Emighanzo 11:1-35
-
OMungu amatuma omuliro busana n’eriyilungumula ry’Abaisraeli (1-3)
-
Abandu bamalira bati bahabawe enyama (4-9)
-
Musa amayowa nga syangatoka erisondola Abaisraeli (10-15)
-
Yehova amaha abasyakulu 70 b’ekirimu kiwe (16-25)
-
Eldadi na Medadi; Yosua amatsura Musa (26-30)
-
Yehova amatuma esyongwali; abandu bamahabwa amalipizi busana n’omururu (31-35)
11 Aliwe abandu mubatsuka eriyilungumula kutsibu embere sya Yehova. Yehova mwabya abyowa bakayilungumula, mwahitana kutsibu, neryo Yehova mwabatumako omuliro, neryo omuliro oyo amatimya abandu balebe ababya oko musike-sike w’ekambi.
2 Abandu mubatsuka erilakira Musa, na Musa naye amalemba-lemba Yehova, neryo omuliro oyo amalima.
3 Neryo mubahula omwanya oyo mo Tabera,* kundi Yehova mwatuma kubo kw’omuliro.
4 Abandu b’ebindi bihanda* ababya omo kati-kati kabo, mubakangania ngoko banzire kutsibu eribana akalyo akuwene kulenga ako babya nako, n’Abaisraeli nabo mubatsuka erilira, n’eribugha bati: “Nindi yukendituha enyama y’erirya?”
5 Twamibuka esamaki eyo twabya tukalya e Misri butsir’iliha. Itukalya n’esyokokombre, epasteke, epwaro, esyoronye, n’ehayi!
6 Ibwa y’ono tukahola.* Amana masa wo tunemulolako.”
7 Aliwe amana abya ng’embuto y’ekorianda,* kandi abya asosire amatsitsi w’ebedola.
8 Abandu ibakayitsatsanga n’eritola amana. Ibakaswagho oko luso, kutse ibatwangagho omo kingyo, neryo ibakaberayagho omo syonyungu, kutse ibakokotya mugho mw’emikati y’omuviringo. Iniasihire ng’egato eyiryahukawa omo maghuta.
9 Omo kiro, ekimi ikikabya kyabibya omo kambi, amana iniakabya kukyo kw’endata.
10 Musa mwowa abandu bakalira, mwowa obuli kihanda, obuli mundu akalirira oko mulango w’ehema yiwe. Yehova mwahitana kutsibu, na Musa naye mwapona kutsibu.
11 Neryo Musa mwabwira Yehova ati: “Busanaki ukantesa, ingye mughombe waghu? Busanaki siwetanisima? Mungakukoleraki ekiryaleka iwanihekya abandu bosi aba?”
12 N’ingye mama wabo kwe? N’ingye nababuta, kyo kiryaleka iwambwira uti, ‘Uhekebo oko kikuba kyaghu, ngoko omughombe akaheka omwana oyukanyonya,’ n’eritwalabo omo kihugho ekyo walapa uti ukendisyaha abotata-kulu wabo?
13 Ngendilusya enyama y’eriha abandu bosi aba yohi? Kundi obuli ndambi banemulirira embere syaghe, n’eribugha bati, ‘Utuhe enyama y’erirya.’
14 Sinangatoka eriheka abandu bosi aba ingyuwene, ni banene.
15 Wamabya iko ukendinikolera utya, iwalw’iwaniita. Wamabya iwabirinisima, isiwaleka ngalangira oko bundi buhanya.”
16 Yehova mwasubirya Musa ati: “Unironderaye omo basyakulu be Israeli mo balume 70, abalume abo wasi ngoko ni basyakulu kandi bakulu, abakulu b’Abaisraeli. Uletebo ahali ehema y’erihindanamo, bimane aho haghuma naghu.
17 Ngendindaghala n’erikania naghu aho muli, kandi ngendimya oko kirimu ekiri okw’iwe, n’eribahira ky’oko. Bakendikuwatikya eriheka abandu abo, ukasyabaheka ighuwene.
18 Ubwire abandu uti, ‘Muyeraye busana n’ekiro ky’omungya, kundi oko kwenene mukendirya enyama, kusangwa mumukalirira embere sya Yehova n’eribugha muti: “Nindi yukendituha enyama y’erirya, tulue itune e Misri yo ndeke.” Oko kwenene, Yehova akendibaha enyama, mukendiryayo.
19 Simwendiryayo omo kiro kighuma, ebibiri, ebitano, ebiro 10, kutse ebiro 20.
20 Aliwe mukendiryayo omo mwisi wosi, erihika oko kika iyasira omo mihuli yenyu, neryo imwaponayo, kundi mumukaghana erihulikirira Yehova oyuli omo kati-kati kenyu, kandi mumukalirira embere siwe muti: “Tulyalua e Misri yo busanaki?”’”
21 Neryo Musa mwabugha ati: “Abandu abo niri nabo ni balume 600 000. Mughukabugha uti, ‘Ngendibaha enyama eyitosire eyo bakendirya omo omwisi wosi’!
22 Twamabikera esyombuli, esyombene, n’esyonde syosi, syanganaghonera kubo? Kutse twamabihamba esyosamaki syosi esiri omo ngetse, syanganaghonera kubo?”
23 Neryo Yehova mwasubirya Musa ati: “Ukalengekanaya uti ebyala bya Yehova ni bikuhi kwe? Ukendilebya ebyo ngabugha nga binemwendibya, kutse iyehe.”
24 Neryo Musa mwalua aho, amayabwira abandu b’ebinywa bya Yehova. Kandi mwahindania abalume 70 ab’omo basyakulu be Israeli, amatimbyabo oko hema.
25 Neryo Yehova mwandaghala omo kitu, amakania na Musa, kandi mwimya oko kirimu ekyabya oko Musa n’erihirakyo oko buli musyakulu w’oko basyakulu 70 abo. Ekirimu ekyo mukyabya kyabinaya oko balume abo, mubayiwata ng’abaminyereri,* aliwe mubatasyayiwata batya kindi kiro.
26 Aliwe abasyakulu babiri ba kubo babya ibakine omo kambi. Habya Eldadi na Medadi. Mubataya eyiri ehema, babya b’oko bandu abahandikawa. Ekirimu mukyahika kubo, neryo nabo mubayiwata ng’abaminyereri omo kambi.
27 Omulwana mwatibita eyiri Musa, amayamubwira ati: “Eldadi na Medadi babiriyiwata ng’abaminyereri omo kambi!”
28 Neryo Yosua, mughala wa Nuni, omuwatikya wa Musa eritsuka omo bulwana, mwabugha ati: “Mukama waghe Musa, ukakirayebo!”
29 Aliwe Musa mwasubirya ati: “Ukalengekanaya uti ekyo kikendileka inapona? Nanzire abandu bosi ba Yehova ibabya baminyereri, kandi nanzire Yehova iniahira kubo kw’ekirimu kiwe.”
30 Enyuma sy’aho, Musa mwasuba omo kambi haghuma n’abasyakulu bosi be Israeli.
31 Neryo Yehova mwalw’inialeta ekihunga ky’aho n’aho, kyamalusya esyongwali sy’omo ngetse, n’eritogheryasyo omo mwanya owatimbire oko kambi. Omundu amabya oko luhande luno kutse lulya olw’ekambi, abya iniakaghenda olughendo lwa hakuhi kiro kighuma imwahika ahali esyongwali esyo. Musyalw’isyalundana oko kitaka hakuhi obuli bw’ebyala* bibiri endata oko kitaka.
32 Neryo omo ritungyi ryosi ry’ekiro ekyo, n’omo kiro kyosi, n’ekiro kyosi ekikwamire, abandu mubataghotsera busana n’eritola esyongwali. Muhatabya oyukatola sike oko syohomeri* 10. Mubabya bakasanzasyo omo mwanya owatimbire oko kambi.
33 Aliwe enyama iyikine omo meno n’embere babughe eritakunyayo, Yehova mwahitana kubo, amiitabo, mubakwa banene.
34 Neryo mubahula omwanya oyo mo Kibrote-hatava,* kundi mubataho abandu ababya n’omururu.
35 Abaisraeli mubalua e Kibrote-hatava, bamaya e Hazeroti. Mubasighala aho.
Amaelezo awehikwa
^ Ni bugha ambu “eryaka,” ekyo kikamaanisaya omuliro munene.
^ Alinga abate Baisraeli ababya omo kati-kati kabo.
^ Kutse “esyonafsi syetu sikahola.”
^ Abandi bakahulayo mo masala.
^ Kutse “mubabugha obuminyereri.”
^ Okuboko kughuma ini syosantimetre 44,5. Ulebaye Endomeko B14.
^ Ehomeri nguma ini syolitre 220. Ulebaye Endomeko B14.
^ Ni bugha ambu, “amasinda w’omururu.”
