Abatsweri 8:1-35
8 Neryo abalume be Efraimu mubabwira Gideoni bati: “Busanaki mukatukolera utya? Busanaki siwetatubirikira omughulu ulyayalwa n’Abamidiani?” Mubamukaramira kutsibu.
2 Aliwe mwababwira ati: “Ekyo niryakola ni kike erilinganisyakyo n’ekyo mulyakola. Omubiiri w’eribota-bota emizabibu ogho Efraimu alyakola syalengire omubiiri w’eryoha emizabibu ogho Abiezeri alyakola?
3 N’inywe oMungu alyawatikaya erisinga Orebu na Zeebu, abakulu be Midiani. Ekyo niryakola ni kike erilinganisyakyo n’ekyo mulyakola.” Abere abibasubirya atya,* bamatulera.*
4 Gideoni mwahika oko Lushi lwe Yordani, amasokalo, iye n’abalume 300 ababya haghuma naye. Babya ibabiriluha, aliwe mubataleka erikwamirira Abamidiani.
5 Neryo mwabwira abalume be Sukoti ati: “Kisi muhe emikati abasuda obo niri nabo, kundi baluhire, naghe ninemukwamirira Zeba na Zalmuna, abami be Midiani.”
6 Aliwe abakulu be Sukoti mubamusubirya bati: “Tukendiha abasuda baghu b’emikati yo busanaki? Wabirihamba Zeba na Zalmuna kwe?”
7 Neryo Gideoni mwababwira ati: “Kundi mwamanikolera mutya, Yehova akendibya abiniwatikya erisinga Zeba na Zalmuna, ngendibahunza omo miti eyiriko mahwa n’omo misaki-saki y’omo mbwarara.”
8 Neryo mwalua aho, amerukira e Penueli. Mwasaba abalume be Penueli ebyo analyasaba abalume be Sukoti, aliwe abalume be Penueli nabo mubamusubirya ngoko abalume be Sukoti balyamusubiraya.
9 Neryo mwabwira abalume be Penueli ati: “Ngendibya nabisubula buholo, ngendihimbula akaleberyo k’omuyi wenyu.”
10 Nikwa Zeba na Zalmuna babya e Karkori haghuma n’abasuda babo, abasuda hakuhi 15 000. Abo bo babya bakisiya oko basuda bosi b’oko luhande lw’eyo ryuba rikasira, kundi abasuda 120 000 ababya bahekire emiyali babya ibabiritibwa.
11 Gideoni mwahetuka omo nzira eyo abandu bakahuma-huma bakalabamo, oko luhande lw’eyo ryuba rikasira olwe Noba n’olwe Yogbeha. Mwalwa n’ekambi y’abasuda ababya bakalengekania bati sihali enzighu eyangabahikira.
12 Zeba na Zalmuna, abami babiri be Mediani, mubatibita. Aliwe Gideoni mwabakwamirira, amayabahamba, neryo abasuda bosi b’omo kambi mubabula nga bayire bati.
13 Omughulu Gideoni, mughala wa Yoashi, asubula akalua omo malwa, mwalaba omo nzira eyikerukira e Heresi.
14 Mwahamba omulwana we Sukoti, amamubulya amabulyo, neryo mulwana oyo mwamuhandikira amena w’abakulu n’abasyakulu be Sukoti, mwahandika amena w’abalume 77.
15 Neryo Gideoni mwayasungana n’abalume be Sukoti, amababwira ati: “Zeba na Zalmuna b’abano, abalyaleka imwanipuma,* n’eribugha muti, ‘Tukendiha abalume baghu b’emikati yo busanaki? Wabirisinga Zeba na Zalmuna kwe?’”
16 Mwimya abasyakulu b’omuyi we Sukoti, amakolesya emiti eyiriko amahwa n’emisaki-saki y’embwarara eribakunga.
17 Enyuma sy’aho, mwahimbula akaleberyo k’omo muyi we Penueli, amita n’abalume b’ayo.
18 Mwabulya Zeba na Zalmuna ati: “Abalume abo mulita e Tabori, balue basosire bati?” Mubamusubirya bati: “Balue nga we, abosi balue basosire abaghala b’omwami.”
19 Neryo naye mwabasubirya ati: “Abo balue baghala betu, abana ba mama waghe. Oko kwenene-kwenene ngoko Yehova aneho, ngamutalitabo, sinilyendibita.”
20 Neryo mwabwira Yeteri, akambere kiwe, ati: “Asa witebo.” Aliwe omulwana oyo mwatalusya omuyali wiwe omo lubo* lwagho, mwasagha kundi abya iniakine mulere.
21 Neryo Zeba na Zalmuna mubabugha bati: “Asa ighuwene-wene utwite, kundi omulume akaminyikala oko kaghala kiwe.” Neryo Gideoni mwahangana, amita Zeba na Zalmuna. Abere abitabo, amimya amapambo awali ngoko mughenda akabya abitwa awabya omo bikya by’esyongamia syabo.
22 Habere habilaba mughulu mulebe, abalume be Israeli mubabwira Gideoni bati: “Ututabale iwe, mughala waghu, n’omwitsikulu waghu, kundi wabiritulusya omo byala by’Abamidiani.”
23 Aliwe Gideoni mwababwira ati: “Sinendibatabala, ingye kutse mughala waghe, Yehova yukendibatabala.”
24 Kandi Gideoni mwabugha ati: “Ngabasaba ekindu kighuma kisa, obuli mughuma w’okw’inywe ambe embuka y’oko nindo eyo alyanyegha.” (Babya n’esyombuka sy’ehoro esikambalawa oko nindo kundi babya Baismaeli.)
25 Mubamusubirya bati: “Tukendikuhasyo.” Mubasesa ekanzu y’ahisi, neryo obuli mundu amaghusako embuka* eyikambalawa oko nindo eyo alyanyegha.
26 Esyombuka* sy’ehoro esikambalawa oko nindo esyo abasaba musyaluamo esyoshekeli* 1 700 sy’ehoro, butsir’ihirako amapambo awali ngoko omughenda akabya abitwa, amaningita, esyongyimba esikalua omo bweya bw’esyombuli esy’erangyi y’olubono-bono* esyo abami be Midiani bakambala, n’esyoshenete sy’esyongamia.
27 Neryo Gideoni mwakokotya mubyo mwe efodi, amahirayo omo muyi wiwe we Ofra. Abaisraeli bosi mubakola obumbalaka bw’obunya-kirimu omw’iramya e efodi eyo, neryo muyabya kitegho oko Gideoni, n’ekihanda kiwe.
28 Abaisraeli ko basinga batya Abamidiani, neryo Abamidiani mubaleka erilwa n’Abaisraeli;* n’ekihugho mukyabyamo obuholo omo myaka 40 oko mughulu wa Gideoni.
29 Neryo Yerubaali, mughala wa Yoashi, mwasuba ewiwe, amasighala eyo.
30 Gideoni mwabuta abana 70,* kundi abya n’abakali banene.
31 Oghundi mukali wiwe owe Shekemu naye mwamubutira omwana w’obulume, Gideoni mwamwahula mo Abimeleki.
32 Gideoni, mughala wa Yoashi, mwahola iniabiribugha emyaka minene. Neryo mubamuta omo yisinda ya Yoashi, baba wiwe, e Ofra y’Abaabiezeri.
33 Gideoni abere abihola, kandi Abaisraeli mubakola obumbalaka bw’obunya-kirimu omw’iramya esyobaali. Mubayira Baali-beriti mo mungu wabo.
34 Abaisraeli mubibirirwa Yehova oMungu wabo, oyo wabalusaya omo byala by’esyonzighu syabo esyabya sibatimbireko.
35 Nomo ekihanda kya Yerubaali, ni bugha ambu Gideoni, anakolera Abaisraeli b’ebyuwene, ibo mubatakangania ekihanda kiwe olwanzo oluteleghula.
Amaelezo awehikwa
^ Kinywa kwa kinywa, “abibugha ekinywa ekyo.”
^ Kinywa kwa kinywa. “ekirimu kyabo mukitasyamuhitanako.”
^ Kutse “imwanikara.”
^ Ni kindu ky’erihiramo omuyali.
^ Kutse “ebage; epeta.”
^ Kutse “Esyobage; Esyopeta.”
^ Eshekeli nguma ini syograme 11,4. Ulebaye Endomeko B14.
^ Kutse “sy’erangyi y’omunyama, sye pourpre.”
^ Kinywa kwa kinywa, “mubatasyasumba omutwe wabo.”
^ Kinywa kwa kinywa, “abana b’obulume 70 mubalua omo kihinga kiwe.”
