Emighanzo 20:1-29
20 Ekiro ky’erimbere ky’omwisi, Abaisraeli bosi mubahika omo mbwarara ye Zini, neryo mubapanga e Kadeshi. Eyo yo Miriamu aholera n’eritabwa.
2 Aliwe yabya isiyiri amaghetse agho Baisraeli banganywa, neryo mubahindana haghuma busana n’eribugha-bugha oko Musa na Haruni.
3 Mubatsuka eribugha-bugha na Musa bati: “Kumbe netu tulyahola omughulu abaghala betu balyaholera embere sya Yehova.
4 Busanaki mumukaleta endeko ya Yehova omo mbwarara eno? Mumwatuleta kusudi itwe n’esyonyama syetu tuholeremo?
5 Busanaki mulyatulusaya e Misri n’erituleta omo mwanya ono owatuwene? Omundu syangaheramo kindu. Simuli esyotini, emizabibu, n’amakomamanga. Simuli n’amaghetse w’erinywa.
6 Neryo Musa na Haruni mubalua ahali Abaisraeli, bamaya oko mulango w’ehema y’erihindanamo. Mubakukama n’erihira obusu bwabo oko kitaka, neryo olukengerwa lwa Yehova mulwabahulukira.
7 Neryo Yehova mwabwira Musa ati:
8 “Wimaye omutso, uhindanaye Abaisraeli bo haghuma, iwe, na mughala wenyu Haruni. Neryo mubughe n’olubwe* embere syabo kusudi lulwemo amaghetse. Ukendibahulukirya amaghetse omo lubwe, neryo ukendihabo amaghetse w’erinywa, ibo n’esyonyama syabo.”
9 Neryo Musa mwimya omutso owabya embere sya Yehova, ngoko oMungu anamubwira.
10 Neryo Musa na Haruni mubahindania Abaisraeli embere sy’olubwe.* Neryo Musa amabwirabo ati: “Muhulikirire, inywe batwenge! Tubalusiraye amaghetse omo lubwe olu?”
11 Neryo Musa mwasumba ebyala biwe, amapika oko lubwe* ngendo ibiri, neryo amaghetse mangyi amatsuka erilua muryo. Neryo Abaisraeli n’esyonyama syabo bamanywa.
12 Enyuma sy’aho, Yehova mwabwira Musa na Haruni ati: “Kundi simwetanikirirya n’erinisikya embere sy’Abaisraeli, simwendikolya abandu aba omo kihugho ekyo ngabaha.”
13 Ayo w’amaghetse we Meriba,* eyo Baisraeli bayilungumula oko Yehova, neryo amakanganiabo ngoko iye ni Mungu mubuyirire.
14 Enyuma sy’aho, Musa mwatuma abandu, bamalua e Kadeshi eriyabwira omwami we Edomu bati: “Mughala wenyu ye Israeli ati, ‘Unasi ndeke amaligho wosi awalyatuhikira.
15 Abobaba wetu mubaya e Misri, neryo netu mutwabugha e Misri y’emyaka* mingyi. Abamisri mubatwaghalya itwe n’abobaba wetu.
16 Oko mwiso, mutwalakira Yehova, naye mwatwowa. Mwatuma omumalaika wiwe n’eritulusya omo kihugho kye Misri, neryo lino tune e Kadeshi, omuyi owali oko mupaka w’ekiharo kyaghu.
17 Kisi utulighire erilaba omo kihugho kyaghu. Sitwendilaba omo ririma ryosi-ryosi, kutse omo ririma ryosi-ryosi ry’emizabibu, kandi sitwendinywa oko maghetse w’eribulu ryosi-ryosi. Tukendilaba omo nzira y’omwami butsir’ikitira oko luhande lw’amali kutse lw’amalembe erihika omughulu tukendibugha erilaba omo kiharo kyaghu.’”
18 Aliwe omwami we Edomu mwamusubirya ati: “Isimwalaba omo kiharo kyetu. Mwamabilaba mukyo, ingendyasa inalwa nenyu omo muyali.”
19 Neryo Abaisareli mubamusubirya bati: “Tukendihetuka omo ndaki nene. Kandi itwe, kutse esyonyama syetu syamabinywa oko maghetse waghu, itukendilihagho. Ah’erilaba hasa ho tulaghireko.”
20 Aliwe mwabugha ati: “Simwendilaba.” Neryo omwami we Edomu mwasyahindana nabo iniane n’abasuda bangyi, kandi abakalire.*
21 Neryo omwami we Edomu mwatalighira Abaisraeli erilaba omo kiharo kiwe, neryo Abaisraeli mubalekana naye.
22 Abandu be Israeli, endeko yosi mubalua e Kadeshi, bamahika oko Kitwa kye Hori.
23 Neryo ibane oko Kitwa kye Hori, oko musike w’ekihugho kye Edomu, Yehova mwabwira Musa na Haruni ati:
24 “Haruni akendihindanibwa* n’abandu biwe. Syendingira omo kihugho ekyo ngendiha Abaisraeli, kundi inywe babiri mumutakwama ebyalayiro byaghe ebyabya bilebirye amaghetse we Meriba.
25 Wimaye Haruni na mughala wiwe Eleazari, ubatwale oko Kitwa kye Hori.
26 Mukendibya mwabihikayo, iwalusya Haruni y’esyongyimba siwe, n’eryambalyasyo Eleazari mughala wiwe, na Haruni akendiholera eyo.”*
27 Neryo Musa mwakola ngoko Yehova anamubwira. Mubirukira oko Kitwa kye Hori, Abaisraeli bosi ibanalangire.
28 Mubabya babihikayo, Musa mwalusya Haruni y’esyongyimba siwe, amambalyasyo Eleazari mughala wa Haruni. Enyuma sy’aho, Haruni mwaholera eyo oko singyi y’ekitwa, neryo Musa na Eleazari mubalua oko kitwa.
29 Abaisraeli bosi mubabya babilangira ngoko Haruni abirihola, mubamulira omo biro 30.
Amaelezo awehikwa
^ Kutse “n’olukuka.”
^ Kutse “sy’olukuka.”
^ Kutse “lukuka.”
^ Ni bugha ambu “amalwa, obuhaka.”
^ Kinywa kwa kinywa, “y’ebiro.”
^ Kinywa kwa kinywa, “iniane n’abandu bangyi n’ebyala by’amaka.”
^ Ebi ni binywa by’ekisosekanio ebikamaanisaya erihola.
^ Kinywa kwa kinywa, “akendihindanibwa n’eriholera eyo.”
