Emighanzo 24:1-25
24 Neryo Balamu mwabya abilangira ngoko Yehova anzire eritsumula Abaisraeli, mwaleka eritasyayarondya emyatsi eyikakanganaya ngoko obuhanya bukendihikira Abaisraeli. Aliwe mwabindukirya obusu bwiwe eyiri embwarara.
2 Balamu mwabya abisumba ameso wiwe, mwalangira Abaisraeli ibanapangire mo bihanda-bihanda. Neryo ekirimu ky’oMungu mukyasa okw’iye.
3 Neryo mwabugha ebinywa by’omusyo bino:
“Ebinywa bya Balamu, mughala wa Beori,Ebinywa by’omundu oyo ameso wiwe abirikingulwa,
4 Ebinywa by’oyukowa ekinywa ky’oMungu,Oyulyalangira enzoli eyikalua ok’Omutoki w’Ebyosi,Oyulyunama ameso wiwe inianakingulire:
5 Yakobo, esyohema syaghu syuwene nga,Israeli, esyohema syaghu syuwene nga!
6 Sihikire hali ng’emisya,*Ng’amalima awali hakuhi n’olusi,Ng’engaka eyo Yehova ahera,Ng’emiti y’emierezi eyiri hakuhi n’amaghetse.
7 Amaghetse akabya inianemulua omo syombegeti siwe ibiri sy’engobi,N’embuto* yiwe yabiriherwa hakuhi n’amaghetse mangyi.
N’omwami wiwe akendisyabya mukulu kulenga Agagi,N’obwami bwiwe bukendisyabya endata kutsibu.
8 OMungu anemumulusya e Misri;Bakamulangira ng’amahembe w’enume y’ende y’omoli.
Israeli akendisyabughaho ebihanda, abakamwaghalaya,Akendisyatakunya amakuha wabo,Kandi akendisyapanza-panzabo omo misali yiwe.
9 Abiribundama, abiriyighalika ng’esimba,Nindi yo wangayitswa eribukya esimba?
Abakakutsumula babiritsumulwa,N’abakakutakira babiritakirwa.”
10 Neryo Balaki mwahitana kutsibu oko Balamu. Balaki mwabya akabanda oko byala inianahitene, kandi mwabwira Balamu ati: “Mungakubirikira erisyatakira esyonzighu syaghe, aliwe eno ni ngendo y’akasatu ighunemubatsumula.
11 Ulw’iwasuba ewaghu. Nilwenanzire erikusikya kutsibu. Aliwe busana na Yehova, siwendisikibwa.”
12 Balamu mwasubirya Balaki ati: “Si munanabwira abandu abo watuma niti:
13 ‘Nomo Balaki angamba enyumba yiwe eyiswiremo efeza* n’ehoro, sinangayitswa erilaba oko ekyo Yehova akabugha omw’ikola ekibi kutse ekibuya. Kandi munababwira niti ebyo Yehova akendinibwira bisa byo ngendibugha.’
14 Neryo lino ngasuba ewetu. Asa ngakubwira ebyo abandu aba bakendisyakolera abandu baghu omo biro ebikasa.”*
15 Neryo Balamu mwabugha ebinywa by’omusyo bino:
“Bino ni binywa bya Balamu, mughala wa Beori,Ebinywa by’omundu oyo ameso wiwe abirikingulwa.
16 Ebinywa by’oyukowa ekinywa ky’oMungu.Oyo wasi emyatsi y’Ow’endata Kutsibu,Oyo walangira enzoli eyikalua ok’Omutoki w’Ebyosi,Iniabiryunama n’ameso wiwe inianakingulire:
17 Ngendimulangira, aliwe butsira lino;Ngendimulangira, aliwe butsira lino-lino.
Engununu ikendisyalua ewa Yakobo,N’omutso w’omwami akendisyalua omo Israeli.
Oko kwenene, akendisyatula embumo* ya MoabuN’amakuha w’oko mutwe w’abandu bosi b’omwagha.
18 Kandi Edomu ikendisyahambwa,Esyonzighu sya Seiri sikendisyahamba SeiriOmughulu Abaisraeli bakendisyakangania obutubaha bwabo.
19 Yakobo akendisyaluamo omundu oyukendisyatabala,Kandi omundu oyo akendisyabughaho omundu wosi-wosi oyukendisyasaka omo muyi oyo.”
20 Mwabya abilangira Amaleki, mwalola embere eribugha ebinywa biwe by’omusyo, mwabugha ati:
“Amaleki yo watsuka omo bihanda byosi,Aliwe oko mwiso, akendisyatsandibwa.”
21 Mwabya abilangira Abakeni, mwalola embere eribugha ebinywa biwe by’omusyo, mwabugha ati:
“Wikere ahatulere, n’obwikalo bwaghu buli oko lubwe.”*
22 Aliwe omundu akendisyatimya Kaini,
Hakisiya ebiro bingahi embere Abasiria bakutwale omo bunyewa?
23 Mwalola embere eribugha ebinywa biwe by’omusyo, mwabugha ati:
“Bulighe! Nindi yukendisyasabuka omughulu oMungu akendisyakola ekyo?
24 Amato akendisyalua omo kiharo ky’oko musike w’engetse kye Kitimu,Bakendisyaghalya abandu be Asiria,Bakendisyaghalya abandu be Eberi.
Aliwe naye akendisyatsandibwa olosi.”
25 Neryo Balamu mwasuba ewiwe, na Balaki naye amaghenda bwiwe.
Amaelezo awehikwa
^ Kutse “ng’ehyusi ehikuma.”
^ Kutse “N’abana.”
^ Ni kindu ky’obughuli ekikalua omo kitaka.
^ Kutse “omo biro by’enduli.”
^ Kutse “omutwano.” Ni bugha ambu, omwanya owali omo kati-kati k’eriso n’okutu.
^ Kutse “lukuka.”
