Emighanzo 12:1-16
12 Nikwa Miriamu na Haruni mubatsuka eribugha muhanda oko Musa busana n’omukali Mukushi oyo atahaya, kundi mwatahya omukali Mukushi.
2 Babya bakabugha bati: “Yehova akakanaya netu erilabira Musa iyuwene kwe? Netu syalibugha erilabira itwe kwe?” Yehova abya inianowire.
3 Aliwe Musa abya molo kulenga abandu bosi* ababya omo kihugho.
4 Yehova mwalw’iniabwira Musa, Haruni, na Miriamu ati: “Inywe basatu bosi, muye eyiri ehema y’erihindanamo.” Neryo abasatu bosi mubayayo.
5 Neryo Yehova mwakima omo nduyi y’ekitu, amimana oko mulango w’ehema. Mwabirikira Haruni na Miriamu. Ababiri bosi mubaseghera embere.
6 Neryo mwababwira ati: “Kisi, muhulikirire ebinywa byaghe. Omo kati-kati kenyu mwamabya omuminyereri wa Yehova, ngayiminyisaya okw’iye omo nzoli n’erikania naye omo nzoli.
7 Aliwe ko bite bitya oko mughombe waghe Musa! Iye nabirimuyira mo mwimaniri w’enyumba yaghe yosi.*
8 Iye ngakanaya naye busu kwa busu,* kandi burora-rora. Iye sindikanaya naye omo syondekerano; ingye Yehova ngamuhulukira.* Busanaki simwetasagha eribugha muhanda oko mughombe waghe Musa?”
9 Neryo Yehova mwahitana kubo, amabasighaho.
10 Ekitu mukyabya kyabilua endata oko hema, Miriamu mwasako ebihagha by’omusohe* ng’enzururu. Haruni mwabya abibindukira eyiri Miriamu, mwalangira ngoko Miriamu abiryasako ebihagha.
11 Haruni mwalw’iniabwira Musa ati: “Ngakusaba, mukama waghe! Isiwaleka tukahabwa amalipizi busana n’erilolo eri! Ebyo tulyakola ni bukiru.
12 Kisi, isiwamuleka akasighala atya ng’omwana oyulyaholera omo nda, oyo mubiri wiwe abiritsuka erihonda!”
13 Neryo Musa mwalakira Yehova ati: “Kisi Mungu, lamaya Miriamu! Kisi-kisi!”
14 Yehova mwabwira Musa ati: “Baba wiwe ng’alyamutwirako ebitande omo busu, angahemukire omo biro 7. Neryo mumulusaye omo bandi, ayikale ehihya w’ekambi omo biro 7. Bikendibya byabihwa, iniasuba omo kambi.
15 Neryo mubalusya Miriamu omo bandi, amayabugha ebiro 7 ehihya w’ekambi. Abandu mubataendelea n’olughendo Miriamu ate asuba omo kambi.
16 N’enyuma sy’aho, abandu mubalua e Hazeroti, bamayapanga omo mbwarara ye Parani.
Amaelezo awehikwa
^ Kutse “abya oyukayikehaya kutsibu kulenga oghundi mundu wosi-wosi.”
^ Kinywa kwa kinywa, “Omo nyumba yaghe yosi, iye abiriyikanganiamo mutaleghula.”
^ Kinywa kwa kinywa, “buno kwa buno.”
^ Kutse “akalangira eribyaho rya Yehova.”
^ Kutse “by’enzeru, bye blanc.”
