Abatsweri 7:1-25
7 Neryo Yerubaali, ni bugha ambu, ye Gideoni, n’abandu bosi ababya haghuma naye mubabuka omo tututu kutsibu, bamayapanga hakuhi n’engununuko ye Harodi. Abamidiani nabo babya ibabiripanga oko luhande lw’endata hakuhi n’akatwa ke More, omo musya.*
2 Neryo Yehova mwabwira Gideoni ati: “Abasuda abali haghuma naghu ni banene kutsibu, sinendihira Abamidiani b’omo byala byabo, kundi Abaisraeli ibanganayipipa n’eribugha bati, ‘Mutukasingabo omo kaghala ketu.’
3 Neryo kisi, ubwire abalume abo uli nabo uti: ‘Oyukwire obuba kandi oyukatitimana asube ewiwe.’” Gideoni mwababwira atya eribalengako. Neryo abalume 22 000 mubasuba ewabo, n’abalume 10 000 bamasighala.
4 Aliwe Yehova mwabwira Gideoni ati: “Abalume baghu bakine banene. Ndaghalirayabo oko lusi, ngendikuwatikya eribalengako eyo. Omughulu ngendibya ngakubwira niti, ‘Ono akendighenda naghu,’ oyo iniakendighenda naghu. Aliwe omughulu ngendibya ngakubwira niti, ‘Ono syendighenda naghu,’ oyo isyendighenda naghu.”
5 Neryo mwandaghalirya abalume abo oko lusi.
Neryo Yehova mwabwira Gideoni ati: “Abakalyatsa oko maghetse ng’embwa, ukendibahira oko luhande lwabo. N’abakanywa maghetse ibabirikukama, nabo ukendibahira oko luhande lwabo.”
6 Ababya bakalyatsa oko maghetse awabya omo byala byabo babya 300. Abandi mubanywa ibabirikukama.
7 Neryo Yehova mwabwira Gideoni ati: “Ngendibasabula erilabira abalume 300 abo abalyalyatsa oko maghetse. Ngendikuwatikya erisinga Abamidiani, aliwe uleke abandi basubule.”
8 Neryo abalume 300 abo mubimya endanda n’amahembe agho abandi basuda babya nagho. Gideoni mwasighala n’abalume 300, n’abandi basuda amababwira ati basubule. Aliwe ekambi y’Abamidiani yabya ahikwa okw’ibo omo musya.
9 Omo kiro ekyo, Yehova mwabwira Gideoni ati: “Hangana, uyalwe n’abasuda abali omo kambi, kundi nabiribahira omo byala byaghu.
10 Wamasagha eriyalwa nabo, undaghalire omo kambi kabo haghuma na Pura, omuwatikya waghu.
11 Uhulikirire ebyo bakabugha. Ekyo kikendileka ighutasagha erilwa nabo.” Neryo Gideoni na Pura, omuwatikya wiwe, mubandaghalira hakuhi n’ekambi.
12 Aliwe Abamidiani, Abaamaleki, n’abasuda bosi b’oko luhande lw’eyo ryuba rikasira babya ibabiryusula omo musya ng’esyongyike. N’esyongamia syabo syabya nene kutsibu. Syabya sinene ng’omutsanga owali oko musike w’engetse.
13 Gideoni mwahikaho omulume mughuma inianemukanirya mulikyabo ebyo alyalota. Abya akamubwira ati: “Mungalota omukati w’ekisusu ow’omuviringo, alue akasa omo kambi y’Abamidiani inianemutimba. Mwakahika ahali ehema nguma, amayihinda oko hema eyo ko kutsibu, neryo ehema eyo yamatera. Ulangire, omukati mwakatoka eribindula ehema, omutwe w’ehema amabya eyikwa neryo ehema yamatera.”
14 Neryo mulikyabo oyo mwamusubirya ati: “Oyo syangabula eribya ini muyali wa Gideoni, mughala wa Yoashi, omulume we Israeli. OMungu abirihira Abamidiani n’ekambi yosi omo byala biwe.”
15 Gideoni abere abyowa omulume oyo akakania oko nzoli eyo n’amaana wayo, mwakukama ahisi, amaramya oMungu. Enyuma sy’aho, mwasuba omo kambi y’Abaisraeli, amababwira ati: “Muhangane, kundi Yehova abirihira ekambi y’Abamidiani omo byala byenyu.”
16 Neryo mwaghaba abalume 300 mo bikuto bisatu. Mwaha n’obuli mundu y’erihembe n’erilegha rinene eritemo kindu, eririmo ehiti ehiriko ekirimi.*
17 Neryo mwababwira ati: “Mubye mukanilebya n’erikola ngoko ngakola. Omughulu ngendiya hakuhi n’ekambi, nenyu imwasaho.
18 Ngendibya nabibuha omo rihembe, ingye n’abosi abali haghuma naghe, neryo nenyu imwabuha omo mahembe agho muwiteko. Mukendibya imwabiritimba oko kambi, neryo mukendibugha omo mulenge muli muti, ‘Omuyali wa Yehova n’owa Gideoni!’”
19 Omo kitswe ky’omo kati-kati k’ekiro,* Gideoni n’abalume 100 ababya haghuma naye, mubahika hakuhi n’ekambi. Abazamu babya imobanamatsuka eriteya. Neryo Gideoni n’abalume ababya haghuma naye mubabuha omo mahembe n’eritulanga amalegha manene-manene agho babya nagho omo byala.
20 Neryo abalume b’omo bikuto bisatu nabo mubabuha omo mahembe n’eritulanga amalegha manene-manene. Babya bakahamba ehiti ehiriko ekirimi* omo byala byabo by’amalembe, n’eribuha omo mahembe awabya omo byala byabo by’amali. Kandi babya bakabugha omo mulenge muli bati: “Omuyali wa Yehova n’owa Gideoni!”
21 Oko mughulu oyo, abasuda bosi babya ibabiritimba oko kambi, obuli musuda inianimene omo mwanya wiwe. Neryo abasuda bosi Abamidiani, mubatibita ibanemulaka.
22 Abalume 300 ibo babya ibanemubuha omo mahembe. Neryo Yehova mwaleka abasuda b’omo kambi y’Abamidiani ibitana omo muyali, neryo abasuda bosi Abamidiani mubatibita eriyahika e Bete-shita, ebwanga e Zerera, bamayahika hakuhi ne Abel-mehola, hakuhi ne Tabati.
23 Neryo Gideoni mwabirikira abalume be Israeli b’omo bihanda bya Naftali, Asheri, n’abosi b’omo kihanda kya Manase, neryo mubakwamirira Abamidiani.
24 Gideoni mwatuma abandu ati bayabwire abandu b’omo kiharo kyosi kye Efraimu bati: “Mundaghale, muyalwe n’Abamidiani, mubatangirire e Bete-bara, n’oko lusi lwe Yordani. Muhire abalume b’ehosi-hosi aho bandu bakasokera Abamidiani bakasyasoka.” Neryo abalume bosi be Efraimu mubahindana haghuma, bamayakakirya abandu erisoka esyonyusi eriyahika e Bete-bara n’eriyahika oko Lushi lwe Yordani.
25 Mubahamba abakulu babiri be Midiani, ye Orebu na Zeebu. Mubitira Orebu oko lubwe* lwa Orebu, bamitira na Zeebu omo kikamiro ky’edivai kya Zeebu. Mubataleka erikwamirira Abamidiani. Mubaletera Gideoni omutwe wa Orebu n’owa Zeebu omo kiharo kye Yordani.
Amaelezo awehikwa
^ Kutse “ribanda.”
^ Kutse “ebisosomole.”
^ Eritsuka hakuhi saa 4 y’ekiro erihika hakuhi saa 8 y’ekiro.
^ Kutse “ebisosomole.”
^ Kutse “lukuka.”
