Abatsweri 19:1-30
-
Ababenyamini bamaghotsera kinyanganga n’omukali wabene (1-30)
19 Oko biro ebyo, omughulu omo Israeli mwabya isimuli mwami, Omulawi oyo wabya ikere omo kiharo ky’ehali ky’ebitwa kye Efraimu mwimya oghundi mukali owe Betlehemu, omo kiharo kye Yuda.
2 Aliwe oghundi mukali wiwe oyo iniakasingira. Omukali oyo mwasuba ewa baba wiwe e Betlehemu, omo kiharo kye Yuda, mwabughayo emisi ini.
3 Neryo omulume wiwe mwamukwamirira akaya mulemba-lemba ati asube ewiwe. Mwaghenda haghuma n’omukobe wiwe, n’esyopunda ibiri. Omukali oyo mwamwingirya omo nyumba ya baba wiwe. Baba wiwe mwabya abilangira omulume oyo, mwamukokya n’obutseme.
4 Baba w’omukali oyo, ni bugha ambu tata-byala w’omulume oyo, mwalemba-lemba omulume oyo ati asighale naye omo biro bisatu. Babya bakalya n’erinywa, kandi omulume oyo abya akaghotsera aho.
5 Ekiro ky’akani, mubabuka omo tututu. Bakasonda erighenda, baba w’omukali oyo mwabwira omukwe wiwe ati: “Tsuka walya imowabya n’akaghala. Ukendibya wabirya, neryo iwaghenda.”
6 Neryo mubikala, bamalya, n’erinywa abosi babiri. Enyuma sy’aho, baba w’omukali oyo mwabwira omulume oyo ati: “Kisi, isiwaghenda munabwire, utasyayitsemesaya munabwire.”
7 Kandi omughulu asonda erighenda, tata-byala wiwe mwamulemba-lemba ati atasyaghotsera ewiwe, neryo kandi mwaghotsera aho.
8 Ekiro ky’akatano, mwabuka omo tututu. Abere akasonda erighenda, baba w’omukali oyo mwamubwira ati: “Kisi, tsuka walya imowabya n’akaghala.” Neryo mubabya aho erihika omw’igholo. Abalume babiri abo babya bakalya.
9 Omughulu omulume oyo asonda erighenda n’oghundi mukali wiwe oyo n’omughombe wiwe, tata-byala wiwe, ni bugha ambu baba w’omukali oyo mwamubwira ati: “Bwabirira, kisi isimwaghenda munabwire. Ekya munabwire sikyamabilaba. Utasyaghotsera ekya munabwire, n’eriyitsemesya. Mukendisyabuka omungya omo tututu, neryo iwasuba ewaghu.”*
10 Aliwe omulume oyo mwatanza eritasyaghotsera eyo, neryo mwahangana, amatsukalo, amayahika e Yebusi, ni bugha ambu, e Yerusalema. Abya n’esyopunda ibiri esihekire, kandi abya n’oghundi mukali wiwe oyo n’omughombe wiwe.
11 Babere bakasonda erihika e Yebusi, ehirimya hyabya ihyamabitsuka eribyayo, neryo omughombe w’omulume oyo mwamubwira ati: “Twanganaluhukira omo muyi ono w’Abayebusi n’erighotseramo?”
12 Aliwe omukama wiwe mwamusubirya ati: “Sitwangaluhukira omo muyi w’abandu abate Baisraeli. Tuyikase, tuyahike e Gibea.”
13 Kandi omulume oyo mwabwira omughombe wiwe ati: “Asa tughende, tuyikase, tuyahike e Gibea, kutse e Rama, tukendighotsera omo mughuma w’oko miyi ibiri eyo.”
14 Neryo mubaghenda, n’eryuba muryalenga ibamabihika hakuhi ne Gibea, omo kiharo ky’Ababenyamini.
15 Neryo mubimana aho, bamingira omo muyi we Gibea batoke eriyaghotseramo. Babere babihika omo muyi oyo, mubikala omo mwanya w’abandu bosi, aliwe omo muyi oyo mumutabanika omundu oyo ababwira ati bayaghotsere ewiwe.
16 Oko ndulya, omo righolo-gholo eryo, omusyakulu mughuma mwalaba aho akalua emoli. Abya isyalyabugha biro binene e Gibea. Abya w’omo kiharo ky’ebitwa kye Efraimu, aliwe abandu b’omo muyi oyo babya Babenyamini.
17 Omusyakulu oyo abere abilangira omulume oyo wabya omo lughendo oyo, iniane omo mwanya w’abandu bosi w’omo muyi oyo, mwamubulya ati: “Ukayahi? Kandi ukaluahi?”
18 Omulume oyo mwamusubirya ati: “Tukalua e Betlehemu eyiri omo kiharo kye Yuda, tukaya omo kiharo ky’ehali ky’ebitwa kye Efraimu, eyo y’ewetu. Mungaya e Betlehemu eyiri omo kiharo kye Yuda, neryo ngaya eyiri enyumba ya Yehova,* aliwe sihali oyo wabirinibwira ati niyaghotsere ewiwe.
19 Tunawite oko biti n’akalyo akatosire ebyo tukendiha esyongamia syetu, ninawite n’oko mikati n’edivai eyitosire eyo tukendirya n’erinywa, ingye, omukali waghe, n’omughombe waghe. Situbulire ekindu.”
20 Aliwe omusyakulu oyo mwabugha ati: “Ubye n’obuholo! Ngendikuha ekyosi-kyosi ekyo ulaghireko, aliwe isiwaghotsera omo mwanya w’abandu bosi.”
21 Neryo mwamutwala ewiwe, amaha esyongamia siwe sy’akalyo. Enyuma sy’aho, mubanaba oko bisando, bamalya n’erinywa.
22 Omughulu babya ibanemuyitsemesya, ebiwere-were by’omo muyi mubyatimba oko nyumba, byamabya bikakongota-kongota oko mulango ko kutsibu. Mubyabwira omusyakulu oyo, omwinye-nyumba, biti: “Hulukaya omulume oyulyingira omo nyumba yaghu, tukaghotsera naye.”
23 Omwinye-nyumba eyo mwahulukira ehihya, amayabwira ebiwere-were ebyo ati: “Kisi baghala betu, isimwakola ekibi kingaha n’ekyo. Omulume oyu ni mugheni waghe, isimwakola omwatsi oyo ow’akit’isoni.
24 Ninawite omwali waghe oyutewataghotsera n’omulume n’oghundi mukali w’omulume oyu ane hano. Ngendibaleterabo. Neryo mwamabya imwanzire, mughotsere n’abo kinyanganga. Aliwe isimwakolera omulume oyo omwatsi oyo ow’akit’isoni.”
25 Aliwe ebiwere-were ebyo mubitahulikirira omusyakulu oyo, neryo omulume oyo mwimya oghundi mukali wiwe oyo, amamutwala eyo biri. Mubyaghotsera naye kinyanganga omo kiro kyosi erihika omo tututu. Bwabere bukasonda erikya, mubyamuleka aghende.
26 Omo tututu, omukali oyo mwabya abihika oko mulango w’enyumba y’omusyakulu eyo mukama wiwe abyamo, mwawa ahisi, amayilambika aho erihika omughulu obutuku bwakya.
27 Omukama wiwe mwabuka omo tututu, amakingula emilango y’oko nyumba akasonda erighenda, neryo mwalangira oghundi mukali wiwe oyo iniabiriyilambika oko mulango w’enyumba, n’ebyala biwe ibine embere sy’omulango.
28 Neryo mwamubwira ati: “Hangana, tughende.” Aliwe mwatamusubirya kindu, neryo omulume oyo mwamuhira oko punda yiwe, amaghenda ewiwe.
29 Abere abihika ewiwe, amimya omuhamba, amahamba oghundi mukali wiwe oyo, amamutwamo ebihande 12, neryo amatuma omo buli kiharo kye Israeli mo kihande kighuma.
30 Abosi abalangira omwatsi oyo mubabugha bati: “Eritsuka ekiro Abaisraeli balua e Misri erihika na lino, sihehatabya omwatsi owali ng’oyu, sitwetwatalola na kugho. Mulengekanaye oko mwatsi oyo, mukole akasyakulu, neryo mukenditubwira ekyo twangakola.”
Amaelezo awehikwa
^ Kinywa kwa kinywa, “eyiri ehema yaghu.”
^ Kutse alinga, “kandi ngakolera oko nyumba ya Yehova.”
