Emighanzo 15:1-41
-
Emighambo eyilebirye amahere (1-21)
-
Abaisraeli n’abate Baisraeli bamahabwa omughambo mughumerera (15, 16)
-
-
Obuhere bw’eriteka omundu amabikola ekosa omo butaminya (22-29)
-
Amalipizi ogho mundu akahabawa busana n’erikola ekosa omw’iyiririra (30, 31)
-
Omulume amitibwa busana n’eritendisikya Esabato (32-36)
-
Ritolere Abaisraeli ibahira oko syongyimba kw’amalenda (37-41)
15 Kandi Yehova mwabwira Musa ati:
2 “Ubwire Abaisraeli uti, ‘Mukendisyabya mwabingira omo kihugho ekyo ngabaha mutoke erikala mukyo,
3 mukendisyaherera Yehova y’obuhere omo muliro. Mukendisyimya enyama nguma oko syonde, esyombuli kutse esyombene syenyu, Yehova atoke eryowa ekikumbo ekyuwene.* Mukendisyakola mutya omughulu mukaherera obuhere bw’eryokererya kutse obundi buhere, bwangabya bw’eriberererya ebyo mwabiriyilagha erikola, kutse obuhere obo mundu akateka omw’anza riwe, kutse obuhere obo mukendisyabya mukateka omughulu w’ebiro bikulu byenyu.
4 Oyukendisyabya akaleta obuhere kandi akendisyabya akaletera Yehova y’efarine eyuwene mo buhere bw’akalyo, ni bugha ambu ekighuma ky’omw’ikumi kye efa* ekitswangenemo ekighuma ky’oko bini ky’ehini* y’amaghuta.
5 Kandi omughulu mukendisyabya mukaherera obuhere bw’eryokererya kutse eriherera obuli mbuli y’obulume, mukendisyabya mukaleta edivai mo kihembo ky’obwabu, ekighuma ky’oko bini ky’ehini.
6 Yamabya ini mbangale yo mukaherera, imukendihirako obuhere bw’akalyo bw’ebibiri by’omw’ikumi by’ekipimo kye efa y’efarine eyuwene eyitswangenemo ekighuma ky’ebisatu ky’ehini y’amaghuta.
7 Kandi mukendisyabya mukaleta ekighuma ky’ebisatu ky’ehini y’edivai mo kihembo ky’obwabu, ekikaluamo ekikumbo ekyuwene ekikatsemesaya* Yehova.
8 “‘Aliwe mwamabiherera Yehova y’enume y’ende mo buhere bw’eryokererya kutse obundi buhere mutoke eriberererya ebyo mulyayilagha erikola, kutse mo buhere bw’obuholo,
9 mukendisyabya mukahira n’oko nume y’ende eyo k’obuhere bw’akalyo, kw’ebisatu by’omw’ikumi bye efa y’efarine eyuwene eyitswangenemo enusu y’ehini y’amaghuta.
10 Kandi mukendisyabya mukaleta edivai mo kihembo ky’obwabu, enusu y’ehini mo buhere obukahererawa oko muliro, obukaluamo ekikumbo ekyuwene ekikatsemesaya* Yehova.
11 Ebyo byo mukendisyabya mukakola omughulu mukaherera obuli nume y’ende, obuli mbangale, obuli mbuli y’obulume, kutse obuli mbene.
12 Nomo mwangaherera esyonyama singahi, ko mukendisyabya mukakola mutya, erikwamana n’emighanzo yasyo.
13 Obuli Mwisraeli ghere-ghere ko akendisyabya akakola atya omughulu akaherera obuhere omo muliro, obukaluamo ekikumbo ekyuwene ekikatsemesaya* Yehova.
14 “‘Omundu oyute Mwisraeli oyo wikere omo kati-kati kenyu kutse oyo wabirikala nenyu omo myaka minene, naye ritolere iniaherera obuhere obukokibawa oko muliro, obukaluamo ekikumbo ekyuwene ekikatsemesaya* Yehova. Ritolere naye iniakola ngoko mukakola.
15 Inywe Baisraeli n’abate Baisraeli abikere omo kati-kati kenyu, mukendisyabya n’omughambo mughumerera. Mukendisyabya mukakwamagho omo bizazi* byenyu byosi. Oyute Mwisraeli oyuli omo kati-kati kenyu akendisyabya ng’inywe embere sya Yehova.
16 Angabya Mwisraeli, kutse oyute Mwisraeli oyo wikere omo kati-kati kenyu, inywe bosi mukendisyabya mukakwama omughambo mughumerera n’ekyalayiro kighumerera.’”
17 Kandi Yehova mwabwira Musa ati:
18 “Ubwire Abaisraeli uti, ‘Omughulu mukendingira omo kihugho ekyo ngabatwalamo
19 n’erirya oko kalyo* k’omo kighuho ekyo, mukendisyaletera Yehova y’ekihembo.
20 Mukendisyimyakyo oko farine yenyu y’erimbere-mbere eyikinemo amatsenge, mukendisyahuka mw’emikati y’omuviringo. Mukendisyahererakyo ngoko mukanaherera obuhere obukalua oko kihumbiro.
21 Omo bizazi* byenyu byosi, mukendisyabya mukaherera Yehova ekihembo ekyo mukimaya oko farine yenyu y’erimbere-mbere eyikinemo ebitsenge.
22 “‘Mwamabikola ekosa neryo imutasikya emighambo yosi eyi eyo Yehova aha Musa,
23 eyosi eyo Yehova abaha n’ebizazi* byenyu byosi ebikasa erilabira Musa, eritsuka ekiro Yehova abahayo,
24 abandu bosi bamabya imobakakola ekosa eyo omo butaminya, endeko yosi iyikendiherera enume y’ende eyikine nyilere mo buhere bw’eryokererya obukaluamo ekikumbo ekyuwene ekikatsemesaya* Yehova. Ibakendihirako n’obuhere bw’akalyo, ekihembo ky’obwabu ngoko emighambo yibughire, ibakendihirako n’embene eyikine nyilere mo buhere bw’erilolo.
25 Omuhereri akendiherera amahere wosi ayo, endeko yosi y’Abaisraeli itoke erighanyirwa, neryo oMungu akendighanyirabo kundi mubakakola ekosa, aliwe mubakaletera Yehova y’obuhere bwabo obukahererawa omo muliro, kandi mubakaleta obuhere bwabo bw’erilolo embere sya Yehova busana n’ekosa eyo balyakola.
26 OMungu akendighanyira Abaisraeli bosi n’omundu oyute Mwisraeli oyo wikere omo kati-ati kabo, kundi ilwe ini kosa eyo abandu bosi balyakola omo butaminya.
27 “‘Omundu* amabikola erilolo omo butaminya, ritolere inialeta embene y’obukali ey’omwaka mughuma kutse ebiro bike okw’aho mo buhere bw’erilolo.
28 Omuhereri akendiherera embene eyo embere sya Yehova busana n’omundu oyo oyulyakola erilolo omo butaminya kusudi aghanyirawe, neryo oMungu akendimughanyira.
29 Omughulu omundu amakola ekosa omo butaminya angabya Mwisraeli kutse oyute Mwisraeli oyo wikere omo kati-kati kenyu, abosi bakendisyabya bakakwama omughambo mughumerera.
30 “‘Aliwe omundu* oyukakola erilolo omwiyiririra, angabya Mwisraeli ghere-ghere kutse oyute Mwisraeli, iniakendibya iniamabihalya oko Yehova, n’omundu oyo ritolere inyitibwa.
31 Omundu oyo ritolere inyitibwa kundi mwakapokaya ekinywa kya Yehova kandi mwatetasikya omughambo wiwe. Ekosa yiwe yiri oko mutwe wiwe.’”
32 Abaisraeli ibane omo mbwarara, mubasunga omundu akasenya esyongwe omo kiro ky’Esabato.
33 Abamusunga akasenya esyongwe mubamutwala embere sya Musa na Haruni n’embere sy’abandu bosi.
34 Mubamuhira omo mwanya mulebe kundi babya isibalibaminya ng’akendiyirwa ati.
35 Neryo Yehova mwabwira Musa ati: “Omundu oyo itawe, n’abandu bosi bamughuseko amabwe.
36 Neryo abandu bosi mubaya ehihya w’ekambi, bamamughusako amabwe, neryo amahola, ngoko Yehova anabwira Musa.
37 Kandi Yehova mwabwira Musa ati:
38 “Ukanaye n’Abaisraeli, ubabwire uti omo bizazi* byabyo byosi babye bakasonera oko musike w’esyongyimba syabo kw’amalenda n’erihira akaliki k’erangyi ye ble eyikwa w’amalenda ayo.
39 ‘Mukendisyabya mukahira oko musike w’esyongyimba syenyu kw’amalenda, kundi omughulu mukendisyabya mukalangiragho, mukendisyabya mukibuka emighambo yosi ya Yehova n’erikwamayo. Isimwabya mukakwama emitima yenyu n’ameso wenyu, kundi bikaleka imwaleghula okw’ingye.*
40 Ekyo kikendisyabya kikabibukya emighambo yaghe yosi, neryo imwatoka erikwamayo n’eribya babuyirire embere sy’oMungu wenyu.
41 Niri Yehova Mungu wenyu, oyo wabalusaya omo kihugho kye Misri nitoke eribakangania ko niri Mungu wenyu. Niri Yehova Mungu wenyu.’”
Amaelezo awehikwa
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Ekighuma ky’omw’ikumi kye efa ini syolitre 2,2. Ulebaye Endomeko B14.
^ Ehini nguma ini syolitre 3,67. Ulebaye Endomeko B14.
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “syondengo.”
^ Kinywa kwa kinywa, “mukati.”
^ Kutse “syondengo.”
^ Kutse “n’esyondengo.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “Enafsi.”
^ Kutse “enafsi.”
^ Kutse “syondengo.”
^ Ni bugha ambu, imwakola obumbalaka bw’obunya-kirimu, kutse imwakolera eyindi miungu.
