Abatsweri 5:1-31
5 Ekiro ekyo, Debora na Baraka mughala wa Abinoamu mubimba olwimbo luno:
2 “Kundi abalwi be Israeli sibetaboha esyonzwiri syabo,Kundi abandu babiriyiherera omw’anza,Mupipe Yehova!
3 Muhulikirire, inywe bami! Muteghe amatwi, inywe basondoli!
Ngendimbira Yehova.
Ngendipipa Yehova,* oMungu we Israeli omo lwimbo.
4 Yehova, omughulu walua e Seiri,Omughulu walua omo kiharo kye Edomu,Ekitaka mukyalabamo omusiki,N’olubula mulutula amaghetse,N’ebitu mubyutula amaghetse awabya mubyo.
5 Ebitwa mubyahwerekerera* embere sya Yehova,Nibya n’Ekitwa kye Sinai mukyahwerekerera embere sya Yehova, oMungu we Israeli.
6 Oko mughulu wa Shamgari, mughala wa Anati,Oko mughulu wa Yaeli, esyondaki musitasungikamo abandu;Abaghendi-ghendi mubabya bakalaba omo hiyira hike-hike.
7 Ababya bikere omo milongo ye Israeli mubatasyabyayo,Mubabuliranayo erihika omughulu ingye Debora, nahangana,Erihika omughulu nahangana nga mama omo Israeli.
8 Abandu mubayisombolera emiungu mihya-mihya;Neryo oko milango y’emiyi mukwabya amalwa.
Omo basuda 40 000 be Israeli,Mwabya isimwangasungika oyuwite engabo kutse eritumo.
9 Omutima waghe ali haghuma n’abakomanda b’abasuda be Israeli,Abalyaghenda n’abandu omw’anza.
Mupipe Yehova!
10 Inywe mukaghenda oko syopunda nyeru-nyeru,Inywe mwikere oko syotapi esyuwene-wene,N’inywe mukalaba omo ndaki,Mulengekanaye okw’eki:
11 Hakuhi n’aho bakatehera amaghetse habya hakasira emilenge y’abandu ababya bakaghabira abandu b’amaghetse;Babya bakakania oko myatsi eyitunganene ya Yehova,Emyatsi eyitunganene eyo bandu biwe abikere oko milongo bakakola.
Neryo abandu ba Yehova mubaya oko milango y’emiyi.
12 Debora, buka, buka!
Buka, buka, wimbe olwimbo!
Baraka hangana, utwale abanyewa baghu, iwe mughala wa Abinoamu!
13 Neryo ababala mubasa eyiri abakulu;Abandu ba Yehova mubasa eyo niri busana n’erilwa n’abandu b’amaka.
14 Babya bandu be Efraimu, abali omo musya;*Benyamini, banemukukwama n’abasuda baghu.
Abakomanda mubakalua e Makiri,N’abahekire omutso* w’oyukahandika abandu abanzire eribya basuda mubakalua e Zabuloni.
15 Abakulu b’omo kihanda kya Isakari bali na Debora,Baraka mwakakola nga Isakari.
Mwakatumawa omo ribanda, mwakayayo omo bisando.
Abandu b’omo bikuto by’ekihanda kya Rubeni babya bakatika-tika.
16 Busanaki wabirikala omo kati-kati k’ebitiri bibiri ebiri oko kitumbi ekiri oko punda?
Kandi busanaki mukahulikirira abalisya abakawatira esyonyama syabo sy’enyabulere?
Abandu b’omo bikuto by’ekihanda kya Rubeni mubatika-tika.
17 Gileadi mwasighere oko ghundi musirya we Yordani;Busanaki na Dani naye mwasighere hakuhi n’amato?
Asheri alw’ikere oko musike w’engetse isyawite ekyo akakola,Kandi mwakasighala hakuhi n’aho mato akimana.
18 Zabuloni ni kihanda ky’abandu abalyahira engebe yabo y’omo bwiko.*
Sibetasagha n’oluholo;Ngoko Naftali naye alyakola oko hitwa.
19 Abami mubakasa e Tanaki,Hakuhi n’amaghetse we Megido, n’erilwa;Abami be Kanana mubakalwa,Aliwe mubatetanyegha efeza.*
20 Esyongununu musikalwa isine elubula,Musikalwa na Sisera isine omo syonzira syasyo.
21 Olusi lwe Kishoni mulukasendaya esyonzighu,Olusi lwa kera, olusi lwe Kishoni.
Iwe nafsi* yaghe, mughukalyatangira abandu b’amaka.
22 Ebighera by’esyosabayiri* mubikalyatanga ekitakaOmughulu esyonume sy’esyosabayiri syabya isyabiritibita kutsibu.
23 Omumalaika wa Yehova mwakabugha ati:
‘Mutakire Merozi,’‘Mutakire abikalani bayo,Kundi mubatitasa erisyawatikya Yehova,Mubatasa n’abalume babo b’amaka erisyawatikya Yehova.’
24 Omukali oyo wabiritsumulwa omo bakali bosi ni Yaeli,Muka Eberi Omukeni,Yo mukali oyo wabiritsumulwa omo bakali bosi abikere omo mahema.
25 Sisera mwakamusaba amaghetse; iye amamuha amaziwa.
Mwakamuhagho omo kibakuli ekikakolesibawa oko fete, mwakamuha amaziwa awadaimene.
26 Mwakimaya omusumari w’ehema omo byala biwe bighuma,Amahamba n’ehama y’omufundi omo byala biwe by’amali,Amakongomerera Sisera omo hama yiwe, amahutalya omutwe wa Sisera,Mwakahutalaya n’eritobola emitwana* ya Sisera.
27 Neryo Sisera amawa omo kati-kati k’ebisando biwe, amayilunda ahisi n’erilambukala;Mwawa omo kati-kati k’ebisando biwe n’eriyilunda ahisi;Ahanawa h’anahalyayilunda ahisi iniabirisingwa.
28 Omukali mughuma mwabya akalebererya omo ridirisa,Mama wa Sisera abya akalebererya omo kayingilo k’eridirisa,‘Busanaki omutoka wiwe syetasa luba?
Busanaki sindinowa ebikindo by’esyosabayiri* esikakura emitoka yiwe?’
29 Abakali b’amenge omo bakali biwe abasikibwe babya bakamusubirya;Naye, abya akayibwira ati,
30 ‘Esaha eno banganabya ibanemughaba ebindu ebyo balyanyegha,Obuli musuda, omumbesa mughuma, kutse ababiri,Olukimba olwabirihirwamo erangyi lukendibya lwa SiseraOlukimba olwabirihirwamo erangyi, olukimba oludesire,Olukimba olwabirihirwamo erangyi, esyongyimba ibiri esidesire,Esyo abalyanyegha bakendibya bakambala oko bikya.’
31 Yehova, esyonzighu syaghu syosi sihweho,Aliwe abakwanzire babye ng’eryuba omughulu rikahuluka omo lukengerwa lwaryo.”
Ekihugho mukyabyamo obuholo omo myaka 40.
Amaelezo awehikwa
^ Kutse “Ngendiwatira Yehova y’omuziki.”
^ Kutse alinga, “mubyatitimana.”
^ Kutse “ribanda.”
^ Kutse alinga, “n’abakakolesaya ebyombo by’omuhandiki.”
^ Kutse “abalyapokaya esyonafsi syabo.”
^ Ni kindu ky’obughuli ekikalua omo kitaka.
^ Ulebaye Amaana w’ebinywa.
^ Kutse “by’esyofarasi; by’esyoshevale.”
^ Ni myanya eyiri omo kati-kati k’okutu n’eriso.
^ Kutse “by’esyofarasi; by’esyoshevale.”
