Emighanzo 19:1-22
-
Ende y’eruje n’amaghetse awakeraya (1-22)
19 Kandi Yehova mwabwira Musa na Haruni ati:
2 “Ono ni mughambo ogho Yehova abirihiraho: ‘Ubwire Abaisraeli uti bakuletere ende y’eruje eyiteko bulema, kandi eyo batebatahirako omuketo.
3 Mukendihayo omuhereri Eleazari, akenditwalayo ehihya w’ekambi, neryo bakendikererayo embere siwe.
4 Neryo omuhereri Eleazari akendimya oko musasi wayo omo munwe, neryo akenditsatsangiragho ngendo 7 embere sy’omulango w’ehema y’erihindanamo.
5 Bakenditimya ende eyo embere siwe. Bakenditimya engobi yayo, enyama yayo, omusasi wayo, n’ebise byayo.
6 Enyuma sy’aho, omuhereri akendimya akati k’omwerezi, ehisopo, n’akakimba k’erangi y’omusasi eyihenirye,* iniaghusabyo omo muliro ogho bakatimirayamo ende.
7 Enyuma sy’aho, omuhereri akendifula esyongyimba siwe n’erinaba. N’enyuma sy’aho, anganasuba omo kambi; aliwe akendibya isyerire erihika omw’igholo.
8 “‘Oyulyatimaya ende akendifula esyongyimba siwe omo maghetse n’erinaba. Kandi akendibya isyerire erihika omw’igholo.
9 “‘Omundu oyo werire akendikuma-kuma eribu ry’ende eyo n’eritwalaryo omo mwanya ow’erire, ehihya w’ekambi. Ritolere Abaisraeli ibabika eribu eryo. Rikendisyabya rikakolesibwa eriteghekania amaghetse w’eryeryamo. Ni buhere bw’erilolo.
10 Oyulyakuma-kuma eribu ry’ende eyo akendifula esyongyimba siwe, kandi akendibya isyerire erihika omw’igholo.
“‘Oyo ni mughambo ogho Abaisraeli n’abate Baisraeli abikere omo kati-kati kabo bakendisyabya bakakwama mughulu wosi.
11 Omundu wosi-wosi oyukatula oko kinda akendibugha ebiro 7 isyerire.
12 Ekiro ky’akasatu akendiyerya omo maghetse, neryo omo kiro kye 7 akendibya mundu oyo werire. Aliwe atetayerya omo kiro ky’akasatu, isyendibya omundu oyo werire omo kiro kye 7.
13 Omundu wosi-wosi oyukatula oko kinda ky’omundu neryo iniatayerya, akabya iniamatsandya ehema ya Yehova. Ritolere omundu* oyo initibwa. Akendibya iniakine mundu oyuterire kundi sibetamutsatsangako amaghetse awakeraya. Omutsafu wiwe akendibya iniakine okw’iye.
14 “‘Omughambo w’erikwama omughulu omundu amaholera omo hema w’ono: Omundu wosi-wosi oyukingira omo hema kutse oyulue iniabiringiramo akendibugha ebiro 7 isyerire.
15 Obuli kindu ekiteko omufuniko sikyerire.
16 Omundu wosi-wosi oyuli omo kisuki oyukatula oko mundu oyulitibawa omo muyali, kutse eritula oko kinda, amakuha w’omundu, kutse oko yisinda akendibugha ebiro 7 isyerire.
17 Busana n’eryerya omundu oyuterire, bakendihira omo kindu mw’eribu ry’ende y’obuhere bw’erilolo eyiryatimibawa, n’eryuta oko ribu eryo eriri omo kindu kw’amaghetse awalyatehawa oko lusi.
18 Neryo omundu oyo werire akendimya ehisopo iniahirayo omo maghetse, neryo iniakolesya ehisopo eyo eritsatsanga amaghetse oko hema, oko bindu byosi ebikakolesibawamo, n’oko bandu bosi abaluemo, n’oko oyulyatula oko makuha, kutse oko mundu oyulitibawa, kutse oko kinda, kutse oko yisinda.
19 Omo kiro ky’akasatu n’omo kiro kye 7, omundu oyo werire akenditsatsanga amaghetse ayo oko mundu oyuterire. Kandi akendimweryako erilolo omo kiro kye 7. Enyuma sy’aho, omundu oyuterire akendifula esyongyimba siwe n’erinaba, n’omw’igholo akendibya omundu oyo werire.
20 “‘Aliwe omundu amabya isyerire, kandi iniaghana eriyerya, omundu oyo atolere initibwa, kundi abiritsandya ehema ya Yehova. Omundu oyo sy’erire, kundi mwatetatsatsangwako amaghetse awakeraya.
21 “‘Bakendisyabya bakakwama ekyalayiro kino mughulu wosi. Oyukatsatsanga oko bandu kutse oko bindu kw’amaghetse awakeraya atolere iniafula esyongyimba siwe, n’oyukatula oko maghetse awakeraya akendibya omundu oyuterire erihika omw’igholo.
22 Ekyosi-kyosi ekyo omundu oyuterire akatulako kikendibya isikyerire, n’omundu oyukatula kukyo akendibya isyerire erihika omw’igholo.’”
