Abatsweri 3:1-31
3 Bino by’ebihanda ebyo Yehova aleka omo kihugho bitoke erilenga oko Baisraeli abatalwa oko malwa we Kanana
2 (byabya bitya kusudi ebizazi* by’Abaisraeli ebikwamire bitoke eriminya amalwa, ebyatalola oko myatsi eyo kw’embere):
3 Abami batano b’Abafilistini, Abakanana bosi, n’Abasidoni n’Abahivi bosi ababya bikere omo Kitwa kye Lebanoni, omo kati-kati k’Ekitwa kye Baali-hermoni ne Lebo-hamati.*
4 Ebihanda ebyo byabya nzira y’erilenga oko Baisraeli erilebya nga banemwendikwama emighambo ya Yehova eyo aha abobaba wabo erilabira Musa.
5 Neryo Abaisraeli mubikala omo kati-kati k’Abakanana, Abahiti, Abaamori, Abaperizi, Abahivi, n’Abayebusi.
6 Abaisraeli babya bakalunga n’abambesa b’omo bihanda ebyo, n’abo mubabya bakalighira abali babo batahibawe n’abalume b’omo bihanda ebyo, kandi mubatsuka erikolera emiungu y’ebihanda ebyo.
7 Neryo Abaisraeli mubakola emyatsi mibi embere sya Yehova. Mubibirirwa Yehova oMungu wabo, bamakolera Esyobaali n’emiti mibuyirire.*
8 Neryo Yehova mwahitana oko Baisraeli ko kutsibu, kandi mwahirabo omo byala bya Kushani-rishataimu, omwami we Mesopotamia. Abaisraeli mubakolera Kushani-rishataimu omo myaka 8.
9 Abaisraeli mubabya babisaba Yehova y’obuwatikya, Yehova mwabaha omusabuli atoke eribasabula. Mwabaha Otnieli, mughala wa Kenazi, mulere wa Kalebu.
10 Ekirimu kya Yehova mukyabya okw’iye, neryo mwabya mutsweri w’Abaisraeli. Omughulu Otnieli aya oko malwa, Yehova mwamuwatikya erisinga Kushani-rishataimu, omwami we Mesopotamia. Neryo Otnieli mwasinga Kushani-rishataimu.
11 Enyuma sy’aho, ekihugho mukyabyamo buholo omo myaka 40. Neryo Otnieli, mughala wa Kenazi, mwahola.
12 Kandi Abaisraeli mubatsuka erikola emyatsi eyituwene embere sya Yehova. Neryo Yehova mwaleka Egloni, omwami w’Abamoabu, asinge Abaisraeli kundi mubakola emyatsi eyituwene omo meso wa Yehova.
13 Kandi Egloni mwaleta Abaamoni n’Abaamaleki balwe n’Abaisraeli. Mubalwa n’Abaisraeli n’erihamba omuyi owalimo emiti y’esyotende.
14 Abaisraeli mubakolera Egloni, omwami we Moabu, omo myaka 18.
15 Neryo Abaisraeli mubasaba Yehova y’obuwatikya, na Yehova mwabaha omusabuli, ye Ehudi, mughala wa Gera, omubenyamini. Abya iniakakolesaya ebyala by’amalembe. Habere habihwa mughulu mulebe, Abaisraeli mubatuma Ehudi atwalire Egloni omwami we Moabu y’engemo.
16 Oko mughulu oyo, Ehudi abya iniabiriyikokoterya omuyali owakatwira oko syombande ibiri. Omuyali oyo abya n’obuli b’okuboko* kughuma. Mwabisagho omo lukimba lwiwe, oko kihinga kiwe ky’amali.
17 Neryo mwaletera engemo eyo yo Egloni, omwami we Moabu. Egloni abya iniabirineneha kutsibu.
18 Ehudi abere abiha abandu b’engemo eyo, mwaghenda haghuma n’abandu abo ababya bahekire engemo.
19 Aliwe mwabya abihika hakuhi n’esyosanamu esibatsire,* e Gilgali, mwasuba enyuma, amayabwira omwami ati: “Ninawite omwatsi w’erikubwira isihali bandu.” Neryo omwami mwabugha ati: “Muhune!” Neryo abaghombe biwe bosi mubaluaho.
20 Neryo Ehudi mwaseghera hakuhi n’omwami. Omwami abya inianikere omo kyumba kiwe ky’endata mw’iyuwene. Neryo Ehudi mwamubwira ati: “OMungu mwakanituma okw’iwe.” Neryo omwami mwahangana oko kitumbi kiwe ky’obwami.*
21 Neryo Ehudi mwasosola omuyali wiwe oko kihinga kiwe ky’amali, mwahambagho omo byala biwe by’amalembe, n’erikundagho omo nda ya Egloni.
22 Omuyali n’ekirindi mubyingira omo nda ya Egloni, neryo ebisabu byamadaimanira oko muyali. Ehudi mwatalusya omuyali oyo omo nda ya Egloni. N’amabi mwaluamo.
23 Ehudi abere abikinga emilango yosi y’oko kyumba ky’endata n’erihira kuyo kw’ehikale, mwaluaho, amalaba omo baraza.*
24 Mwabya abighenda, abaghombe bw’omwami mubasa, bameya emilango y’ekyumba kiwe ky’endata iyinakingire. Mubabugha bati: “Anganabya iniabiriya ekabine* omo kyumba ky’emwisi ekihehere.”
25 Mubalinda omo mughulu muli. Neryo babere babilangira ngoko omwami syetakingula emilango y’ekyumba ky’endata, mubahangya-hangya. Neryo mubimya olufungura, bamakingula emilango eyo. Babere babikingula, mubalangira omukama wabo iniane ahisi, iniabirihola!
26 Omughulu babya bakalinda-linda, Ehudi mwanyururuka, mwalaba hakuhi n’esyosanamu esibatsire,* amayahika e Seira yo mbolere.
27 Mwabya abihika, mwabuha omo rihembe omo kiharo ky’ebitwa kye Efraimu. Abaisraeli mubandaghalira omo kiharo ky’ebitwa, Ehudi inianemubasondola.
28 Neryo mwabwirabo ati: “Munikwame, kundi Yehova abirihira esyonzighu syenyu, ni bugha ambu Abamoabu, omo byala byenyu.” Neryo mubamukwama, bamayahamba ebisokero bye Yordani batoke erikakirya Abamoabu erisoka. Mubatalighira n’omundu n’omughuma erisoka.
29 Oko mughulu oyo, mubita Abamoabu hakuhi 10 000, abosi babya balume b’amaka, kandi abatesagha. Muhatabala n’omughuma.
30 Eritsuka ekiro ekyo, Abaisraeli mubasinga Abamoabu, neryo ekihugho mukyabyamo buholo omo myaka 80.
31 Oyo wasubuka Ehudi abya Shamgari, mughala wa Anati. Mwita Abafilistini 600 omo muhunda w’eribingamo* esyonde. Naye mwasabula Abaisraeli.
Amaelezo awehikwa
^ Kutse “esyondengo.”
^ Kutse “omulango we Hamati.”
^ Ulebaye Amaana w’ebinywa.
^ Alinga ni kuboko kukuhi okw’esyosantimetre 38. Ulebaye Endomeko B14.
^ Kutse alinga, “n’emyanya y’eritakulamo ebindu by’obughuli; n’amakariere.”
^ Kutse “kitumbi.”
^ Kutse alinga, “kyuna ekikingiraya akabeho.”
^ Kinywa kwa kinywa, “inianemuswika ebisando biwe.”
^ Kinywa kwa kinywa, “n’emyanya y’eritakulamo ebindu by’obughuli; n’amakariere.”
^ Ni fimbo eyiyitsongire y’eribingamo.
