Emighanzo 21:1-35
21 Omughulu Aradi, omwami Omukanana oyo wabya ikere omo Negebu, owa ngoko Abaisraeli mubakasira omo nzira ye Atarimu, mwalwa nabo n’eriheka abaghuma ba kubo mo banyewa.
2 Neryo Abaisraeli mubayilagha embere sya Yehova bati: “Wamabituwatikya erisinga abandu aba, itukenditsandya n’emiyi yabo.”
3 Neryo Yehova mwowa omulenge w’Abaisraeli, amabawatikya erisinga Abakanana. Abaisraeli mubitabo n’eritsandya emiyi yabo. Ekyo kyo kyaleka ibahula omwanya oyo mo Horma.*
4 Babere babilua oko Kitwa kye Hori, mubalaba omo nzira eyikaya oko Ngetse y’Engula, kundi babya isibangalaba omo kihugho kye Edomu. Neryo abandu* mubaluha busana n’olughendo.
5 Neryo Abaisraeli mubabugha-bugha oko Mungu n’oko Musa bati: “Busanaki mumukatulusaya omo kihugho kye Misri? Mumukatulusayayo kusudi tuholere omo mbwarara? Simuli kalyo n’amaghetse, kandi situkyanzire* erirya akalyo katya-katya aka.”
6 Neryo Yehova mwatuma omo kati-kati k’abandu mw’esyonzoka esirimo esumu.* Musyabya sikalumanga abandu, neryo Abaisraeli bangyi mubahola.
7 Neryo abandu mubasa ahali Musa n’eribugha bati: “Mutukakola erilolo omughulu tulyabugha-bugha oko Yehova n’okw’iwe. Utusabire oko Yehova atoke erilusya esyonzoka omo kati-kati ketu.” Neryo Musa mwasabirabo.
8 Neryo Yehova mwabwira Musa ati: “Ukokotaye ekindu ekisosire enzoka eyirimo esumu,* uhanikekyo oko muti. Omughulu enzoka ikendibya ikaluma omundu, akendibya akalebya ekindu ekyo atoke eribyaho.”
9 Musa mwalw’iniakokotya enzoka y’ekwivre,* n’erihanikayo oko muti. Omughulu enzoka yabya ikaluma omundu, mwabya akalebya enzoka y’ekwivre eyo, neryo iniatahola.
10 Enyuma sy’aho, Abaisraeli mubaghenda, bamayapanga e Oboti.
11 Mubalua e Oboti, bamayapanga e Iyabarimu, omo mbwarara eyihererenie ne Moabu, oko luhande lw’eyikasira ryuba.
12 Mubalua aho, bamayapanga hakuhi n’Omusya* we Zeredi.
13 Mubalua aho, bamayapanga omo kiharo kye Arnoni. Ekiharo kye Arnoni kiri omo mbwarara eyitsukire oko mupaka w’Abaamori. Ekiharo ekyo w’omupaka omo kati-kati ke Moabu n’Abaamori.
14 Ekyo kyo kikaleka ekitabu ky’Amalwa wa Yehova ikyahula “Vahebu, omwanywa owali Esufa, n’emisya* ye Arnoni,
15 n’obwandaghala* bw’emisya, obuhikire omo kiharo kye Ari n’eriyahika oko mupaka we Moabu.”
16 Enyuma sy’aho, mubaya e Beeri. Beeri ni ribulu aho Yehova abwirira Musa ati: “Uhindanaye abandu nitoke erihabo amaghetse.”
17 Oko mughulu oyo, Abaisraeli mubimba olwimbo luno:
“Iwe ribulu, uluamo amaghetse. Musubirayeryo!*
18 Eribulu eryo abakulu batakula, eribulu eryo esyoseghu-seghu syatakula,Omo mutso w’omukomanda, n’omo myutso yabo-yabo.”
Enyuma sy’aho, mubalua omo mbwarara, bamaya e Matana.
19 Mubalua e Matana, bamaya e Nahalieli. Mubalua e Nahalieli, bamaya e Bamoti.
20 Mubalua e Bamoti, bamaya omo musya owali omo kiharo kye Moabu, oko singyi ye Pisga, oho mundu akalangira iniane e Yeshimoni.*
21 Neryo Israeli mwatuma abandu bayabwire Sihoni, omwami w’Abaamori, bati:
22 “Utulighire erilaba omo kihugho kyaghu. Sitwendilaba omo ririma ryosi-ryosi kutse omo ririma ryosi-ryosi ry’emizabibu. Sitwendinywa oko maghetse w’eribulu ryosi-ryosi. Tukendilaba omo nzira y’omwami erihika omughulu tukendibugha erilaba omo kiharo kyaghu.”
23 Aliwe Sihoni mwatalighira Abaisraeli erilaba omo kiharo kiwe. Mwahindania abasuda biwe, amayalwa n’Abaisraeli omo mbwarara. Mwahika e Yahazi, neryo amatsuka erilwa n’Abaisraeli.
24 Aliwe Abaisraeli mubamusinga omo muyali n’erimya ekihugho kiwe eritsuka e Arnoni erihika e Yaboki, hakuhi n’Abaamoni, kundi Yazeri yihikire oko mupaka w’Abaamoni.
25 Neryo Abaisraeli mubimya emiyi yosi eyo, bamikala omo miyi yosi y’Abaamori. Mubikala e Heshboni n’omo milongo yosi eyitimbire oko miyi eyo.
26 Kundi Heshboni abya muyi wa Sihoni, omwami w’Abaamori oyo walwa n’omwami we Moabu n’erimya ekihugho kiwe kyosi erihika e Arnoni.
27 Kyo kyaleka ihabya ebinywa bino by’erisekererya:
“Mwase e Hesboni.
Omuyi wa Sihoni ahimbawe n’eriwatibwa.
28 Kundi omuliro abirilua e Heshboni, ekirimi kyabirilua omo muyi wa Sihoni.
Kyabiritimya e Ari eyiri e Moabu, kyabiritimya abakama abali omo myanya y’endata ye Arnoni.
29 Obulighe okw’iwe Moabu! Inywe bandu be Kemoshi, mukenditsandibwa,
Bakayira abaghala babo mo basayi n’abali babo mo banyewa ba Sihoni, omwami w’Abaamori.
30 Tughuse kubo kw’emisali;Omuyi we Heshboni akenditsandibwa erihika e Diboni;Tutsandayebo erihika e Nofa;Omuliro akendiyitsatsanga erihika e Medeba.”
31 Neryo Abaisraeli mubikala omo kihugho ky’Abaamori.
32 Enyuma sy’aho, Musa mwatuma abandu bayalebaye omuyi we Yazeri ng’aly’ati. Abaisraeli mubahamba emilongo eyitimbire kugho, bamatibita oko Baamori ababyayo.
33 Enyuma sy’aho, mubalolera ehandi, bamahetuka omo nzira eyikaya e Bashani. Neryo Ogu, omwami we Bashani, mwasa n’abasuda biwe bosi busana n’erilwa n’Abaisraeli e Edrei.
34 Neryo Yehova mwabwira Musa ati: “Isiwamusagha, kundi ngendikuwatikya erimukinda, iye, n’abandu biwe bosi, n’ekihugho kiwe. Ukendimukolera ekyo ulyakolera Sihoni, omwami w’Abaamori, oyo wabya ikere e Heshboni.”
35 Neryo Abaisraeli mubamwita, iye n’abana biwe n’abandu biwe bosi. Muhatabya n’omundu n’omughuma w’oko bandu biwe oyo wasaka, kandi mubimya n’ekihugho kiwe.
Amaelezo awehikwa
^ Ni bugha ambu “eritsandya.”
^ Kutse “enafsi y’abandu.”
^ Kutse “twabiripona.”
^ Kutse “esyonzoka esikaleka omubiri iniabeberera.”
^ Kutse “eyikaleka omubiri iniabeberera.”
^ Kutse “y’omulinga.”
^ Kutse “n’akusi akakuma.”
^ Kutse “n’ehyusi ehikuma.”
^ Kinywa kwa kinywa, “n’obuno.”
^ Kutse “Mwimbireryo!”
^ Kutse alinga, “omo mbwarara.”
