Emighanzo 10:1-36
10 Neryo Yehova mwabwira Musa ati:
2 “Uyikokoteraye esyongunga ibiri. Ukokotayesyo omo feza* ukaponda-pondayo omo hama. Ukolesayesyo eribirikira Abaisraeli uti bahindane, n’eribabwira uti bahongoke.
3 Omughulu esibiri syosi sikabuhawamo, ritolere Abaisraeli bosi ibahindana oko mulango w’ehema y’erihindanamo.
4 Enguma yamabibuhwamo, abakulu basa, ni bugha ambu abakulu b’amaelfu we Israeli ibasa eyo uli.
5 “Omughulu mukendisyabya mukalusya omo ngunga mo mulenge owakabinduka-binduka, abapangire eluhande lw’eyo ryuba rikasira ibatsukalo.
6 Omughulu mukendisyabya mukalusyamo omulenge owakabinduka-binduka engendo y’akabiri, abapangire oko luhande lw’eyikwa ibatsukalo. Mukendisyabya mukalusyamo omulenge owakabinduka-binduka omughulu ekikuto kighuma kikatsukalo.
7 “Aliwe omughulu mukabirikira Abaisraeli bahindane haghuma, mukendisyabya mukabuha omo syongunga esyo, aliwe isimwalusayamo omulenge owakabinduka-binduka.
8 Abaghala ba Haruni, abahereri, bo bakendisyabya bakabuha esyongunga esyo. Eribuha omo syongunga esyo ni kyalayiro ekyo mukendisyabya mukakwama omo bizazi* byenyu byosi.
9 “Mwamabiyalwa omo kihugho kyenyu n’enzighu eyikabya iyinemubapuma,* ritolere imwalusya omo syongunga esyo m’omulenge w’amalwa, neryo Yehova Mungu wenyu iniakendibibuka n’eribasabula omo byala by’esyonzighu syenyu.
10 “Kandi omughulu muli omo butseme, ni bugha ambu omughulu w’esyofete syenyu n’omughulu mukatsuka emisi yenyu, mukendisyabya mukabuha omo syongunga omughulu mukaherera amahere w’eryokererya n’amahere w’obuholo. Emilenge y’esyongunga ikendisyabya ikaleka oMungu iniabibuka. Ingye Yehova, oMungu wenyu.”
11 Ekiro 20 ky’omwisi w’akabiri, omo mwaka w’akabiri, ekitu mukyalua oko hema y’endaghane.
12 Neryo Abaisraeli mubalua omo mbwarara ye Sinai ngoko babya bakakwama-kwamana omughulu babya bakatsuka olughendo, n’ekitu mukimana omo mbwarara ye Parani.
13 Eyo yo yabya ngendo y’erimbere Abaisraeli erihongoka bakakwama ebyo Yehova abwirabo erilabira Musa.
14 Neryo ekikuto ky’ebihanda bisatu ky’abaghala ba Yuda mukyabya ky’erimbere erihongoka mo bikuto-bikuto,* na Nashoni, mughala wa Aminadabu, yo wabya imanire ekikuto ky’abaghala ba Yuda.
15 Netaneli, mughala wa Zuari, yo wabya imanire ekihanda ky’abaghala ba Isakari.
16 Eliabu, mughala wa Heloni, yo wabya imanire ekihanda ky’abaghala ba Zabuloni.
17 Ibakabya babihimbula ehema, abaghala ba Gershoni n’abaghala ba Merari, ababya bakaheka ehema, ibatsuka olughendo.
18 Enyuma sy’aho, ekikuto ky’ebihanda bisatu kya Rubeni mukyaghenda mo bikuto-bikuto. Elizuri, mughala wa Shedeuri, yo wabya imanire ekikuto kya Rubeni.
19 Shelumieli, mughala wa Zurishadai, yo wabya imanire ekihanda ky’abaghala ba Simeoni.
20 Eliasafu, mughala wa Deueli, yo wabya imanire ekihanda ky’abaghala ba Gadi.
21 Enyuma sy’aho. Abakohati, ababya bakaheka ebindu by’ehema, mubatsuka olughendo. Ehema iyikahimbawa embere bahike.
22 Enyuma sy’aho, ekikuto ky’ebihanda bisatu ky’abaghala ba Efraimu mukyaghenda mo bikuto-bikuto. Elishama, mughala wa Amihudi, yo wabya imanire ekikuto kya Efraimu.
23 Gamalieli, mughala wa Pedazuri, yo wabya imanire ekihanda ky’abaghala ba Manase.
24 Abidani, mughala wa Gideoni, yo wabya imanire ekihanda ky’abaghala ba Benyamini.
25 Oko mwiso, ekikuto ky’ebihanda bisatu ky’abaghala ba Dani mukyaghenda mo bikuto-bikuto. Kyo kyabya enyuma w’ebikuto byosi. Ahiezeri, mughala wa Amishadai, yo wabya imanire ekikuto kya Dani.
26 Pagieli, mughala wa Okrani, yo wabya imanire ekihanda ky’abaghala ba Asheri.
27 Ahira, mughala wa Enani, yo wabya imanire ekihanda ky’abaghala ba Naftali.
28 Abaisraeli ko babya bakakwama-kwamana batya mo bikuto-bikuto omughulu babya bakaghenda.
29 Neryo Musa mwabwira Hobabu, mughala wa Reueli,* Omumidiani, tata-byala wa Musa ati: “Tukaya omo kihugho ekyo Yehova abugha ati, ‘Ngendibahakyo.’ Asa tughende naghu. Tukendikukolera ebyuwene, kundi Yehova abirilagha erikolera Israeli ebyuwene.”
30 Aliwe Hobabu mwamubwira ati: “Sinendighenda nenyu. Ngasuba omo kihugho kyaghe, eyiri abatunga baghe.”
31 Musa mwamubwira ati: “Kisi isiwatusigha, kundi n’iwe wasi aho twangapanga omo mbwarara, kandi wanganatusondola.
32 Kandi wamabitukwama, ebibuya byosi ebyo Yehova akenditukolera, netu byo tukendikukolera.”
33 Neryo mubalua oko kitwa kya Yehova, bamaghenda olughendo lw’ebiro bisatu. N’omo biro bisatu ebyo, erisanduku ry’endaghane ya Yehova ryabya iryabiribabera embere eriya baronderya ah’eriluhukira.
34 Ekitu kya Yehova ikikabya endata syabo omw’itungyi omughulu babya bakalua aho babya bapangire.
35 Omughulu babya bakahumisya erisanduku, Musa iniakabugha ati: “Yehova, hangana, esyonzighu syaghu sipanza-panzawe, n’abakuponire batibite n’erilua embere syaghu.”
36 Kandi ibakabya babikirya erisanduku, Musa iniakabugha ati: “Yehova, suba ahali amaelfu n’amaelfu* w’Abaisraeli.”
Amaelezo awehikwa
^ Ni kindu ky’obughuli ekikalua omo kitaka.
^ Kutse “syondengo.”
^ Kutse “iyinemubakara.”
^ Kinywa kwa kinywa, “erikwamana n’emilondo yabo y’abasuda.”
^ Ni bugha ambu, “Yetro.”
^ Kutse “obutaghanzika.”
