Emighanzo 25:1-18
25 Omughulu Abaisraeli babya bikere e Shitimu, abandu mubatsuka erikola oburaghane n’abambesa be Moabu.
2 Abakali mubabya bakabirikira Abaisraeli omughulu babya bakaherera emiungu yabo y’amahere. Neryo Abaisraeli mubalya, bamatsuka n’erikukamira emiungu y’Abamoabu.
3 Neryo Abaisraeli nabo mubaramya Baali we Peori, na Yehova mwahitana kutsibu oko Baisraeli.
4 Yehova mwabwira Musa ati: “Wimaye abakulu* bosi abalingiraya abandu aba omo rilolo. Uhanikebo omo ritungyi* embere sya Yehova, kusudi Yehova aleke erihitana oko Israeli.”
5 Neryo Musa mwabwira abatsweri be Israeli ati: “Obuli mughuma w’okw’inywe ite ab’oko balume biwe abalyaramaya Baali we Peori.”
6 Muhatalaba ndambi nene, Omwisraeli mughuma amingirya omo kambi m’omukali Mumidiani, Musa n’Abaisraeli ibanalangire. Ekyo mukyakoleka ibakinalirira oko mulango w’ehema y’erihindanamo.
7 Finehasi, mughala wa Eleazari, mughala w’omuhereri Haruni, mwabya abilangira ekyo, mwalw’inialua ahali Abaisraeli abo, amimya eritumo riwe.
8 Neryo mwakwamirira Omwisraeli oyo omo hema yiwe, amatsimita ababiri abo, ni bugha ambu omulume Mwisraeli n’omukali oyo omo bitsuko byabo by’olubuto. Neryo ekihunzo ekyahika oko Baisraeli mukyahwa.
9 Abandu abahola omo kihunzo ekyo mubabya 24 000.
10 Neryo Yehova mwabwira Musa ati:
11 “Finehasi, mughala wa Eleazari, mughala w’omuhereri Haruni, abiribugha ekinigha ekyo nilue nakyo oko Baisraeli, kundi mwatetalighira omundu wosi-wosi akaleghula okw’ingye. Ekyo kyo kiryaleka indabughaho Abaisraeli nomo nanzire ibaniramya ingye musa.
12 Busana n’ekyo, umubwire uti, ‘Ngakola naye endaghane y’obuholo.
13 Busana n’endaghane eyo, iye n’abana biwe bo bakendisyabya bakabya bahereri, kundi mwatitalighira omundu wosi-wosi akaleghula oko Mungu wiwe, kandi abirileka Abaisraeli ibaghanyirwa.’”
14 Omulume Mwisraeli oyo witibawa haghuma n’omukali Mumidiani abya akahulwa mo Zimri, mughala wa Salu, omukulu w’ekitunga ky’Abasimeoni.
15 Omukali Mumidiani oyo witibawa abya akahulwa mo Kozbi, mwali wa Zuri. Zuri abya mukulu w’ebihanda e Midiani.
16 Enyuma sy’aho, Yehova mwabwira Musa ati:
17 “Mughalaye Abamidiani n’eriitabo,
18 kundi nenyu mubakabaghalaya omo mayele agho balyakolesaya omo mwatsi wa Peori n’omo mwatsi owalebirye Kozbi, mwali w’omukulu we Midiani, mwali wabo oyo witibawa omughulu w’ekihunzo ekyasa busana n’omwatsi wa Peori.”
