Emighanzo 14:1-45
14 Neryo Abaisraeli bosi mubasumba emilenge yabo, bamalaka n’erilira omo kiro kyosi ky’ekiro ekyo.
2 Abaisraeli bosi mubatsuka eriyilungumula oko Musa na Haruni, abosi babya bakabugha bati: “Ngambe twaholera e Misri basi, kutse ngambe twaholera omo mbwarara eno!
3 Busanaki Yehova akatuleta omo kihugho kino? Anzire itwayaholerayo omo muyali? Abakali betu n’abana betu bakendihambwa. Simulangire ngoko kyuwene erisuba e Misri?
4 Nibya mubatsuka eribwirana bati: “Tuyisombolere omukulu, tusube e Misri!”
5 Musa na Haruni mubakukama n’erihira obusu bwabo oko kitaka embere sy’Abaisraeli bosi ababya bahindene aho.
6 Neryo Yosua, mughala wa Nuni, na Kalebu, mughala wa Yefune, ababya b’oko abayalebaya ekihugho kye Kanana nga kiri kiti mubatulanga esyongyimba syabo.
7 Mubabwira Abaisraeli bosi bati: “Ekihugho ekyo tulyalabamo tukayalebaya nga kirikiti kyuwene, ni kihugho ekyuwene kutsibu.
8 Yehova amabya iniabiritusima, oko kwenene iniakenditwingirya mukyo n’erituhakyo. Ekihugho ekyo kikasendamo amasabu n’obuki.
9 Isimwaghana obusondoli bwa Yehova, kandi isimwasagha abandu b’omo kihugho ekyo, kundi tukenditomerabo.* Sihakiri oyukateghayabo, kandi Yehova ane haghuma netu. Isimwasaghabo.”
10 Aliwe Abaisraeli bosi mubabugha bati bakaghusa kubo kw’amabwe, neryo olukengerwa lwa Yehova mulwasa oko hema y’erihindanamo embere sy’Abaisraeli bosi.
11 Neryo Yehova mwabwira Musa ati: “Erihika mughulu wahi abandu aba bakendisyabya ibanemunipokya? Ebitiko-tiko byosi ebyo nabirikola omo kati-kati kabo, erihika na lino bakinanitika-tikira?
12 Leka ngitebo omo kihunzo n’eribabughaho, neryo ngakuyiremo kihanda kinene kandi ky’amaka kubalenga.”
13 Aliwe Musa mwabwira Yehova ati: “Muwalusya abandu aba omo kati-kati k’Abamisri omo kaghala kaghu, neryo wamabikola utya, Abamisri ibakendyowa.
14 Kandi ibakendibwira abandu b’omo kihugho kino oko mwatsi oyo. Nabo babiryowa ngoko iwe Yehova uli omo kati-kati k’abandu aba, kandi ngoko muwahulukirabo busu kwa busu. Uli Yehova, kandi ekitu kyaghu kine endata kubo. Omw’itungyi ukababera embere omo nduyi y’ekitu, n’omo kiro omo nduyi y’omuliro.
15 Wamabilw’iwita abandu aba,* ebihanda ebyabiryowa oko ngulu yaghu ibikendibugha biti:
16 ‘Yehova mwakerera abandu aba b’omo mbwarara kundi mwalangira ngoko syenditoka eribingirya omo kihugho ekyo alapa ati akendibaha.’
17 Neryo kisi Yehova, akaghala kaghu kabye kanene ngoko walagha omughulu wabugha uti:
18 ‘Yehova syalihitana luba-luba, kandi awite olwanzo lunene oluteleghula, akaghanyira ekosa n’erilolo, aliwe syangaghana eriha amalipizi w’oyulyakosa, akaha abana b’amalipizi busana n’ekosa y’abobaba wabo, erihika oko kizazi* ky’akasatu, n’ekizazi ky’akani.
19 Kisi ughanyire ekosa y’abandu aba, kundi uli n’olwanzo lunene oluteleghula. Ughanyirebo ngoko ukanaghanyirabo, eritsuka omughulu balua e Misri erihika na lino.”
20 Neryo Yehova mwabugha ati: “Ngendighanyirabo ngoko wamabugha.
21 Aliwe ngoko kwenene-kwenene niriho, ekihugho kyosi kikendyusulamo olukengerwa lwa Yehova.
22 Abosi abalangira olukengerwa lwaghe n’ebitiko-tiko ebyo nakola e Misri n’omo mbwarara, aliwe mubatahulikirira omulenge waghe, kandi mubanilengako ngendo 10, sihali n’omughuma wa kubo
23 oyukendisyalangira ekihugho ekyo nalapa eriha abobaba wabo, iyehe sihali n’omughuma w’oko bandu aba oyukendisyalola kukyo.
24 Aliwe kundi omughombe waghe Kalebu mwatetabya ng’abandi, kandi mwatetaleka erinihulikirira n’omutima wosi, iye ngendimwingirya omo kihugho ekyo alyayamo n’abana biwe bakendisyimyakyo.
25 Kundi Abaamaleki n’Abakanana bikere omo musya,* ritolere omungya imwasuba enyuma, imwalolera eyiri embwarara, imwalaba omo nzira eyikaya eyiri Engetse y’Engula.”
26 Neryo Yehova mwabwira Musa na Haruni ati:
27 “Erihika mughulu wahi abandu babi aba bakendisyabya ibanemuyilungumula okw’ingye? Nabiryowa ebyo Baisraeli bakabugha bakayilungumula okw’ingye.
28 Ubabwire uti, ‘“Ngoko kwenene-kwenene niriho,” Yehova atya, “ebyo niryowa mukabugha by’en’ebyo ngendibakolera!
29 Ebinda byenyu bikendiwa omo mbwarara eno, abosi eritsuka oko b’emyaka 20 abahandikawa, abosi b’omw’inywe abayilungumula okw’ingye.
30 Sihali n’omughuma w’okw’inywe oyukendisyingira omo kihugho ekyo nalapa eribikalyamo, erilusyako Kalebu, mughala wa Yefune, na Yosua, mughala wa Nuni.
31 “‘“Ngendisyingiryamo abana benyu abo mwabugha muti bakendihambwa. Abana abo bo bakendisyalola oko kihugho ekyo mulyaghana.
32 Aliwe ebinda byenyu bikendiwa omo mbwarara eno.
33 Abaghala benyu bakendisyabya balisya omo mbwarara eno omo myaka 40, kandi bakendisyaghalwa busana n’erileghula* ryenyu erihika aho ekinda ky’omwiso ky’oko binda byenyu kikendisyawa omo mbwarara.
34 Omughulu mwayalebaya ekihugho nga kiri kiti, mumwabugha ebiro 40. Neryo mukendisyaghalwa busana n’ebibi ebyo mwakola omo myaka 40, kiro kighuma ni mwaka mughuma, kiro kighuma ni mwaka mughuma. Aho ho mukendisyaminya ekyo omundu akalolako amabilwa naghe.*
35 “‘“Ingye Yehova, nabiribugha. Ebyo byo ngendikolera abandu babi abalyahindana haghuma busana n’erinipinga. Bakendihwera omo mbwarara eno, embwarara eno yo bakendihweramo.
36 Abalume abo Musa atuma eriyalebya ekihugho nga kiri kiti, kandi abayilungulumula okw’ingye busana n’emyatsi mibi eyo bababwira oko kihugho ekyo,
37 niti abalume abasyabwira abandu b’engulu eyituwene oko kihugho ekyo, bakendihabwa amalipizi n’erihola embere sya Yehova.
38 Aliwe Yosua, mughala wa Nuni, na Kalebu, mughala wa Yefune, ababya b’oko abayalebaya ekihugho nga kiri kiti, ibo sibendihola.
39 Musa abere abibwira Abaisraeli bosi b’ebinywa ebyo, abandu mubalira kutsibu.
40 Mubabuka omo tututu, bamasonda erihetukira oko singyi y’ekitwa. Mubabugha bati: “Twabirikola erilolo, aliwe tune tayari eriya omo mwanya ogho Yehova abugha ati akendituha.”
41 Aliwe Musa mwabugha ati: “Busanaki mukaghana erisikya ekyo Yehova alyabugha? Simwenditoka mwatsi.
42 Isimwayayo, kundi Yehova syali haghuma nenyu, esyonzighu syenyu sikendibasinga.
43 Abaamaleki n’Abakanana bane tayari erilwa nenyu, neryo mukendikwa omo muyali. Kundi simwetakwama Yehova, Yehova naye syendibya haghuma nenyu.”
44 Aliwe mubahumayira, bamaya oko singyi y’ekitwa, aliwe erisanduku ry’endaghane ya Yehova muryatalua omo kambi, na Musa naye mwataluamo.
45 Neryo Abaamaleki n’Abakanana ababya bikere omo kiharo ky’ekitwa, mubandaghala, bamalwa nabo, n’eribatibitako eriyahika e Horma.
Amaelezo awehikwa
^ Kinywa kwa kinywa, “ni mukati wetu.”
^ Kinywa kwa kinywa, “Wamalw’itabo ng’omundu mughuma.”
^ Kutse “lulengo.”
^ Kutse “ribanda.”
^ Kinywa kwa kinywa, “n’obumbalaka.”
^ Kutse “amabya nzighu yaghe.”
