Abatsweri 17:1-13
-
Esyosanamu sya Mika n’omuhereri wiwe (1-13)
17 Omo kiharo ky’ebitwa kye Efraimu, mwabya omulume oyukahulawa mo Mika.
2 Kiro kighuma, Mika mwabwira mama wiwe ati: “Wanamibuka ebihande 1 100 by’efeza* ebyo bakwibako? Munowa ngoko muwatakira oyo wibabyo, n’ingye nimayabyo.” Neryo mama wiwe mwamubwira ati: “Yehova akutsumule, mughala waghe.”
3 Neryo Mika mwasubulirya mama wiwe ebihande 1 100 by’efeza,* aliwe mama wiwe mwamubwira ati: “Ngendiherera efeza yaghe eyi yo Yehova. Nanzire iwakokotya muyo mw’esanamu eyibatsire, n’esanamu y’emetale eyo balyayeyukaya. Neryo naghe ngakusubuliraya efeza eyo.”
4 Mika mwabya abisubulirya mama wiwe y’efeza,* mama wiwe mwimya ebihande 200 by’efeza, amahabyo omufundi oyukakokotaya ebindu omo feza. Omufundi oyo mwakokotya esanamu eyibatsire, n’esanamu y’emetale eyo balyayeyukaya. Mubahira esyosanamu esyo omo nyumba ya Mika.
5 Mika oyu abya n’enyumba y’eriramiryamo emiungu. Mwakokotya e efodi n’esyosanamu sy’eterafimu,* mwayira n’omughuma w’oko baghala biwe mo muhereri wiwe.
6 Oko mughulu oyo, omo Israeli mwabya isimuli mwami. Obuli mundu iniakakola ekyo amalangira mo kyuwene.
7 E Betlehemu, omo kiharo kye Yuda, yabya omulwana w’omo kihanda kya Yuda. Abya Mulawi, abya isyalyabughayo ebiro binene.
8 Omulwana oyo alua omo muyi we Betlehemu, omo kiharo kye Yuda, akayarondya ahandi h’erikala. Iniane omo lughendo, mwahika omo kiharo ky’ebitwa kye Efraimu, ewa Mika.
9 Neryo Mika mwamubulya ati: “Ukalwahi?” Omulwana oyo mwamusubirya ati: “Niri Mulawi owe Betlehemu, omo kiharo kye Yuda. Ninemurondya ah’erikala.”
10 Neryo Mika mwabwira omulwana oyo ati: “Wikale naghe, neryo ubye nga baba* n’omuhereri waghe. Obuli mwaka, ngendibya ngakuha ebihande 10 by’efeza,* esyongyimba esikambalawa kughuma,* n’ebyalya.” Neryo Omulawi oyo mwingira omo nyumba.
11 Neryo Omulawi oyo mwaligha erikala na Mika, mwabya ng’omughuma w’oko baghala biwe.
12 Kandi Mika mwamuyira mo muhereri wiwe, n’omulwana oyo mwikala ewa Mika.
13 Neryo Mika mwabugha ati: “Lino namabiminya ngoko Yehova akendinikolera ebyuwene kundi Omulawi abiribya muhereri waghe.”
Amaelezo awehikwa
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Kutse “n’emiungu y’ekihanda; n’esyosanamu.”
^ Kutse “ng’omuhani.”
^ Ni kindu ky’obughuli ekikalua omo kitaka.
^ Kutse “ekomble y’esyongyimba.”
