Emighanzo 17:1-13
-
Omutso wa Haruni amasako omusanga (1-13)
17 Neryo Yehova mwabwira Musa ati:
2 “Ukanaye n’Abaisraeli kandi wimaye omo buli kihanda mo mutso mughuma-mughuma. Wimayegho oko bakulu b’obuli kihanda. Emyutso yosi ikendibya 12. Uhandike erina ry’obuli mundu oko mutso wiwe.
3 Ukendihandika erina rya Haruni oko mutso w’ekihanda kya Lawi kundi obuli mukulu w’ekihanda akendileta omutso mughuma.
4 Uhire emyutso omo hema y’erihindanamo embere sy’erisanduku ry’endaghane, aho nibeghere erikuhulukira.
5 Omutso w’omundu oyo ngendisombola akendyasako omusanga, neryo ngendikinga obuno bw’Abaisraeli, sibendisyabya bakanibugha-bughako. Nenyu sibendisyabya bakababugha-bughako.”
6 Neryo Musa mwakania n’Abaisraeli. Abakulu babo bosi mubaleta emyutso yabo, obuli mukulu w’ekihanda mwaleta omutso mughuma. Neryo eyosi muyabya 12, n’omutso wa Haruni abya omo myutso yabo eyo.
7 Neryo Musa mwahira emyutso eyo embere sya Yehova, omo hema y’endaghane.
8 Neryo ekiro ekikwamire, Musa abere abingira omo hema y’endaghane, mwalangira omutso wa Haruni, ow’omo kihanda kya Lawi, iniabiryasako omusanga, n’eryasako amatunda w’elozi* aw’erire.
9 Neryo Musa mwalusya emyutso yosi eyabya embere sya Yehova, amatwalirayo Abaisraeli bosi. Mubalebyayo, neryo obuli mundu amimya omutso wiwe.
10 Enyuma sy’aho, Yehova mwabwira Musa ati: “Usubaye omutso wa Haruni embere sy’erisanduku ry’endaghane. Ni kindu ky’eribika kitoke eribya kikakunga abakatsukisaya omulele, kusudi baleke erinibugha-bughako, kandi bakasyahola.”
11 Musa mwalw’iniakola ngoko Yehova anamubwira. Kw’anakola atya.
12 Neryo Abaisraeli mubabwira Musa bati: “Eryo tukendihola, oko kwenene ibwa lero tukahwaho, itwe bosi tukendihwa!
13 Erinahika ahali ehema ya Yehova omundu inialw’iniahola! Kwe lero, itwe bosi ko tukendihwa tutya!”
Amaelezo awehikwa
^ Kutse “esyo amande.”