Abatsweri 20:1-48
-
Ebindi bihanda byamayalwa n’Ababenyamini (1-48)
20 Neryo abalume be Israeli mubalua ehosi-hosi eritsuka e Dani oko luhande lw’endata eriyahika e Beeri-sheba oko luhande lw’eyikwa, mubalua n’omo kiharo kye Gileadi, abosi mubahindana haghuma* embere sya Yehova e Mizpa.
2 Abakulu b’abandu, abakulu b’ebihanda byosi bye Israeli babya omo ndeko y’abandu b’oMungu. Habya abasuda 400 000 abakaghenda omo bisandu, ababya bahekire emiyali.
3 Ababenyamini mubowa ngoko abalume be Israeli babirihetukira e Mizpa.
Abalume be Israeli mubabugha bati: “Muteritubwira omwatsi mungaha n’oyu ng’alyakoleka ati.”
4 Neryo Omulawi, omulume w’omukali oyo witawa, mwasubirya ati: “Mungahika e Gibea eyiri omo kiharo kye Benyamini inine n’oghundi mukali waghe nitoke erighotserayo.
5 Aliwe omo kiro, abikalani* be Gibea mubakasyatimba oko nyumba. Balue banzire ibaniita, aliwe oko nduli mubakaghotsera n’oghundi mukali waghe yo kinyanganga, neryo amahola.
6 Neryo mungimaya oghundi mukali waghe oyo, namatwa omubiri wiwe mo bihande-bihande, neryo mungatuma ekihande kighuma omo buli kiharo kye Israeli, kundi abandu abo mubakakola omwatsi owakahemula kandi owakit’isoni omo Israeli.
7 Neryo inywe bandu bosi b’omo Israeli, mutubwire eky’erikola, kandi nga mwamayisogha muti.”
8 Neryo abandu bosi mubahangana,* bamabugha bati: “Sihali n’omundu n’omughuma oyukendisuba omo hema yiwe, kutse eka wiwe.
9 Kino kyo tukendikolera Gibea: Tukendikola obukanga tutoke eriminya abakendiyalwa n’omuyi oyo.
10 Omo buli kihanda kye Israeli, oko balume 100, tukendibya tukimyako abalume 10, oko balume 1 000 itwimyako abalume 100, n’oko balume 10 000 itwimyako abalume 1 000. Tukendibaha omubiiri w’erisongya-songerya abasuda b’akalyo, kusudi abasuda bayalwe n’omuyi we Gibea owabya omo kiharo kya Benyamini busana n’omwatsi owakit’isoni ogho abandu abikereyo balyakola omo Israeli.”
11 Abalume bosi be Israeli ko bahindana batya haghuma* ng’abandu ababiriyighunga haghuma busana n’eriyalwa n’omuyi oyo.
12 Neryo ebihanda bye Israeli mubyatuma abalume oko balume b’omo kihanda kya Benyamini bati bayababwire ambu: “Mwanganatoka erikola ekingaha n’eki?
13 Mulete ebiwere-were ebiri omo Gibea tutoke eritabyo n’erilusya ekindu kibi ky’omo Israeli.” Aliwe Ababenyamini mubatowa abaghala babo Baisraeli.
14 Neryo Ababenyamini mubalua omo miyi, bamahindana haghuma batoke eriyalwa n’Abaisraeli e Gibea.
15 Ekiro ekyo, Ababenyamini mubahindania abalume 26 000 abalua omo miyi yabo. Babya ibanahekire emiyali. Habya n’abandi balume 700 be Gibea ababya basi erilwa.
16 Omo basuda abo, mwabya abasuda 700 abasi erilwa. Ibakakolesaya ebyala by’amalembe. Ibakabya babighusa eribwe ry’omo mujeledi wabo, isihali erikaswata, n’oluywiri n’olughuma isilwangabala.
17 Abalume be Israeli mubahindania abalume 400 000 ababya bahekire emiyali, abosi babya basi erilwa. Omo balume abo, simwabya ab’omo kihanda kya Benyamini.
18 Mubaghenda, bamahetukira e Beteli. Mubayayo busana n’eriminya ebyo oMungu akendibabwira. Neryo abandu be Israeli mubabulya oMungu bati: “Nindi y’ukenditubera embere omughulu tukendiyalwa n’Ababenyamini?” Yehova mwabasubirya ati: “Ekihanda kya Yuda kyo kikendibya embere.”
19 Enyuma sy’aho, Abaisraeli mubabuka omo tututu, bamayahira ekambi yabo hakuhi ne Gibea batoke erilwa n’omuyi oyo.
20 Neryo abalume be Israeli mubayalwa n’Ababenyamini, bamayipanga busana n’amalwa batoke erilwa n’Ababenyamini e Gibea.
21 Neryo ekiro ekyo, Ababenyamini mubalua e Gibea, bamita abalume 22 000 be Israeli.
22 Aliwe abasuda be Israeli mubabya n’obutubaha kandi bamayipanga busana n’amalwa aho bayipanga ekiro ky’erimbere.
23 Neryo abalume be Israeli mubahetukira e Beteli, bamayalirira embere sya Yehova erihika omw’igholo. Mubabulya Yehova bati: “Twanganatasyayalwa n’abaghala betu Ababenyamini?” Yehova mwabasubirya ati: “Muyalwe nabo.”
24 Neryo ekiro ky’akabiri, Abaisraeli mubaya eyiri Ababenyamini.
25 Ababenyamini nabo mubalua e Gibea bakasyalwa nabo omo kiro ky’akabiri ekyo. Mubita abandi balume be Israeli 18 000, abosi babya bahekire emiyali.
26 Neryo abalume bosi be Israeli mubahetukira e Beteli, bamalira n’erikala aho embere sya Yehova. N’omo kiro ekyo, mubakola amafungo erihika omw’igholo. Mubaherera n’amahere w’eryokererya n’amahere w’obuholo embere sya Yehova.
27 Enyuma sy’aho, abalume be Israeli mubabulya Yehova nga bayire bati, kundi erisanduku ry’endaghane ry’oMungu w’ekwenene ryabya irineyo oko mughulu oyo.
28 Oko mughulu oyo, Finehasi mughala wa Eleazari, mughala wa Haruni, yo wabya muhereri oyo wabya akakolera embere sy’erisanduku. Mubamubwira ambu abulaye oMungu ati: “Twanganatasyayalwa n’abaghala betu, Ababenyamini, kutse tulekere aho?” Yehova mwabasubirya ati: “Muyalwe nabo, kundi omungya ngendisyahirabo omo byala byenyu.”
29 Neryo Abaisraeli mubatimbya abalume b’oko muyi we Gibea, bakalimbyagho.
30 Ekiro ky’akasatu, Abaisraeli mubayalwa n’Ababenyamini, bamayipanga busana n’amalwa hakuhi ne Gibea, ngoko banakola embere.
31 Omughulu Ababenyamini balua omo muyi bakayalwa n’abasuda, mubatwalwa hali n’omuyi. Ababenyamini mubatsuka erilwa, bamita abasuda balebe omo syozira nene-nene, ngoko banakola embere. Endaki nguma yabya ikalola e Beteli, n’eyindi e Gibea. Ababenyamini mubita abalume hakuhi 30 be Israeli omo kisuki.
32 Neryo Ababenyamini mubabugha bati: “Kandi twamabibasinga ng’ebindi biro.” Aliwe Abaisraeli mubabugha bati: “Tusube enyuma tutoke eribatwala hali n’omuyi, tubatwale eyiri esyonzira nene-nene.”
33 Neryo abalume bosi be Israeli mubalua omo myanya yabo, bamayipanga e Baal-tamari busana n’erilwa. Oko mughulu oyo, Abaisraeli ababya bakalimbya mubalua eyo babya babiseme omo biharo by’ehakuhi ne Gibea.
34 Neryo abalume 10 000 be Israeli abasi erilwa mubahika hakuhi ne Gibea, amalwa abya akalire. Aliwe Ababenyamini mubataminya ngoko obuhanya bukendibahikira.
35 Yehova mwawatikya Abaisraeli erisinga Ababenyamini. Ekiro ekyo, Abaisraeli mubita Ababenyamini 25 100, abosi babya bahekire emiyali.
36 Aliwe omughulu Ababenyamini balangira abalume be Israeli bakasuba enyuma, mubalengekania bati kandi bakendisingabo. Aliwe mubasuba enyuma kundi babya bayiketere abasuda ababya ibabiribisama, ababya ibabiritimba oko muyi we Gibea bakalimbya.
37 Abasuda ababya bakalimbya mubayira luba-luba, bamalolera e Gibea. Enyuma sy’aho, mubayitsatsanga omo muyi oyo n’eriita abandu bosi b’omo muyi oyo omo muyali.
38 Abalume be Israeli babya ibabiribwira abasuda ababya bakalimbya bati bakenditumbya omuki, abalume be Israeli batoke eriminya ngoko bamabihamba omuyi.
39 Amalwa akalola embere, Abaisraeli mubasuba enyuma, neryo Ababenyamini mubatsuka erilwa nabo n’eriita Abaisraeli hakuhi 30. Neryo Ababenyamini mubabugha bati: “Kandi tukendibasinga, ngoko twabasinga omo wandi malwa.”
40 Aliwe omuki owali ng’enduyi mwatsuka erihetuka omo muyi, omuki oyo abya akakangania ngoko omuyi wabo amabihambwa. Ababenyamini babere babikeba, mubalangira omuyi wabo wosi akaluamo ebirimi by’omuliro, bikerukira elubula.
41 Neryo abalume be Israeli mubabinduka n’erilwa nabo, n’Ababenyamini mubahwerekerera, kundi mubalangira ngoko obuhanya bwabiribahikira.
42 Neryo Ababenyamini mubasuba enyuma bakasagha Abaisraeli, bamalolera eyiri embwarara, aliwe amalwa mwabakwama, n’abalume ababya bakalua omo muyi nabo mubabya bakita Ababenyamini.
43 Mubatimba oko Babenyamini, bamabakwamirira butsir’ibaha akanya k’eriluhuka. Mubabasinga hakuhi ne Gibea, erilolera oko luhande lw’eyo ryuba rikasira.
44 Oko mwiso, Ababenyamini 18 000 mubakwa, abosi babya basuda b’amaka.
45 Ababenyamini mubasuba enyuma, bamatibita omo mbwarara, eyiri olubwe* lwe Rimoni. Abaisraeli mubita abandu 5 000 omo syonzira nene-nene, mubakwamirira Ababenyamini eriyahika e Gidomu, bamatasyita abandi 2 000.
46 Ababenyamini bosi abitibawa ekiro ekyo babya 25 000, babya bahekire emiyali, kandi abosi babya basuda b’amaka.
47 Aliwe Ababenyamini 600 mubatibitira omo mbwarara, eyiri olubwe* lwe Rimoni. Mubabugha eyiri olubwe lwe Rimoni emisi ini.
48 Kandi abalume be Israeli mubayalwa n’Ababenyamini omo muyi, mubita abandu, esyonyama, omo muyali. Mubita abosi abasighala, kandi mubatimya emiyi yosi eyo babya bakalabamo.
Amaelezo awehikwa
^ Kinywa kwa kinywa, “ng’omundu mughuma.”
^ Kutse alinga, “abenye kitaka.”
^ Kinywa kwa kinywa, “mubahangana ng’omundu mughuma.”
^ Kinywa kwa kinywa, “ng’omundu mughuma.”
^ Kutse “olukuka.”
^ Kutse “olukuka.”
