Abatsweri 18:1-31
18 Oko mughulu oyo, e Israeli yabya isiyiri mwami. Kandi oko mughulu oyo, ekihanda kya Dani kyabya kikarondya ah’erikala, kundi erihika oko mughulu oyo Abadani babya isibalibahabwa omwandu omo kati-kati k’ebihanda bye Israeli.
2 Abadani mubatuma abalume batano bayalebaye ekiharo ekyo bangikalamo. Abalume abo babya b’omo kihanda kyabo, kandi babya balume abawite obutoki abe Zora ne Eshtaoli. Abadani mubababwira bati: “Muyalebaye ekihugho nga kiri kiti.” Mubabya babihika omo kiharo ky’ebitwa kye Efraimu, eyiri enyumba ya Mika, mubaghotsera aho.
3 Babere babihika hakuhi n’enyumba ya Mika, mubaminyerera omulenge* w’omulwana Mulawi. Neryo mubaya ey’ali, bamamubulya bati: “Nindi yo wakuleta eno? Ukakola eno yoki? Niki kyo kikaleka iwabya eno?”
4 Mwababwira ebyo Mika abirimukolera, kandi amababwira ati: “Abiriniyira mo muhereri wiwe, aliwe akaniliha.”
5 Neryo abalume abo mubamubwira bati: “Kisi, ubulaye oMungu olughendo lwetu nga lunemo kahabuko.”
6 Omuhereri oyo mwababwira ati: “Mughende buholo. Yehova ane haghuma nenyu.”
7 Neryo abalume batano abo mubaendelea n’olughendo lwabo, bamayahika e Laishi. Mubalangira ngoko abandu ababya bikere omo muyi oyo babya ibayitosire nga Basidoni. Abandu abo babya ibatulere, kandi isihali ekyangaleka ibasagha. Sihabya omutesi wosi-wosi oyo wangalwa n’ekihugho kyabo n’eribakenderya. Babya hali n’Abasidoni, kandi isibalikola omwatsi wosi-wosi haghuma n’abandi bandu.
8 Abalume abo mubabya babisuba e Zora ne Eshtaoli eyiri abalikyabo, abalikyabo mubababulya bati: “Emyatsi yiriyo yiti?”
9 Mubabasubirya bati: “Tuyalwe nabo, kundi twabirilangira ngoko ekihugho ekyo kyuwene kutsibu. Mukinalinda-linda busanaki? Mulw’imughende omo kihugho ekyo n’erimyakyo.
10 Mukendibya mwabihikayo, mukendilangira ngoko abandu b’eyo sibawite ekyangaleka ibasagha, kandi mukendilangira ngoko ekihugho ekyo ni kinene. OMungu abiribahakyo. Omo kiharo ekyo, mukabanika obuli kindu ekiri oko kihugho.”
11 Neryo Abasuda 600 b’omo kihanda kya Dani mubalua e Zora ne Eshtaoli bakayalwa.
12 Mubahetuka, bamayahimba ekambi yabo e Kiriati-yearimu, omo kiharo ky’ekihanda kya Yuda. Kyo kikaleka ekiharo ekyo ikyahulwa mo Mahane-dani* erihika na munabwire. Kiri oko luhande lw’eyo ryuba rikalengera lwe Kiriati-yearimu.
13 Mubalua aho, bamaya omo kiharo ky’ebitwa kye Efraimu, bamahika omo nyumba ya Mika.
14 Neryo abalume batano abayalebaya ekihugho kye Laishi nga kiri kiti mubabwira abalikyabo bati: “Munasi ngoko omo manyumba aya mune e efodi, esyosanamu sy’eterafimu,* esanamu eyibatsire, n’esanamu y’emetale eyo balyayeyukaya? Mulebaye nga mukendiyira muti.”
15 Neryo mubimana aho, bamaya omo nyumba y’omulwana Mulawi, eyabya hakuhi n’enyumba ya Mika. Mubabulya omulwana oyo ng’anuwene.
16 Oko mughulu oyo, abalume 600 b’omo kihanda kya Dani, ababya bahekire ebindu by’amalwa, babya bimene oko mulango w’omuyi.
17 Abalume batano abayalebaya ekihugho nga kiri kiti mubingira omo nyumba, bamimya esanamu eyibatsire, e efodi, esyosanamu sy’eterafimu,* n’esanamu y’emetale eyo balyayeyukaya. Omuhereri abya imene oko mulango w’omuyi haghuma n’abalume 600 ababya bahekire ebindu by’amalwa.
18 Mubingira omo nyumba ya Mika, bamimya esanamu eyibatsire, e efodi, esyosanamu sy’eterafimu,* n’esanamu y’emetale eyo balyayeyukaya. Omuhereri mwababulya ati: “Mukayira muti?”
19 Aliwe mubamusubirya bati: “Huna we! Kinga obuno bwaghu, asa tughende, ukendibya baba* n’omuhereri wetu. Wamalangira ekyuwene kye kyahi? Ry’eribya muhereri w’ekihanda ky’omundu mughuma kutse ry’eribya muhereri w’ekitunga ekirimo ebihanda binene omo Israeli?”
20 Omuhereri mwatsemera amalengekania ayo, neryo mwimya e efodi, esyosanamu sy’eterafimu, n’esanamu eyibatsire, amaghenda n’abandu abo.
21 Neryo mubaendelea n’olughendo lw’abo, Mubahira abana, esyonyama, n’ebindu byabo by’obughuli by’embere.
22 Mubabya babighenda ebika bilebe bakalua ewa Mika, abalume ababya bikere omo manyumba awali hakuhi n’enyumba ya Mika mubahindana haghuma, bamakwamirira Abadani, n’eriyahika kubo.
23 Mubabirikira Abadani omo mulenge muli, neryo Abadani mubabinduka, bamabulya Mika bati: “Yamabyaki? Inywe bosi mulyasa busanaki?”
24 Mika mwabasubirya ati: “Mwabirimya emiungu yaghe eyo nakokotaya, kandi mwabiriheka n’omuhereri waghe. Mumukanisighiraki? Mwanganatoka erinibulya muti nga hamabyaki?”
25 Neryo Abadani mubamusubirya bati: “Isiwabugha netu utya; wamabibugha netu utya, abalume abatsurumire ibakakughulukirako neryo iwanganakwa, iwe n’ab’omo nyumba yaghu.”
26 Neryo Abadani mubaendelea n’olughendo lw’abo. Mika mwabya abilangira ngoko bawite akaghala kumulenga, mwasuba ewiwe.
27 Abadani mubabya babimya ebindu ebyo Mika akokotaya, babiheka n’omuhereri wiwe, mubaghenda e Laishi, eyiri abandu abatulere, kandi abatawite ekyangaleka ibasagha. Mubita abandu b’ayo omo muyali n’eritimya omuyi wabo.
28 Muhatabya n’oyukasyawatikaya abandu b’omo muyi oyo, kundi abya hali ne Sidoni, kandi abandu b’omo muyi oyo isibalikola omwatsi wosi-wosi n’abandi bandu. Omuyi oyo abya omo musya* owabya omo kiharo kye Bete-rehobu, neryo Abadani mubatasyahimba omuyi oyo, bamikala mugho.
29 Kandi Abadani mubahula omuyi oyo mo Dani, erina rya baba wabo, oyo wabya mughala wa Israeli. Aliwe omuyi oyo atula iniakahulawa mo Laishi.
30 Enyuma sy’aho, Abadani mubayimanirya esanamu eyibatsire. Yonatani, mughala wa Gershomu, mughala wa Musa, n’abaghala biwe mubabya bahereri b’ekihanda ky’Abadani erihika omughulu abikalani b’omo kihugho ekyo batwalawa omo bunyewa.
31 Mubimania esanamu eyibatsire eyo Mika akokotaya. Muyasighala aho omo biro byosi ebyo enyumba y’oMungu w’ekwenene yabya e Shilo.
Amaelezo awehikwa
^ Kutse “emibuyire.”
^ Ni bugha ambu “ekambi ya Dani.”
^ Kutse “emiungu y’ekihanda; esyosanamu.”
^ Kutse “emiungu y’ekihanda; esyosanamu.”
^ Kutse “emiungu y’ekihanda; esyosanamu.”
^ Kutse “muhani.”
^ Kutse “ribanda.”
