Emighanzo 23:1-30
23 Neryo Balamu mwabwira Balaki ati: “Uhimbe hano ebiherero 7, kandi uniteghekaniraye esyonde sy’obulume 7, n’esyombangale 7.”
2 Balaki mwalw’iniakola ngoko Balamu alyamubwira. Neryo Balaki na Balamu mubaherera ende nguma y’obulume n’embangale nguma oko buli kiherero.
3 Enyuma sy’aho, Balamu mwabwira Balaki ati: “Usighale hano hakuhi n’obuhere bwaghu bw’eryokererya, ingye ngalua hano. Kwa muhwa Yehova akendikania naghe, ngendikubwira ebyosi ebyo akendinibwira.” Neryo mwaya oko katwa akateko kindu.
4 Neryo oMungu mwakania na Balamu. Balamu mwabwira oMungu ati: “Nabiritondeka ebiherero 7, kandi nabiriherera oko buli kiherero kw’enume nguma y’ende n’embangale nguma.”
5 Neryo Yehova mwabwira Balamu ebyo akendibugha. Enyuma sy’aho, mwamubwira ati: “Usube eyiri Balaki, n’ebyo byo ukendimubwira.”
6 Neryo abere abisubula, mwalangira Balaki n’abakulu bosi be Moabu ibanimene hakuhi n’obuhere bw’eryokererya bwa Balaki.
7 Neryo Balamu mwabugha ebinywa by’omusyo bino:
“Balaki, omwami we Moabu, mwakanilusaya e Aramu,Mwakanilusaya eyiri ebitwa by’eyo eryuba rikasira.
Mwakabugha ati:
‘Asa, ungwatikaye eritakira Yakobo.
Asa uhemule Israeli.’
8 Ngenditakira niti abo Mungu atalyatakira?
Kandi ngendihemula niti abo Yehova atalyahemula?
9 Ninemulangira Abaisraeli ininimene oko mabwe manene-manene,Kandi ninemubalangira inine oko hitwa.
Ni kihanda ekikereyo ikikyene;Sibaliyilangira ng’ebindi bihanda.
10 Nindi yo wangatoka erighanza abana ba Yakobo, abanene ng’olututu?Kutse nibya n’eritaghanza ekighuma ky’omo bini ky’omo Baisraeli?
Nihole oluholo lw’abatunganene,N’omwiso waghe abye ng’owabo.”
11 Neryo Balaki mwabwira Balamu ati: “Mukangolera utya busanaki? Ngabikubirikira niti wase utakire esyonzighu syaghe. Talebya ekyo wamakola! Omo mwanya w’eritakirabo, ibwa ukatsumulabo.”
12 Balamu mwamusubirya ati: “Ingye singabugha ebyo Yehova akambwira ati nibughe.”
13 Balaki mwamubwira ati: “Kisi, asa ngakutwala ehandi eyo ukendilangirabo. Ukendilangira bake, siwendilangira abosi; tukendibya twabihikaho, iwaniwatikya eritakirabo.”
14 Neryo mwamutwala omo kisuki kye Zofimu, oko singyi ye Pisga. Mubahimbaho ebiherero 7, n’eriherera ende nguma y’obulume, n’embangale nguma oko buli kiherero.
15 Neryo Balamu mwabwira Balaki ati: “Usighale hano hakuhi n’obuhere bwaghu bw’eryokererya. Ingye ngaya halya, ngayakanaya n’oMungu.”
16 Neryo Yehova mwakania na Balamu, amamubwira ebyo akendibugha. Enyuma sy’aho, amamubwira ati: “Suba eyiri Balaki, n’ebyo byo ukendimubwira.”
17 Neryo Balamu mwasuba eyiri Balaki, ameya inianamulindire hakuhi n’obuhere bwiwe bw’eryokererya, n’abakulu be Moabu babya ibane haghuma naye. Balaki mwabulya Balamu ati: “Yehova atiki?”
18 Neryo Balamu mwabugha ebinywa by’omusyo bino:
“Balaki, hangana uhulikirire.
Unihulikirire, mughala wa Zipori.
19 OMungu syalibugha amabehi ng’abandu,Kandi syalibinduka-binduka* ng’abandu.
Anganabugha omwatsi, iniabula erikolagho?
Anganabula eriberererya ebyo akabugha?
20 Mungabirikirawa busana n’erisyatsumula;Neryo kundi abiritsumula, sinangalaba oko kiwe.
21 Syangalighira obuloyi bosi-bosi erihika oko Yakobo,Kandi syangalighira obuhanya bosi-bosi bukahika oko Israeli.
Yehova, oMungu wabo, ane haghuma nabo,Iye yo bakapipa m’omwami wabo.
22 OMungu anemulusyabo e Misri.
Bakamulangira ng’amahembe w’enume y’ende y’omoli.
23 Sihali emyatsi mibi eyo omundu angaminyerera eyangahika oko Yakobo,Kandi sihali obuloyi bosi-bosi obwangahika oko Israeli.
Lino twanganabugha oko Yakobo na Israeli tuti:
‘Mulangire ekyo oMungu abirikola!’
24 Abandu aba bakendisyahangana ng’esimba,Bakendisyayihangania ng’esimba.
Siyendisyabundama yiteyalya akanyama ako yiriitaKandi yiteyanywa omusasi w’abalitibawa.”
25 Neryo Balaki mwabwira Balamu ati: “Wamabya isiwangatoka eritakirabo, iwalw’iwaleka n’eritsumulabo.”
26 Neryo Balamu mwasubirya Balaki ati: “Si mungakubwira niti ngendikola ebyo Yehova akendibugha ati nikole.”
27 Neryo Balaki mwabwira Balamu ati: “Kisi, asa ngatasyakutwala omo ghundi mwanya. Kwa muhwa oMungu w’ekwenene akendilangira ikyamuwana iwe eriniwatikya eritakirabo itune aho.”
28 Neryo Balaki mwatwala Balamu oko singyi ye Peori, aho omundu akalangirira e Yeshimoni.*
29 Neryo Balamu mwabwira Balaki ati: “Uhimbe hano h’ebiherero 7, kandi uniteghekaniraye esyonume sy’esyonde 7 n’esyombangale 7.”
30 Neryo Balaki mwakola ngoko Balamu amubwira. Mwaherera enume nguma y’ende, n’embangale nguma oko buli kiherero.
