. Kisi, nibwire ekyo omundu angakubohamo.”
11 Mwamusubirya ati: “Bamabiniboha omo bikoba bihya-bihya ebite byatakolesibwa omo mubiiri wosi-wosi, aho ingendileghetsana n’eribya ng’abandi bandu.”
12 Neryo Delila mwimya ebikoba bihya-bihya, amaboha mubyo mo Samsoni, neryo Delila mwabugha omo mulenge muli ati: “Samsoni, Abafilistini b’abo!” (Oko ndambi eyo, abalume babya ibanemumulimbirya omo kyumba ky’emwisi.) Aliwe Samsoni mwatwa ebikoba ebyabya bibohire ebyala biwe, mwatwabyo ngoko amundu anganatwa euzi.
13 Enyuma sy’aho, Delila mwabwira Samsoni ati: “Erihika na lino ukinanzangamo n’erindeba. Unibwire ekyo omundu angakubohamo.” Neryo Samsoni mwamubwira ati: “Wimaye oko syouzi sy’obutambi sy’olukimba, neryo uluke emihungyi 7 y’oko mutwe waghe omo uzi eyo.”
14 Neryo Delila mwaboha emihungyi ya Samsoni omo kati n’eribugha omo mulenge muli ati: “Samsoni, Abafilistini b’abo!” Neryo Samsoni mwabuka, amalusya akati ako akakakolesibawa n’omundu oyukakokotaya esyongyimba, amalusyako n’euzi y’oko butambi bw’olukimba.
15 Neryo Delila mwamubwira ati: “Wanganabugha uti unianzire, ighunemunibisa ebiri omo mutima waghu? Eno ni ngendo y’akasatu ukanzangamo, kandi siwetambwira ekikaleka iwabya n’akaghala kangaho.”
16 Obuli kiro, Delila abya akamuhatikana n’erimukenderya. Neryo Samsoni mwaluha, abya inianganayiholera.
17 Neryo mwasala amukingulira omutima wiwe, amamubwira ati: “Ekitibo sikyekyatalaba oko mutwe waghe, kundi nabutawa iniri Munaziri w’oMungu.* Namabisiswa, akaghala kaghe ikakendinihwamo, ingendileghetsana n’eribya ng’abandi bandu.”
18 Delila mwabya abilangira ngoko Samsoni abirimukingulira omutima wiwe, mwalw’iniayabirikira abakama b’Abafilistini, amababwira ati: “Lero mwase, abirinikingulira omutima wiwe.” Neryo abakama b’Abafilistini mubasa eyali, bamaleta esyofranga esyo bamulagha.
19 Delila mwamughotserya oko maru wiwe, neryo mwabirikira omulume, amamubwira ati atwe ebihungyi 7 ebyabya oko mutwe wa Samsoni. N’enyuma sy’aho, Delila mwamughondya, kundi akaghala ka Samsoni kabya ikabirimuhwamo.
20 Neryo Delila mwabugha omo mulenge muli ati: “Samsoni, Abafilistini b’abo!” Samsoni mwabuka n’eribugha ati: “Ngendiyilusya omo byala byabo ng’ebindi biro.” Aliwe abya isyasi ngoko Yehova syakiri haghuma naye.
21 Neryo Abafilistini mubamuhamba, bamamutobolako ameso. Enyuma sy’aho, mubamundaghalirya e Gaza, n’erimuboha omo minyororo ibiri y’ekwivre.* Neryo mwabya akabaswera engano omo ngomo.
22 Aliwe esyonzwiri siwe esyasisawa musyatsuka erilasa.
23 Kiro kighuma, abakama b’Abafilistini mubahindana haghuma batoke eriherera Dagoni omungu wabo y’obuhere bunene n’erikola efete, kundi babya bakabugha bati: “Omungu wetu abirituwatikya erisinga Samsoni, enzighu yetu.”
24 Abafilistini babere balangira esanamu ya Dagoni, mubapipa omungu wabo n’eribugha bati: “Omungu wetu abirituwatikya erisinga enzighu yetu, eyatsandaya ekihugho kyetu, n’eriita abandu bangyi b’omwitwe.”
25 Kundi babya ibabiritsema kutsibu, mubabugha bati: “Muyende Samsoni, ase atutsemesaye.” Neryo mubayamulusya omo ngomo atoke eribatsemesya. Mubamwimania omo kati-kati k’esyonduyi.
26 Neryo Samsoni mwabwira omulwana oyo wabya amuhambirire oko byala ati: “Hira ebyala byaghe oko syonduyi esihambirire enyumba eno nitoke erihambirira kusyo.”
27 (Enyumba eyo yabya iswiremo abalume n’abakali. Abakama bosi b’Abafilistini babya ibanemo, n’oko lutwe kwabya abalume n’abakali hakuhi 3 000 ababya ibanemulebya ngoko Samsoni anemutsemesya abandu.)
28 Neryo Samsoni mwasaba Yehova ati: “Yehova, Omukama Mukulu oko Bosi, nibuke kisi, kandi umbe akaghala kisi, engendo nguma eno nyisa, Mungu waghe, leka niite Abafilistini nitoke eriyituhulirya eriso ryaghe righuma.”
29 Neryo Samsoni mwahambirira oko syonduyi ibiri sy’omo kati-kati esyabya sihambirire enyumba eyo, mwahira ebyala biwe by’amali oko nduyi nguma, n’ebyala biwe by’amalembe oko yindi nduyi.
30 Samsoni mwabugha omo mulenge muli ati: “Nihole* n’Abafilistini!” Neryo mwakolesya akaghala kiwe kosi erikuna esyonduyi esyo, n’enyumba eyo yamaterera oko bakama, n’abandu bosi ababyamo. Neryo Samsoni mwita abandu banene ekiro ahola kulenga abo ita iniakineho.
31 Habere habilaba mughulu mulebe, abaghala babo n’ekihanda kyosi kya baba wiwe mubasyenda ekinda kiwe. Mubahekakyo, bamayatakyo omo kiharo ekiri omo kati-kati ke Zora ne Eshtaoli omo yisinda ya Manoa baba wiwe. Samsoni mwatswera Abaisraeli omo myaka 20.
Amaelezo awehikwa
^ Kutse “musya owakumamo amaghetse.”
^ Ni kindu ky’obughuli ekilua omo kitaka.
^ Ni kindu ky’erilasamo emisali.
^ Kutse “emiki mibisi.”
^ Ni kindu ky’erilasamo emisali.
^ Ni kindu ky’erilasamo emisali.
^ Kinywa kwa kinywa, “niri Munaziri w’oMungu erilua omo nda ya mama waghe.”
^ Kutse “y’omulinga.”
^ Kutse “Enafsi yaghe ihole.”
