Emighanzo 18:1-32
18 Neryo Yehova mwabwira Haruni ati: “Mwamatendisikya emighambo eyilebirye ahabuyirire, ekosa eyo iyikendibya okw’iwe, abaghala baghu, n’ekitunga kyaghu. Kandi mwamatendisikya ebyalayiro ebilebirye obuhereri, ekosa eyo iyikendibya okw’iwe n’abaghala baghu.
2 Kandi ulete abaghala benyu ab’omo kihanda kya Lawi, ni bugha ambu ab’omo kitunga kya baba waghu, ubalete hakuhi naghu batoke erikuwatikya n’erikola omubiiri wo haghuma naghu, iwe n’abaghala baghu embere sy’ehema y’endaghane.
3 Batolere ibakukolera n’erikola emibiiri yosi eyilebirye ehema, aliwe siritolere bakahika hakuhi n’ebindu ebikakolesibawa ahabuyirire n’oko kiherero, ibo n’enyu mukasyahola.
4 Bakendisyabya bakakola haghuma naghu n’erikola emibiiri yabo ey’oko hema y’erihindanamo n’emibiiri yosi y’ehema. Omundu wosi-wosi oyute muhereri* isyahika hakuhi naghu.
5 Mutolere imwakola omubiiri wenyu owalebirye ahabuyirire n’ekiherero, ngasyahitana oko Baisraeli.
6 Nabiriyimirya abaghala benyu, Abalawi omo kati-kati k’Abaisraeli batoke eribya kihembo okw’inywe. Babirihabwa Yehova batoke erikola emibiiri eyikakolawa oko hema y’erihindanamo.
7 Omubiiri owakakolawa oko kiherero n’enyuma sy’erido ni waghu n’abaghala baghu. Ritolere imwakola omubiiri oyo. Nabiribaha omubiiri w’eribya bahereri mo kihembo. Omundu oyukaseghera hakuhi n’ahabuyirire atolere initibwa.”
8 Kandi Yehova mwabwira Haruni ati: “Namakuyira mo mwimaniri w’ebihembo ebyo bakendisyabya bakaniletera. Namakuha iwe n’abaghala baghu ekihande ky’oko bindu byosi bibuyirire ebyo Baisraeli bakendisyabya bakaleta. Mukendisyabya mukakola mutya kera na kera.
9 Oko bindu byosi ebibuyirire kutsibu ebiryahererawa omo muliro, ebyo mukendisyabya mukimya bya bino: Amahere wosi agho bakaleta, ni bugha ambu, amahere w’akalyo, amahere w’erilolo, n’amahere w’olubanza* agho bakaniletera. Amahere ayo ni bindu ebibuyirire kutsibu okw’iwe n’oko baghala baghu.
10 Mukendisyabya mukalirabyo ahabuyirire kutsibu. Ngambe obuli mulume inialya kubyo. Ni kindu kibuyirire okw’inywe.
11 Kino nakyo kikendisyabya kikabya kyenyu: Ebihembo ebyo Baisraeli bakaleta n’amahere w’erihungya-hungya. Nabirikuhabyo, iwe, abaghala baghu, n’abali baghu. Bikendisyabya bikabya byaghu kera na kera. Omundu oyo werire oyuli omo nyumba yaghu yukendisyabya akalya kubyo.
12 “Ngakuha amaghuta wosi awuwene, edivai nyihya-nyihya eyuwene, n’ebyalya byosi ebyuwene, ni bugha ambu ebyalya by’erimbere-mbere ebyo bakaha Yehova.
13 Ebyalya byosi by’erimbere-mbere ebikera omo kihugho kyabo, ebyo bakendisyabya bakaletera Yehova, bikendisyabya bikabya byaghu. Obuli mundu omo nyumba yaghu oyo werire anganalya kubyo.
14 “Obuli kindu ekyabirilusibwa omo bindi busana n’omubiiri mubuyirire* omo Israeli kikendisyabya kikabya kyaghu.
15 “Obuli kambere k’ekihangyikwa ekiriho, ako bakendisyabya bakaletera Yehova, kangabya k’omundu kutse ak’enyama, kakendisyabya kakabya kaghu. Aliwe isiwasyabula eribya ukakombola ehimbere hy’abandu. Ukendisyabya ukakombola ehimbere hy’esyonyama esiterire.
16 Ehimbere hikendisyabya hyabibya n’omwisi mughuma kutse minene okw’aho, ukendisyabya ukakombolahyo omo syofranga sy’erikombolamo, ni bugha ambu esyofranga esilingene n’esyoshekeli* itano sy’efeza, erikwamana n’eshekeli y’ahabuyirire.* Eshekeli eyo ni gera* 20.
17 Aliwe akambere ako kamabibya ini nume y’ende, ekyana ky’embuli ky’obulume kutse eky’embene, siwendisyabya ukakombolabyo. Ehimbere ehyo ni hibuyirire. Ukendisyabya ukatsatsanga omusasi wahyo oko kiherero, kandi ukendisyabya ukahisirya ebisabu byahyo mo buhere obukahererawa omo muliro obukaluamo ekikumbo ekyuwene ekikatsemesaya* Yehova.
18 N’enyama y’ehimbere ehyo ikendisyabya ikabya yaghu. Ikendisyabya ikabya yaghu ngoko ekikuba ky’obuhere bw’erihungya-hungya n’ekihinga ky’amali ni byaghu.
19 Ebihembo byosi ebibuyirire ebyo Baisraeli bakendisyabya bakaletera Yehova, nabirikuhabyo, iwe n’abaghala baghu, n’abali baghu, ebyo ni byenyu mughulu wosi. Eno ni ndaghane y’omunyu,* endaghane y’omughulu wosi eyo Yehova akakola naghu, n’abana baghu.”
20 Kandi Yehova mwabwira Haruni ati: “Siwendisyabya n’omwandu omo kihugho kye Israeli, kandi sihali n’ekiharo n’ekighuma omo kihugho ekyo ekikendisyabya kyaghu. N’ingye righabo ryaghu, n’omwandu waghu omo kati-kati k’Abaisraeli.
21 “Uminye ngoko omwandu ogho nabiriha abaghala ba Lawi kyo kighuma ky’omw’ikumi ky’ebyalya ebikera omo Israeli. Nabiribahakyo busana n’omubiiri ogho bakakola, omubiiri ogho bakakolera omo hema y’erihindanamo.
22 Abaisraeli sibendisyabya bakahika hakuhi n’ehema y’erihindanamo. Bamabihika hakuhi nayo, ibamakola erilolo, neryo ibakendihola.
23 Ritolere Abalawi ibakola emibiiri y’oko hema y’erihindanamo. Ekosa y’abandu yikendisyabya ikabya oko mutwe wabo. Kino ni kyalayiro kya kera na kera omo bizazi* byenyu byosi. Sibendisyahabwa omwandu omo kati-kati k’Abaisraeli.
24 Kundi ekighuma ky’omw’ikumi ekyo Baisraeli bakaherera Yehova, nabirihakyo Abalawi mo mwandu. Kyo kiryaleka inababwira niti, ‘Sibendisyahabwa omwandu omo kati-kati k’Abaisraeli.’”
25 Enyuma sy’aho, Yehova mwabwira Musa ati:
26 “Ukendibwira Abalawi uti, ‘Abaisraeli bakendisyabya bakabaha ekighuma ky’omw’ikumi ekyo nabiribaha mo mwandu. Babibaleterakyo, n’enyu mukendisyabya mukalusyako ekihembo ekyo mukendiherera Yehova, ni bugha ambu ekighuma ky’omw’ikumi ky’omo kighuma ky’omw’ikumi ekyo.
27 Kikendisyalangirwa mo kihembo ekyo nenyu mukateka. Kikendisyabya kikalangirwa mo kalyo akakalua oko kihumbiro kyenyu, kutse ng’edivai eyikalua omo kikamiro kyenyu, kutse amaghuta awakalua eyo mukengera amaghuta.
28 Nenyu ko mukendisyabya mukaha mutya Yehova y’ekihembo ekikalua omo bighuma byosi by’omw’ikumi ebyo Baisraeli bakabaletera. Mukendisyabya mukaha omuhereri Haruni ekihembo kya Yehova ekyo mulyalusaya omo bighuma ebyo by’omw’ikumi.
29 Obuli muhanda w’ekihembo ekyo mukendiha Yehova, mukendisyabya mukalusyakyo oko bihembo ebyuwene kutsibu, ebyo mukahabawa mo kindu kibuyirire.’
30 “Kandi ukendibabwira uti, ‘Inywe Balawi, mukendisyabya mwabiherera ebyuwene kutsibu, ebyo mulyalusaya omo bindu ebyo, ebikendisyasighalira bikendisyabya bikalangirwa ng’ebyalya ebiryalua oko kihumbiro kyenyu, kandi ng’edivai eyikalua oko kikamiro kyenyu, kutse ng’amaghuta awakalua eyo mukengera amaghuta.
31 Inywe n’ebihanda byenyu mwanganalirabyo ahosi-hosi aho mwanzire, kundi wo musahara wenyu busana n’omubiiri ogho mukakolera oko hema y’erihindanamo.
32 Omughulu mukendisyabya mukaherera ebindu ebyuwene kutsibu ebyo mulyalusaya omo bindu ebyo, aho isimuliko lubanza. Isimwatsandaya ebindu bibuyirire by’Abaisraeli mukasyahola.’”
Amaelezo awehikwa
^ Kinywa kwa kinywa, “omugheni.” Ni bugha ambu omundu oyute w’omo kihanda kya Haruni.
^ Kutse “w’omusango.”
^ Ni bugha ambu ekindu ekyabiriyirwamo kibuyirire busana n’oMungu, ekyo omundu ateangabindula, kutse erikombola.
^ Eshekeli nguma ini syograme 11,4. Ulebaye Endomeko B14.
^ Kutse “eshekeli nyibuyirire.”
^ Egera nguma ini grame 0,57. Ulebaye Endomeko B14.
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Ni bugha ambu, endaghane y’omughulu wosi eyiteyangabinduka.
^ Kutse “syondengo.”
