Abatsweri 6:1-40
6 Aliwe kandi Abaisraeli mubakola ebituwene embere sya Yehova, neryo Yehova mwabahira omo byala by’Abamidiani omo myaka 7.
2 Abamidiani mubaghalya Abaisraeli. Abamidiani mubaleka Abaisraeli ibayironderya emyanya y’eribisamamo* omo bitwa, omo myangalu, n’omo myanya eyo rikalire erihikamo.
3 Abaisraeli ibakabya babihera akalyo, Abamidiani, Abaamaleki, n’abandu b’oko luhande lw’eyikasira eryuba ibakasyalwa nabo.
4 Ibakahimba ekambi yabo omo kiharo kye Israeli, n’eritsandya akalyo erihika e Gaza. Isibalisighira Abaisraeli bo kindu ky’erirya, nibya isibalibasighira embuli, enume y’ende, kutse epunda.
5 Ibakasa n’esyonyama syabo, esyohema syabo. Ini banene ng’esyongyike, ibo n’esyongamia syabo, isibangaghanzwa. Ibakasa busana n’eritsandya ekiharo ekyo.
6 Neryo Abaisraeli mubabya bera busana n’Abamidiani, neryo mubasaba Yehova y’obuwatikya.
7 Abaisraeli mubabya babisaba Yehova y’obuwatikya busana n’Abamidiani,
8 Yehova mwabatumira omuminyereri. Omuminyereri oyo mwababwira ati: “Yehova oMungu wa Israeli ati, ‘Munabalusya e Misri n’omw’ikola ekyo namabalusya omo nyumba y’obukobe.
9 Neryo munabalusya omo byala by’Abamisri n’abosi ababya bakabaghalya. Ababya bakabaghalya, munabalusya omo kihugho kyabo, namabahakyo.
10 Kandi munababwira niti: “Ingye Yehova oMungu wenyu, isimwasagha emiungu y’Abaamori abo mwikere omo kihugho kyabo.” Aliwe mumwatowa.’”*
11 Enyuma sy’aho, omumalaika wa Yehova mwasa, amikala omo ndina y’omuti munene owabya e Ofra. Omuti oyo abya wa Yoashi Omuabizeri. Mughala wiwe, ye Gideoni, abya inianemuhumbira engano omo kikamiro ky’edivai kusudi Abamidiani isibamulangira.
12 Omumalaika wa Yehova mwamuhulukira, amamubwira ati: “Yehova ane haghuma naghu, iwe musuda w’amaka.”
13 Aliwe Gideoni mwamubwira ati: “Unganyire, mukama waghe. Yehova amabya iniane haghuma netu, busanaki ebyosi ebi bikatuhikira? Emyatsi yosi y’eriswekya eyo abobaba wetu babya bakatukanirya yiri hayi? Babya bakatubwira bati, ‘Yehova mwatulusya e Misri.’ Aliwe Yehova abiritulekerania, n’erituhira omo byala by’Abamidiani.”
14 Yehova mwimana embere siwe n’erimubwira ati: “Ghenda n’akaghala ako uli nako, ukendisabula Abaisraeli omo byala by’Abamidiani. N’ingye ngakutuma.”
15 Gideoni mwamusubirya ati: “Yehova, unganyire. Ngendisabula niti Abaisraeli? Si unasi ngoko ekitunga* kyaghe kyo kike kutsibu omo kihanda kya Manase, kandi ngoko n’ingye wa bule-bule omo nyumba ya baba waghe.”
16 Aliwe Yehova mwamubwira ati: “Ukendiita Abamidiani ngoko wanganiita omundu mughuma, kundi ngendibya inine haghuma naghu.”
17 Enyuma sy’aho, Gideoni mwamubwira ati: “Wamabya iwabirinisima, unikanganaye ekikendileka inaminya ngoko niwe ukakanaya naghe.
18 Isiwalua hano kisi nitenasubula n’erihira ekihembo kyaghe embere syaghu.” Neryo mwamusubirya ati: “Ngendikulinda erihika omughulu ukendisubula.”
19 Neryo Gideoni mwaghenda, amingira omo nyumba yiwe, amahuka embene eyikine nyilere, amimya e efa y’efarine, amahuka mw’emikati eyitemo levire.* Mwahira enyama omo kibo, n’omuto omo nyungu, amamutwalirabyo, n’erihirabyo embere siwe omo ndina y’omuti.
20 Omumalaika w’oMungu w’ekwenene mwabwira Gideoni ati: “Imaya enyama eyo n’emikati eyo eyitemo levire,* uhirebyo oko ribwe rinene rirya. Ute kubyo k’omuto.” Neryo Gideoni mwakola atya.
21 Neryo Omumalaika wa Yehova mwasumba omutso owabya omo byala biwe, amatulya omutwe-mutwe w’omutso oyo oko nyama n’emikati eyo eyitemo levire.* Neryo omuliro mwalua omo ribwe, amahisya enyama n’emikati eyitemo levire. Enyuma sy’aho, omumalaika wa Yehova mwabulirana, Gideoni syatasyamulangira.
22 Neryo Gideoni mwaminya ngoko alue mumalaika wa Yehova.
Gideoni mwalw’inabugha ati: “Yehova, Omukama Mukulu oko Bosi, niri muhanya, kundi nabirilangira omumalaika wa Yehova busu kwa busu!”
23 Aliwe Yehova mwamubwira ati: “Ubye n’obuholo. Isiwasagha, siwendihola.”
24 Neryo Gideoni mwahimbira Yehova y’ekiherero omo mwanya oyo. Erihika na munabwire, ekiherero ekyo kikinahulawa mo Yehova-shalome. Na lino kikine e Ofra y’Abaabiezeri.
25 Omo kiro ekyo, Yehova mwabwira Gideoni ati: “Wimaye enume y’ende eyikine nyilere ya baba waghu n’eyindi nume y’ende eyikine nyilere ey’emyaka 7, uhimbule ekiherero kya Baali ekya baba waghu, n’eriterya omuti mubuyirire* owali hakuhi nakyo.
26 Utondeke amabwe n’erihimbira Yehova oMungu waghu y’ekiherero omo mwanya w’endata ono, aho mundu ate angahika bweghu-bweghu. Ukendibya wabikola ekyo, iwimya enume y’ende eyikine nyilere ey’akabiri, iwahererayo mo buhere bw’eryokererya oko syongwe esiryalua omo muti mubuyirire ogho ulyatwa.”
27 Neryo Gideoni mwimya oko baghombe biwe kw’abalume 10, amakola ngoko Yehova alyamubwira. Aliwe kundi mwasagha ab’omo nyumba ya baba wiwe n’abandu b’omo muyi oyo, mwatakola ekyo ky’omw’itungyi, mwakolakyo omo kiro.
28 Omo tututu y’ekiro ekikwamire, abalume b’omo muyi oyo babere babibuka, mubalangira ngoko ekiherero kya Baali kyabirihimbulwa, ngoko omuti mubuyirire* owalue hakuhi n’akyo abiritwibwa, kandi ngoko enume y’ende eyikine nyilere ey’akabiri yabirihererwa oko kiherero ekiryahimbawa.
29 Mubabulania bati: “Oyulyakola eki nindi?” Babere babikola omurorotsyo, mubabugha bati: “Gideoni, mughala wa Yoashi, yulyakola ekyo.”
30 Neryo abalume b’omo muyi oyo mubabwira Yoashi bati: “Hulukaya mughala waghu akwe, kundi mwakahimbula ekiherero kya Baali n’eritwa omuti mubuyirire owali hakuhi nakyo.”
31 Neryo Yoashi mwabwira abosi ababya bakamusondyako omwagha ati: “N’inywe mukendilwira oko Baali kwe? N’inywe mukendimusabula? Litolere oyukamulwirako initibwa omo tututu eno. Kwe lero omundu mwakahimbula ekiherero kiwe! Amabya ini mungu, ayilwireko.”
32 Ekiro ekyo, Yoashi mwahula Gideoni mo Yerubaali,* kundi mwabugha ati: “Baali ayilwireko, kundi omundu mwakahimbula ekiherero kiwe.”
33 Abamidiani bosi, Abaamaleki bosi, n’abandu bosi b’oko luhande lw’eyo ryuba rikasira mubayighunga haghuma. Mubasoka olusi n’eriya omo musya* we Yezreeli, n’erihirayo ekambi yabo.
34 Ekirimu kya Yehova mukyasa oko Gideoni, neryo Gideoni amabuha omo rihembe, n’Abaabiezeri bamayighunga naye.
35 Mwatuma omulaghe oko bandu bosi b’omo kihanda kya Manase, n’abalume b’omo kihanda ekyo nabo mubayamuwatikya. Kandi mwatuma omulaghe oko bandu b’omo kihanda kya Asheri, Zabuloni, na Naftali, nabo mubasyamuwatikya.
36 Neryo Gideoni mwabwira oMungu w’ekwenene ati: “Wamabya ighukendinikolesya erisabula Abaisraeli, ngoko wabirilagha,
37 ngasesa oko kihumbiro kw’engobi y’embuli eyikineko obweya. Engobi nyisa yamabyasako ekimi, aliwe ekitaka ekiri oho yiri ikyabya ikinumire, aho ingendiminya ngoko ukendinikolesya erisabula Abaisraeli, ngoko wabirilagha.”
38 Emyatsi ko yanabya yitya. Mwabya abibuka omo tututu y’ekiro ekikwamire, mwayakamula engobi y’embuli eyo, neryo mwamalua ekimi ekyangusulya ekibakuli* kinene ekikakolesibawa oko fete.
39 Aliwe Gideoni mwabwira oMungu w’ekwenene ati: “Isiwanihitanako. Leka nitasyakusaba oghundi mwatsi. Kisi, unilighire eritasyakolesya engobi y’embuli eno nitoke eriminya nga ukendibya haghuma naghe. Kisi, uleke engobi nyisa yume, aliwe ekimi kibye ikine oko kitaka aho yiri.”
40 Ekyo ky’oMungu akola omo kiro ekyo. Engobi nyisa y’embuli yo yabya yumire, aliwe ekitaka kyosi kyabya ikineko ekimi.
Amaelezo awehikwa
^ Kutse alinga, “amadepo w’omo kitaka.”
^ Kinywa kwa kinywa, “mumwatahulikirira omulenge waghe.”
^ Kinywa kwa kinywa, “e elfu.”
^ Kutse “kihamya.”
^ Kutse “kihamya.”
^ Kutse “kihamya.”
^ Ulebaye Amaana w’ebinywa.
^ Ulebaye Amaana w’ebinywa.
^ Ni bugha ambu “Baali ayilwireko.”
^ Kutse “ribanda.”
^ Kutse “ekibindi.”
