Emighanzo 1:1-54
1 Kandi Yehova mwakania na Musa omo mbwarara ye Sinai, omo hema y’erihindanamo. Kyabya kiro ky’erimbere omwisi w’akabiri w’omwaka w’akabiri, babilua e Misri. Mwamubwira ati:
2 “Mughanze Abaisraeli* bosi mo mughuma-mughuma.* Uhandike amena w’abalume bosi erikwamana n’ebihanda byabo n’ebitunga byabo.
3 Iwe na Haruni mukendihandika abalume bosi eritsuka oko myaka 20 erikwamana n’ebikuto byabo.* Mukendihandika abosi abangabya basuda omo Israeli.
4 “Wimaye omo buli kitunga m’omulume mughuma; ritolere iniabya mukulu w’ekitunga kiwe.
5 Aya w’amena w’abalume abakendibawatikya: omo kihanda kya Rubeni, Elizuri, mughala wa Shedeuri;
6 omo kihanda kya Simeoni, Shelumieli, mughala wa Zurishadai;
7 omo kihanda kya Yuda, Nashoni mughala wa Aminadabu;
8 omo kihanda kya Isakari, Netaneli, mughala wa Zuari;
9 omo kihanda kya Zabuloni, Eliabu, mughala wa Heloni;
10 omo baghala ba Yozefu: erilua omo kihanda kya Efraimu, Elishama, mughala wa Amihudi; erilua omo kihanda kya Manase, Gamalieli, mughala wa Pedazuri;
11 omo kihanda kya Benyamini, Abidani, mughala wa Gideoni;
12 omo kihanda kya Dani, Ahiezeri, mughala wa Amishadai;
13 omo kihanda kya Asheri, Pagieli, mughala wa Okrani;
14 omo kihanda kya Gadi, Eliasafu, mughala wa Deueli;
15 omo kihanda kya Naftali, Ahira, mughala wa Enani.
16 Abo b’abalume abasombolawa omo bandu. Ni bakulu b’ebihanda by’abobaba wabo, abakulu b’amaelfu we Israeli.”
17 Neryo Musa na Haruni mubimya abalume abo, abasombolawa n’oMungu.
18 Omo kiro ky’erimbere ky’omwisi w’akabiri, mobahindania abandu bosi kusudi bahandike erina ry’obuli mulume eritsuka oko myaka 20, erikwamana n’ekihanda kiwe n’ekitunga kiwe,
19 ngoko Yehova abwira Musa. Neryo mwahandikirabo omo mbwarara ye Sinai.
20 Abaghala ba Rubeni, abitsikulu b’akambere ka Israeli, mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa mo mughuma-mughuma.
21 Neryo emighanzo y’abahandikawa omo kihanda kya Rubeni yabya 46 500.
22 Abana ba Simeoni mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa mo mughuma-mughuma.
23 Neryo emighanzo y’abahandikawa omo kihanda kya Simeoni yabya 59 300.
24 Abana ba Gadi mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
25 Neryo emighanzo y’abahandikawa omo kihanda kya Gadi yabya 45 650.
26 Abana ba Yuda mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
27 Neryo emighanzo y’abahandikawa omo kihanda kya Yuda yabya 74 600.
28 Abana ba Isakari mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
29 Neryo emighanzo y’abahandikawa omo kihanda kya Isakari yabya 54 400.
30 Abana ba Zabuloni mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
31 Neryo emighanzo y’abahandikawa omo kihanda kya Zabuloni yabya 57 400.
32 Abana ba Efraimu, mughala wa Yozefu, mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
33 Neryo emighanzo y’abahandikawa omo kihanda kya Efraimu yabya 40 500.
34 Abana ba Manase mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
35 Neryo emighanzo y’abahandikawa omo kihanda kya Manase yabya 32 200.
36 Abana ba Benyamini mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
37 Neryo emighanzo y’abahandikawa omo kihanda kya Benyamini yabya 35 400.
38 Abana ba Dani mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
39 Neryo emighanzo y’abahandikawa omo kihanda kya Dani yabya 62 700.
40 Abana ba Asheri mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
41 Neryo emighanzo y’abahandikawa omo kihanda kya Asheri yabya 41 500.
42 Abana ba Naftali mubahandikwa erikwamana n’amena wabo, ebihanda byabo, n’ebitunga byabo. Abalume bosi eritsuka oko myaka 20 abangabya basuda mubaghanzwa.
43 Neryo emighanzo y’abahandikawa omo kihanda kya Naftali yabya 53 400.
44 Abo bo bahandikawa na Musa na Haruni n’abakulu 12 be Israeli, obuli mughuma wa kubo omo rina ry’ekitunga kiwe.
45 Abaisraeli bosi eritsuka oko myaka 20 abangabya basuda be Israeli mubahandikwa erikwamana n’ebitunga byabo.
46 Neryo abosi abahandikawa babya 603 550.
47 Aliwe Abalawi mubatahandikwa haghuma n’ebindi bihanda erikwamana n’ekihanda ky’abobaba wabo.
48 Yehova mwabwira Musa ati:
49 “Isiwahandika ekihanda kya Lawi. Isiwahira n’emighanzo yabo oko mighanzo y’abandi Baisraeli.
50 Abalawi, ukendihabo omubiiri w’erimanira ehema y’endaghane, ebindu byosi ebikakolesibawa omo hema, n’ebindu byosi by’ehema eyo. Bakendisyabya bakaheka ehema n’ebindu byosi ebikakolesibawa muyo. Bakendisyabya bakakolera oko hema n’eritimbya esyokambi syabo oko hema eyo.
51 Abalawi bo bakendisyabya bakahimbula ehema omughulu mukalua aho muli, kandi bo bakendisyabya bakahimbayo mwabihika eyo mukaya. Omundu oyute Mulawi* amabihika hakuhi nayo, ritolere inyitibwa.
52 “Obuli Mwisraeli akendisyahimba ekambi yiwe aho bakendisyamukangania. Obuli mundu akendisyapanga ahali ekikuto ky’ebihanda bisatu* ekyo alimo, erikwamana n’ebikuto byabo.
53 Abalawi bakendisyabya bakatimbya amahema wabo oko hema y’endaghane ngasyahitana oko Baisraeli; n’Abalawi bakendisyabya bakateya ehema y’endaghane.
54 Abaisraeli mubakola ebyosi ebyo Yehova abwira Musa. Mubakola ngoko anabugha.
Amaelezo awehikwa
^ Kinywa kwa kinywa, “abaghala ba Israeli.”
^ Kutse “obuli mutwe w’Abaisraeli.”
^ Kinywa kwa kinywa, “n’emilondo yabo y’abasuda.”
^ Kinywa kwa kinywa, “Omugheni.”
^ Kutse “ahali ebendera y’ebihanda bisatu.”
