Emighanzo 16:1-50
16 Kora mughala wa Izihari, mughala wa Kohati, mughala wa Lawi, mwayighunga na Datani na Abiramu abaghala ba Eliabu, na Oni, mughala wa Peleti, abosi basatu ni baghala ba Rubeni.
2 Ibo n’Abaisraeli 250 mubapinga Musa. Abaisraeli abo babya bakulu omo Israeli, babya balume abasombolawa eriyahindana, kandi babya balume abakumayire.
3 Mubahindana busana n’eripinga Musa na Haruni. Mubabwira Musa na Haruni bati: “Mwabirituluhya di! Abandu bosi ni babuyirire na Yehova ali omo kati-kati kabo, busanaki mwabiribya mukayiheka n’eriyiyira mo bakulu omo bandu ba Yehova?”
4 Musa abere abyowa ebinywa ebyo, mwalw’iniakukama n’erihira obusu bwiwe oko kitaka.
5 Neryo mwabwira Kora n’abosi abayighunga okw’iye ati: “Omungya omo tututu, Yehova akendikangania omundu wiwe nga nindi, oyubuyirire nga nindi, kandi nga nindi yutolere eriseghera hakuhi naye. Omundu oyo oMungu akendisombola yukendiseghera hakuhi naye.
6 Ekyo mukole kya kino: Iwe Kora n’abosi ababiriyighunga okw’iwe, mwimaye ebindu by’erihekako omuliro.
7 N’omungya mukendisyahira mubyo m’omuliro, n’erihira kubyo k’obukwa embere sya Yehova. Omundu oyo Yehova akendisombola, oyo yo mubuyirire. Inywe baghala ba Lawi, rero mwamahika hali!”
8 Neryo Musa mwabwira Kora ati: “Inywe baghala ba Lawi, kisi, muhulikirire.
9 OMungu we Israeli abiribasombola omo bandi kandi abiribalighira eriseghera hakuhi naye mutoke erikolera Yehova omubiiri mubuyirire omo hema n’eribya mukimana embere sy’Abaisraeli mutoke eribakolera, ekyo sikibatosire?
10 Kandi inywe n’abaghala benyu bosi ni bugha ambu abaghala ba Lawi, abiribasegherya hakuhi naye, ekyo sikibatosire? Mwanzire eripura n’obuhereri kwe?
11 Aho kabisa inywe n’abosi abalyayighunga okw’inywe mwabirihindana haghuma busana n’eripinga Yehova. Ibwa ye Haruni oyo mukabugha-bughako, mukalengekanaya muti iye nindi kwe?”
12 Enyuma sy’aho, Musa mwabugha ati bayende Datani na Abiramu, abaghala ba Eliabu, aliwe mubabugha bati: “Sitwendyasa!
13 Ukalengekanaya uti ekyo ulyatukolera ni mwatsi muke kwe? Si wabiritulusya omo kihugho ekikasendamo amasabu n’obuki, uti tusyaholere omo mbwarara. Neryo kandi wanzire iwatutabala?
14 Oko kwenene, siwewatukolya omo kihugho ekikasendamo amasabu n’obuki, kutse erituha omwandu w’amalima n’amalima w’emizabibu. Wanzire eritobola ameso w’abalume aba kwe? Sitwendyasa!”
15 Neryo Musa mwahitana kutsibu, mwabwira Yehova ati: “Isiwalebaya* obuhere bwabo bw’akalyo. Sindinatimya n’epunda yabo n’enguma. Kandi sindinatahutalya n’omughuma wa kubo!”
16 Neryo Musa mwabwira Kora ati: “Omungya, uhike embere sya Yehova haghuma n’ababiriyighunga okw’iwe, muhike iwe, nabo, na Haruni.
17 Obuli mundu akendisyimya ekindu kiwe ky’erihekako omuliro, iniahira kukyo k’obukwa, neryo inialeta ekindu kiwe ky’erihekako omuliro embere sya Yehova, ni bugha ambu, ebindu 250 by’erihekako omuliro. Iwe na Haruni, nenyu mukendisyasa obuli mundu n’ekindu kiwe ky’erihekako omuliro.
18 Neryo obuli mundu mwimya ekindu kiwe ky’erihekako omuliro, amahira kukyo k’omuliro n’obukwa, neryo amimana oko mulango w’ehema y’erihindanamo haghuma na Musa na Haruni.
19 Kora n’abandu abayighunga okw’iye babere babihindana oko mulango w’ehema y’erihindanamo busana n’eripinga Musa na Haruni, olukengerwa lwa Yehova mulwahulukira Abaisraeli bosi.
20 Neryo Yehova mwabwira Musa na Haruni ati:
21 “Mulue omo kati-kati k’abandu aba, nitoke eribita aho n’aho.”
22 Neryo mubakukama n’erihira obusu bwabo b’oko kitaka, n’eribugha bati: “Iwe Mungu, oMungu oyukaha abandu bosi b’engebe,* unemwendihitana oko bandu bosi busana n’erilolo ry’omundu mughuma?”
23 Kandi Yehova mwabwira Musa ati:
24 “Kanaya n’abandu, ubabwire uti, ‘Mulue hakuhi n’esyohema sya Kora, Datani, na Abiramu.’”
25 Neryo Musa mwahangana, amaya eyiri Datani na Abiramu, n’abasyakulu be Israeli mubaghenda haghuma naye.
26 Mwabwira Abaisraeli ababya bahindene ati: “Kisi mulue ahali esyohema sy’abandu babi aba, kandi isimwatula oko kindu kyabo n’ekighuma, mukasyitibwa busana n’erilolo ryabo ryosi.”
27 Mubalw’ibalua oko syombande syosi sy’amahema wa Kora, Datani, na Abiramu. Na Datani na Abiramu mubahuluka, bamimana oko mulango w’amahema wabo. Babya n’abakali babo, abana babo, n’abana babo abakine balere.
28 Neryo Musa mwabugha ati: “Eki kyo kikendileka imwaminya ngoko Yehova yo wanituma erikola emyatsi yosi eyi, kandi ngoko sindiyitswa erikolayo.
29 Abandu aba bamabihola ngoko abandu bosi bakahola, kandi bamabihabwa amalipizi awali ng’aw’abandu bosi, ni bugha ambu Yehova iyo watanituma.
30 Aliwe Yehova amabibakolera omwatsi owakaswekaya, neryo ekitaka ikyatulika* n’eribamera, ibo n’ebindu byabo byosi, neryo ibandaghalira omw’isinda* ibakineho, aho ho mukendiminyira ngoko abalume aba mubakapokaya Yehova.”
31 Abere anabibugha ebinywa ebyo, ekitaka ekyo babya bimeneko mukyatulika.
32 Ekitaka mukyatulika n’eribamera ibo, ebihanda byabo, n’abandu bosi ba Kora n’ebindu byabo byosi.
33 Neryo ibo n’abandu bosi mubandaghalira omo yisinda ibakineho, neryo ekitaka mukyaswikabo, bamabulirana omo Baisraeli.
34 Abaisraeli bosi ababya hakuhi nabo mubatibita ibanemulaka n’eribugha bati: “Twabirisagha, netu ekitaka kyanganatumera!”
35 Neryo Yehova mwaleta omuliro owahisaya abalume 250 ababya bakaherera obukwa.
36 Neryo Yehova mwabwira Musa ati:
37 “Ubwire Eleazari mughala wa Haruni omuhereri uti alusaye omo muliro mw’ebindu by’erihekako omuliro, kundi ni bibuyirire, kandi umubwire uti apanza-panzire omuliro oyo w’ehali.
38 Ebindu by’erihekako omuliro by’abalume abalyakola erilolo, neryo bamahola busana n’erilolo eryo, bikendikokotibwamo ehinzanza hy’erihira oko kiherero, kundi mubahira ebindu ebyo embere sya Yehova neryo mubyabya bibuyirire. Ehinzanza ehyo hikendisyabya hikibukya Abaisraeli omwatsi oyo.”
39 Neryo omuhereri Eleazari mwimya ebindu by’erihekako omuliro by’ekwivre,* ebyaletawa n’abalume abatimibawa, amaponda-pondabyo bitoke erihirwa oko kiherero,
40 ngoko Yehova anamubwira erilabira Musa. Ekyo kyabya kikibukya Abaisraeli ngoko omundu oyutahamulirwe oyute w’omo kihanda kya Haruni syatolere eriseghera hakuhi busana n’erihisya obukwa embere sya Yehova. Kandi ngoko siritolere omundu wosi-wosi akabya nga Kora n’abayighunga okw’iye.
41 Ekiro ekikwamire, Abaisraeli bosi mubatsuka eribugha-bugha oko Musa na Haruni bati: “Inywe babiri, mwabiriita abandu ba Yehova.”
42 Omughulu Abaisraeli bahindana busana n’eripinga Musa na Haruni, mubabindukira ehema y’erihindanamo, neryo mubalangira ekitu ikyabiriswikayo, n’olukengerwa lwa Yehova mulwabahulukira.
43 Musa na Haruni mubaya embere sy’ehema y’erihindanamo.
44 Neryo Yehova mwabwira Musa ati:
45 “Balume, mulue omo kati-kati k’abandu aba, nitoke eriitabo aho n’aho.” Neryo Musa na Haruni mubakukama, bamahira obusu bwabo oko kitaka.
46 Musa mwabwira Haruni ati: “Wimaye ekindu ky’erihekako omuliro, uyahireko oko muliro owali oko kiherero. Uhire obukwa oko muliro oyo, ulabe luba-luba omo bandu n’erikola ekikendileka ibaghanyirwa, kundi Yehova abirihitana kutsibu. Ekihunzo kyamabitsuka!”
47 Neryo haruni mwalw’inimya ekindu ky’erihekako omuliro, ngoko Musa anabugha, amatibita, n’eriyalaba omo bandu. Ekihunzo kyabya ikyabiritsuka omo kati-kati k’abandu. Neryo Haruni mwahira obukwa oko kindu ky’erihekako omuliro, amakola ekyo ritolere erikola kusudi abandu baghanyirawe.
48 Mwahangana omo kati-kati k’abandu abaholire n’abakineho, neryo ekihunzo mukyahwa.
49 Abahola omo kihunzo babya 14 700. Omo mighanzo eyo simuli abahola busana n’omwatsi wa Kora.
50 Omughulu Haruni asuba eyiri Musa oko mulango w’ehema y’erihindanamo, ekihunzo kyabya ikyabirihwa.
Amaelezo awehikwa
^ Kutse “Isiwaligha.”
^ Kinywa kwa kinywa, “oMungu w’ebirimu by’emibiri yosi.”
^ Kinywa kwa kinywa, “ikyatandula obuno bwakyo.”
^ Kutse “omo Sheoli,” ni bugha ambu eyisinda y’abandu bosi. Ulebaye Amaana w’ebinywa.
^ Kutse “by’omulinga.”
