Abatsweri 4:1-24
4 Ehudi mwabya abihola, kandi Abaisraeli mubakola ebituwene embere sya Yehova.
2 Neryo Yehova mwahirabo omo byala bya Yabini, omwami we Kanana, oyo wabya akatabala e Hazori. Omukulu w’abasuda biwe abya iyo Sisera, abya ikere e Harosheti y’ebihanda.*
3 Abaisraeli mubasaba Yehova y’obuwatikya. Yabini abya n’emitoka 900 y’amalwa eyabyako ebiringo ebiriko ebindu ebitwire.* Mwaghalya Abaisraeli bo kutsibu omo myaka 20.
4 Omuminyereri mukali ye Debora, mukali wa Lapidoti, yo wabya akatswera Abaisraeli oko mughulu oyo.
5 Debora abya abeghere erikala omo ndina y’omuti w’etende wa Debora omo kati-kati ke Rama ne Beteli, omo kiharo ky’ebitwa kye Efraimu. Abaisraeli ibakayasungana naye atoke eribabwira oMungu ng’amabasoha lwahi.
6 Debora mwatuma omundu ayaronde Baraka, mughala wa Abinoamu, e Kadeshi-naftali. Baraka abere abihika, Debora mwamubwira ati: “Yehova oMungu we Israeli abiribugha ati: ‘Ughende* oko Kitwa kye Tabori, ughende haghuma n’abalume 10 000 b’omo kihanda kya Naftalli n’ekya Zabuloni.
7 Ngendikuletera Sisera, omukulu w’abasuda ba Yabini n’emitoka yiwe, n’abasuda biwe ahali Olusi* lwe Kishoni. Ngendikuwatikya erimusinga.’”
8 Baraka mwasubirya Debora ati: “Wamaghenda haghuma naghe, ingendighenda. Aliwe utetaghenda haghuma naghe, isinendighenda.”
9 Debora mwamusubirya ati: “Ngendighenda haghuma naghu. Aliwe amalwa aya agho tukayalwa syendikuletera olukengerwa, kundi oyo Yehova akendikolesya erisinga Sisera ni mukali.” Neryo Debora mwahangana, amaghenda na Baraka e Kedeshi.
10 Baraka mwahindania ekihanda kya Zabuloni n’ekya Naftali e Kedeshi, n’abalume 10 000 mubaghenda naye. Na Debora mwaghenda naye.
11 Heberi Omukeni abya iniabiriyihighula oko bandi Bakeni, ni bugha ambu abana ba Hobabu, tata-byala wa Musa. Abya iniabirihimba ehema yiwe hakuhi n’omuti munene we Zaananimu, owali e Kedeshi.
12 Mubabwira Sisera ngoko Baraka, mughala wa Abinoamu, abiryerukira oko Kitwa kye Tabori.
13 Sisera mwalw’iniakuma-kuma emitoka yiwe y’amalwa, emitoka 900 eyabyako ebiringo ebiriko ebindu ebitwire* n’abasuda bosi abalua naye e Harosheti y’ebihanda bakaya oko Lusi* lwe Kishoni.
14 Neryo Debora mwabwira Baraka ati: “Hangana, kundi munabwire Yehova akendikuwatikya erisinga Sisera. Yehova abirikubera embere.” Neryo Baraka mwalua oko Kitwa kye Tabori haghuma n’abalume 10 000 ababya bakamukwama.
15 Neryo Yehova mwadunga Sisera n’emitoka yiwe y’amalwa n’abasuda biwe bosi embere sy’omuyali wa Baraka. Sisera mwabya abilangira ebyo, mwalua omo mutoka wiwe, amatibita omo bisando.
16 Baraka mwakwama emitoka y’amalwa n’abasuda ba Sisera eriyahika e Harosheti y’ebihanda, neryo abasuda bosi ba Sisera mubitibwa omo muyali. Muhatasaka n’omughuma.
17 Aliwe Sisera iye mwatibita omo bisando, amayahika omo hema ya Yaeli, muka Eberi Omukeni, kundi Yabini, omwami we Hazori, abya iniakahulikirirana n’ekihanda kya Heberi Omukeni.
18 Neryo Yaeli mwasyakokya Sisera. Mwamubwira ati: “Mukama waghe, ingira, hweramo. Isiwasagha.” Neryo mwingira omo hema ya Yaeli, na Yaeli mwamuswika obulangiti.
19 Neryo Sisera mwabwira Yaeli ati: “Kisi umbe oko maghetse w’erinywa, kundi enyota ikambolaya.” Neryo Yaeli mwakingula etsupa y’engobi eyirimo amaziwa, amamuhayo anywe. Mwabya abinywa, Yaeli amatasyamuswika.
20 Sisera mwamubwira ati: “Wimane oko mulango w’ehema. Omundu amabyasa, n’erikubulya ati, ‘Muno simwetingira omulume?’ iwabugha uti, ‘Iyehe!’”
21 Aliwe Yaeli, muka Heberi, mwimya omusumari w’ehema n’ehama. Sisera abya iniabiriyato kutsibu kundi iniabiriluha, neryo Yaeli mwasa aho ali akambomba, amingirya omusumari omo mutwana* wiwe n’erilabiryagho omo kitaka, neryo Sisera mwahola.
22 Neryo Baraka mwahikayo akakwamirira Sisera. Yaeli mwayamukokya, amamubwira ati: “Asa, ngendikukangania omulume oyo ukaronda.” Baraka mwingira omo hema ya Yaeli, amalangira Sisera inianaghotsere, iniabirihola, n’omusumari w’ehema iniabirilaba omo mutwana* wiwe.
23 Neryo ekiro ekyo, oMungu mwawatikya Abaisraeli erisinga Yabini, omwami we Kanana.
24 Abaisraeli mubalwa amalwa awakalire na Yabini, omwami we Kanana, erihika okw’ita Yabini, omwami we Kanana.
Amaelezo awehikwa
^ Kutse “Harosheti-hagoimu.”
^ Kinywa kwa kinywa, “emitoka y’ekyuma.”
^ Kutse “Utwale abalume baghu.”
^ Kutse “omusya owakumamo amaghetse.”
^ Kinywa kwa kiywa, “emitoka y’ekyuma.”
^ Kutse “musya owakumamo amaghetse.”
^ Ni mwanya owali omo kati-kati k’okutu n’eriso.
^ Ni mwanya owali omo kati-kati k’okutu n’eriso.
