Abatsweri 21:1-25
-
Ekihanda ky’Ababenyamini kyamasabulwa (1-25)
21 Neryo abalume be Israeli mubalapa ibane e Mizpa bati: “Sihali n’omughuma w’okw’ite oyukendisyaligha ati mwali wiwe atahibawe n’Omubenyamini.”
2 Neryo Abaisraeli mubasa e Beteli, bamikalayo embere sy’oMungu w’ekwenene erihika omw’igholo, mubalaka n’erilira kutsibu.
3 Babya bakabugha bati: “Yehova oMungu we Israeli, ekingaha n’eki kyamabya omo Israeli mo busanaki? Busanaki ekihanda kighuma kibulirane omo bihanda bye Israeli munabwire?”
4 Ekiro ekikwamire abandu mubabuka omo tututu, bamahimbayo ekiherero batoke eriherera amahere w’eryokererya n’aw’obuholo.
5 Neryo abandu be Israeli mubabugha bati: “Ni bahi b’omo bihanda byosi bye Israeli abatalyasyahindana embere sya Yehova?” Babya ibabirilapa bati oyutendihika e Mizpa embere sya Yehova, litolere initibwa.
6 Neryo Abaisraeli mubayikubya b’omo busana n’ekiryahikira abaghala babo, Ababenyamini. Mubabugha bati: “Munabwire, ekihanda kighuma kyabirilua oko bihanda by’Abaisraeli.
7 Twabirilapa embere sya Yehova tuti omw’itwe simwendibya oyukendiligha ati mwali wiwe atahibawe n’Ababenyamini. Neryo tukendiyira tuti Ababenyamini abalyasaka batoke eribya n’abakali?”
8 Mubabulya bati: “Ni bahi b’omo bihanda byosi bye Israeli abatalyahika embere sya Yehova e Mizpa?” Neryo mubafumbula ngoko e Yabeshi-gileadi muyitetalua n’omughuma oyo wasa omo kambi eyo abandu babya bahindene.
9 Mubabya babighanza abandu, mubafumbula ngoko omo bandu abali aho simuli n’omughuma owe Yabeshi-gileadi.
10 Neryo abandu ababya bahindene aho mubatuma e Yabeshi-gileadi y’abasuda 12 000 b’amaka. Mubababwira bati: “Muyite abandu be Yabeshi-gileadi omo muyali, mwite nibya n’abakali n’abana.”
11 Ekyo mukendikola kya kino: Mwite obuli mulume n’obuli mukali oyo wabirighotsera n’omulume.”
12 Omo bakalani be Yabeshi-gileadi mumwasungika abambesa 400 abate bataghotsera n’abalume, babya babikira. Neryo mubatwalabo omo kambi e Shilo, eyiri omo kiharo kye Kanana.
13 Neryo endeko yosi muyatuma omulaghe oko Babenyamini ababya ahali olubwe* lwe Rimoni, mubababwira bati bakole obuholo.
14 Neryo oko mughulu oyo, Ababenyamini mubasuba ewabo. Abaisraeli mubahabo abakali abasaka oko bakali be Yabeshi-gileadi, aliwe mubataghonera kubo.
15 Neryo abandu mubabya omo bulighe busana n’ekiryahikira Ababenyamini, kundi Yehova abya iniabirilusya ekihanda ekyo oko bindi bihanda bye Israeli.
16 Abasyakulu b’omo Baisraeli ababya bahindene mubabulya bati: “Abakali bosi b’omo kihanda ky’Ababenyamini babiritibwa. Neryo tukendiyira tuti abalume abatebasunga abakali n’abo basunge abakali?”
17 Kandi mubabugha bati: “Litolere Ababenyamini abakisiya ibabya ibanemuteya omwandu wabo, ekihanda kighuma kikasyabula oko bihanda bye Israeli.
18 Aliwe situhamulirwe eribaha abali betu mo bakali babo, kundi abandu be Israeli babirilapa bati: ‘Atakirawe omundu wowi-wosi oyukaligha ati mwali wiwe atahibawe n’Omubenyamini.’”
19 Neryo mubabugha bati: “Obuli mwaka, efete ya Yehova si yikabya e Shilo, e Shilo eyiri oko luhande lw’endata lwe Beteli, oko luhande lw’eyo ryuba rikasira olw’endaki nene eyikaya e Beteli, ebwanga Shekemu, n’oko luhande lw’eyikwa, n’oko luhande lw’eyikwa lwe Lebona.”
20 Neryo mubabwira abalume be Benyamini bati: “Muyalimbiraye omo malima w’emizabibu.
21 Mukendibya mwabilangira abambesa be Shilo bakalua omo muyi bakasata amasata w’eriyitimba-timbako, obuli mundu akendilua oho abiseme omo malima w’emizabibu n’eriyimirya oko bambesa be Shilo ko mughuma, n’enyuma sy’aho imwasuba omo kiharo ky’Ababenyamini.
22 Neryo abobaba wabo kutse abaghala babo bamabisyasa neryo ibayilungumula okw’itwe, tukendisyababwira tuti, ‘Mutukanganaye olukogho busana n’abandu abo, kundi mututetatoka erihamba abakali abaghonere omo malwa abo twangahere obuli mughuma wa kubo, kandi nenyu mwabya isimwangatoka eribaha abakali, kundi mwamabibahabo, isimwetasikya ebyo mwalapa.’”
23 Neryo abalume be Benyamini mubakola ebyo bababwira ambu bakole, obuli mundu mwaleta omukali oyo imaya oko bambesa ababya bakasata. Enyuma sy’aho, mubasuba omo kiharo ekyabya ewabo, mubahimba emiyi yabo n’erikala muyo.
24 Neryo oko mughulu oyo, Abaisraeli mubayipanza-panza, obuli mundu mwasuba omo kihanda kiwe n’omo nyumba yiwe. Mubalua aho, obuli mundu amasuba omo kiharo ekyabya mwandu wiwe.
25 Oko biro ebyo, e Israeli siyabya mwami. Neryo obuli mundu iniakakola ekyo akalangira mo kyuwene.
Amaelezo awehikwa
^ Kutse “olukuka.”
